17 вызваленым у снежні 2025 года палітвязням нададзены статус міжнароднай абароны ў Польшчы
Гэта стала вядома падчас сустрэчы намесніка кіраўніцы Аб’яднанага пераходнага кабінета, кіраўніка НАУ Паўла Латушкі з кіраўніком Упраўлення па справах замежнікаў Томашам Цытрыновічам.
У сустрэчы таксама прынялі ўдзел кіраўнік прававой камісіі Каардынацыйнай рады Міхаіл Кірылюк і прадстаўніца Цэнтра беларускай салідарнасці Вольга Дабравольская, паведамляе АПК.
У ходзе сустрэчы абмяркоўваліся пытанні:
— легалізацыі на тэрыторыі Польшчы 83 палітвязняў, вызваленых і выдвараных на тэрыторыю Украіны ў снежні 2025 года, якія прынялі рашэнне аб легалізацыі ў Польшчы.
— легалізацыі трох вызваленых палітвязняў, якія былі выдвараныя на тэрыторыю Літвы 19 сакавіка гэтага года і 21 сакавіка са згоды польскіх уладаў прыехалі на тэрыторыю Польшчы для наступнай легалізацыі.
Томаш Цытрыновіч праінфармаваў Паўла Латушку пра тое, што ў адносінах да 17 вызваленых палітвязняў, грамадзян Беларусі, выдадзены станоўчыя рашэнні аб міжнароднай абароне ў Польшчы.
Таксама прадстаўнік польскага ведамства адзначыў, што прыкладаюцца намаганні для паскарэння працэдуры легалізацыі іншых вызваленых палітвязняў, чые дакументы на дадзены момант разглядаюцца ва Упраўленні.
Падчас сустрэчы былі дасягнуты дамоўленасці аб прыярытэтным разглядзе пытанняў легалізацыі трох беларусаў, якія былі дэпартаваныя рэжымам Лукашэнкі ў групе з 15 чалавек у Літву і плануюць легалізавацца ў Польшчы.
Таксама падчас сустрэчы былі закранутыя праблемныя пытанні адкрыцця банкаўскіх рахункаў для грамадзян Беларусі. Плануецца, што 26 сакавіка адбудзецца сустрэча Паўла Латушкі з кіраўніцтвам Камісіі фінансавага нагляду Польшчы, у якой прадугледжваецца ўдзел прадстаўнікоў Міністэрства ўнутраных спраў і Міністэрства фінансаў Польшчы для пошуку шляхоў выхаду са складанай сітуацыі.
Цяпер чытаюць
Мінчанка Ангеліна, якая прасіла ў Лукашэнкі кватэру за тройню, атрымала жыллё26
Каментары