Biełaruskim mužčynam za vialikija hrošy prapanoŭvajuć prateściravać na sabie preparat dla lačeńnia raku małočnaj załozy
Nacyjanalnaja antydopinhavaja łabaratoryja prapanuje zdarovym mužčynam pa 4000 rubloŭ.
Spasyłki na cikavuju prapanovu źjavilisia ŭ Threads.
Nacyjanalnaja antydopinhavaja łabaratoryja ciapier pravodzić kliničnaje daśledavańnie bijaekvivalentnaści (preparat «Piertuzumab»). Kali kazać prostaj movaj, chočuć pravieryć, ci dziejničaje novy preparat tak, jak aryhinalny.
Sam «Piertuzumab» vykarystoŭvajuć dla lačeńnia raku małočnaj załozy (darečy, mienavita hety vid raku najbolš časta sustrakajecca ŭ biełaruskich žančyn).
Paznačana, što praviadzieńnie daśledavańnia preparata adobrana Ministerstvam achovy zdaroŭja i niezaležnym etyčnym kamitetam. U jakaści dobraachvotnikaŭ šukajuć zdarovych mužčyn va ŭzroście ad 18 da 45 hadoŭ.
Samo daśledavańnie budzie vyhladać tak: spačatku čałaviek projdzie poŭnaje miedycynskaje abśledavańnie, potym jaho špitalizujuć ź piatnicy da niadzieli i ŭviaduć preparat. A paśla nieabchodna budzie rabić ambułatornyja vizity pa ŭzhodnienamu hrafiku.
Hanarar dla ŭdzielnikaŭ praduhledžany — abiacajuć zapłacić kožnamu pa 4000 rubloŭ.
Karystalnikaŭ Threads ździviła toje, što preparat ad raku małočnaj załozy płanujuć teściravać vyklučna na mužčynach. Ale adkaz akazaŭsia banalnym: zhodna z praviłami praviadzieńnia daśledavańniaŭ bijaekvivalentnaści, poł udzielnikaŭ nie maje značeńnia, adnak nieabchodna ŭličvać ryzyku dla žančyn dzietarodnaha ŭzrostu. U hetym vypadku było vyrašana abmiežavać udzieł žančyn dzietarodnaha ŭzrostu, kab minimizavać ryzyki dla repraduktyŭnaj sistemy.
Tym mužčynam, jakija chočuć paŭdzielničać u daśledavańni, nieabchodna zapoŭnić nievialikuju ankietu na sajcie Nacyjanalnaj antydopinhavaj łabaratoryi. Tam siarod standartnych pytańniaŭ pra ŭzrost, pracu i kantaktnyja dadzienyja jość i pytańni pra spažyvańnie ałkaholu i narkotykaŭ, a taksama kureńnie.
Nieabchodna budzie taksama raspavieści, ci źjaŭlajecca mužčyna viehietaryjancam i ci prymaje rehularna niejkija leki (u tym liku i BADy). Paprosiać i pryznacca, ci prymaŭ raniej čałaviek udzieł u niejkich kliničnych daśledavańniach i jak daŭno heta było.
Chto tyja dva piersanažy, jakija nie pili ŭ mižvajennaj Vilni, jak Zośku Vieras abudzili ad letarhii i ci praŭdzivaja bajka pra Karatkieviča i restaran11
Kamientary