Proźvišča žurnalista nieadnarazova było ŭ śpisach palitviaźniaŭ, vyzvaleńnia jakich prasili amierykancy, i kožny raz biełaruski bok vykreślivaŭ jaho.
Polskaja hazieta Rzeczpospolita nazvała mahčymyja ŭmovy, jakija ŭ Minsku vystaŭlajuć Varšavie dla vyzvaleńnia palitviaźnia Andžeja Pačobuta, źviarnuŭ uvahu Reform.news.
Niekalki nie źviazanych pamiž saboj surazmoŭcaŭ vydańnia paćvierdzili, što proźvišča Pačobuta było ŭ śpisach palitviaźniaŭ, vyzvaleńnia jakich prasili amierykancy.
«I kožny raz biełaruski bok vykreślivaŭ jaho proźvišča.
U Minsku kažuć, što heta «inšaja sprava», jakaja pavinna być vyrašana ŭ miežach pieramovaŭ Biełarusi i Polščy», — pryvodziacca ŭ artykule słovy adnaho z surazmoŭcaŭ, jaki ŭdzielničaje ŭ pracesie vyzvaleńnia biełaruskich palitviaźniaŭ.
Jak piša vydańnie, polski bok z momantu zatrymańnia Pačobuta ŭ Biełarusi pradprymaŭ namahańni dla jaho vyzvaleńnia. U pryvatnaści, pavodle infarmacyi Rzeczpospolita, hetaje pytańnie ŭzdymałasia padčas vizitu papiaredniaha prezidenta Polščy Andžeja Dudy ŭ Kitaj.
Z namahańniami pa vyzvaleńni Pačobuta vydańnie taksama źviazvaje adkryćcio polskim uradam dvuch punktaŭ propusku na miažy ź Biełaruśsiu. Jašče adnym sihnałam Minsku staŭ «cichi» pierajezd u Varšavu Śviatłany Cichanoŭskaj, kab nie «razdražniać dyktatara».
«Dobra infarmavany surazmoŭca» raspavioŭ haziecie, što adnoj z umoŭ Minska źjaŭlajecca adnaŭleńnie palityčnaha dyjałohu.
«Čakajuć vizitu polskaha palityka ŭ Minsk u ranhu nie nižej za namieśnika ministra i raźličvajuć na adnaŭleńnie palityčnych kantaktaŭ. Pačobut siońnia źjaŭlajecca zakładnikam dyktatara. Ale navat taki vizit nie harantavaŭ by pośpiechu. Situacyja vielmi składanaja, bo praciahvajecca vajna, i Biełaruś biare ŭ joj udzieł na baku Rasii», — cytuje hazieta surazmoŭcu.
Jak piša Rzeczpospolita, heta ž paćvierdziŭ «źviazany z režymam Łukašenki» surazmoŭca: u Minsku raźličvajuć na taki vizit, a vyzvaleńnie Pačobuta budzie zaležać ad palityčnaha dyjałohu.
Varta adznačyć, što prapahandyst Juryj Vaskrasienski ŭžo nieadnarazova publična kazaŭ, što Pačobuta mahli b adpuścić, kali b za im pryjechaŭ asabista ministr zamiežnych spraŭ Polščy Radasłaŭ Sikorski.
Jašče adzin «dobra daśviedčany» surazmoŭca vydańnia śćviardžaje, što bačyć «śviatło ŭ kancy tunela».
«Spadziajomsia, što heta nie ciahnik, jaki nabližajecca, a vychad z hetaha tunela», — pryvodziacca jaho słovy.
Andžej Pačobut byŭ zatrymany roŭna piać hadoŭ tamu, 25 sakavika 2021 hoda, i praz dva hady asudžany na vosiem hadoŭ kałonii.
Ciapier čytajuć
Kolkaść sudoŭ pa palityčnych kryminałkach źmienšyłasia ŭ razy6
Kamientary
----
s čieho eto łukašisty riešili čto mohut ukazyvať komu i s kiem ujezžať iz strany? a sidit on prieždie vsieho potomu čto v załožnikach okazałsia u etich tierroristov-ludojedov za svoju poziciju. ujezžať nie chočiet. nu i Polša v siłu raznych pričin nie chočiet daviť silnieje, kak mohła by.