Impart aŭto pryvatnikami raście, a ŭ dyleraŭ — padzieńnie prodažaŭ. Tamu dylery chočuć, kab było, jak u Rasii
Za pieršyja dva miesiacy hoda prodažy aficyjnych dyleraŭ upali na 57% u paraŭnańni z anałahičnym pieryjadam minułaha hoda.
Fizičnyja asoby — hałoŭny imparcior aŭto ŭ Biełaruś
Pavodle statystyki «BAA-Kansałt», za pieršyja dva miesiacy 2026 hoda fizičnyja asoby ŭvieźli ŭ krainu 16,3 tysiačy lehkavikoŭ, što na 11% bolš, čym za anałahičny pieryjad minułaha hoda. U toj ža čas prodažy aficyjnych dyleraŭ za hety pieryjad źnizilisia na 57%.
Pryčyn hetamu niekalki.
Pa-pieršaje, heta novyja staŭki ŭtylizacyjnaha zboru, jakija dziejničajuć z 10 lutaha 2025 hoda. Tamu 57‑pracentnaje padzieńnie choć i vyhladaje apakaliptyčnym, ale nie zusim relevantnaje dla paraŭnańnia praz roznyja staŭki.
Tady ŭtylzbor na novyja mašyny (va ŭzroście da 3 hadoŭ) z abjomam ruchavika ad 1 da 2 litraŭ (samy raspaŭsiudžany varyjant) dla jurydyčnych asob vyras z 11 645 rubloŭ da 23 575 rubloŭ.
Adbylisia źmieny i dla elektramabilaŭ: kali pa starych staŭkach jurydyčnyja asoby pry ŭvozie novaj «elektryčki» płacili 544 rubli, to stali 1 148 rubloŭ. Ale tut nie takija vialikija sumy.
U toj ža čas dla fizičnych asob staŭki ŭtylzboru na lehkavyja aŭto zastalisia małymi — 544 rubli dla aŭto va ŭzroście da troch hadoŭ i 1089 rubloŭ dla starejšych za try hady. Dla pryvatnikaŭ jany adnolkavyja ŭ niezaležnaści ad typu ruchavika.
Pa-druhoje, heta źmieny ŭ kłasifikacyi niekatorych hibrydaŭ. Reč u tym, što z 2026 hoda pracujuć novyja praviły ŭvozu dla paśladoŭnych hibrydaŭ (mašyn, jakija majuć ruchavik unutranaha zharańnia, što pracuje vyklučna jak hienieratar, bo koły ŭ ruch pryvodziacca elektramatoram).
Ad 1 studzienia 2026 hoda takija aŭto pry ŭvozie ŭ Biełaruś pazbaŭleny ilhot pa PDV, jakija zastalisia ŭ čystych elektramabilaŭ. U dadatak pry ich imparcie budzie dziejničać standartnaja dla elektrakaraŭ mytnaja pošlina pamieram 15%.
Dla jurydyčnych asob u dačynieńni da takich aŭto źmianilisia i staŭki ŭtylizacyjnaha zboru.
Praz usie hetyja akaličnaści impart hibrydaŭ z ruchavikom-hienierataram jurydyčnymi asobami faktyčna staŭ biessensoŭnym.
Fizičnyja asoby ž mohuć sekanomić jak na ŭtylzbory, tak i na mycie, kali ŭ ich jość ilhota, zapłaciŭšy 7,5% zamiest 15%.
Pa-treciaje, upłyvaje 140‑y ŭkaz, jaki dziejničaje z krasavika 2019 hoda i dazvalaje šmatdzietnym i invalidam 1‑j i 2‑j hrup razmytnivać aŭto z 50‑pracentnaj źnižkaj.
Adznačym, što pradstaŭniki BAA ŭžo nieadnarazova publična vykazvalisia za toje, kab ukaz byŭ pierahledžany, bo, pa ich danych, 2/3 mašyn, uviezienych pa ilhocie, źmianiajuć ułaśnika ciaham troch miesiacaŭ paśla ŭvozu ŭ Biełaruś.
Čaho chočuć aficyjnyja dylery
Kali da 140‑ha ŭkaza dadalisia pavyšanyja staŭki utylzboru dla jurasob i źmieny ŭ kłasifikacyi hibrydaŭ, pra źmieny ŭ patrabavańniach dla pryvatnikaŭ zahavaryli z novaj siłaj.
Asabliva kali pad bokam jość Rasija, u jakoj fizičnaja asoba moža skarystacca ilhotami, ale ŭ vypadku prodažu raniej čym praz 12 miesiacaŭ musić dapłacić utylzbor da kamiercyjnaha ŭzroŭniu. Heta zrabiła pryvoz mašyn na pieraprodaž fizasobami niemetazhodnym.
Z zajaŭ, jakija hučać ad BAA, mienavita taki režym uvozu fizičnymi asobami jany chočuć bačyć i ŭ Biełarusi.
Pakul ža adzinym krokam, zroblenym u kirunku baraćby z šerym impartam, možna nazvać admovu aŭtaryzavanych dyleraŭ SZAA «Biełdžy» prymać na servisnaje absłuhoŭvańnie aŭtamabili Geely, kuplenyja nie praz aficyjnuju dylerskuju sietku Biełarusi.
Rasijskija prapahandysty vydumali ŭdar drona pa turystyčnym aŭtobusie. Ale ŭ historyi jość zahadkavyja fury5
Kamientary