Імпарт аўто прыватнікамі расце, а ў дылераў — падзенне продажаў. Таму дылеры хочуць, каб было, як у Расіі
За першыя два месяцы года продажы афіцыйных дылераў упалі на 57% у параўнанні з аналагічным перыядам мінулага года.
Фізічныя асобы — галоўны імпарцёр аўто ў Беларусь
Паводле статыстыкі «БАА-Кансалт», за першыя два месяцы 2026 года фізічныя асобы ўвезлі ў краіну 16,3 тысячы легкавікоў, што на 11% больш, чым за аналагічны перыяд мінулага года. У той жа час продажы афіцыйных дылераў за гэты перыяд знізіліся на 57%.
Прычын гэтаму некалькі.
Па-першае, гэта новыя стаўкі ўтылізацыйнага збору, якія дзейнічаюць з 10 лютага 2025 года. Таму 57‑працэнтнае падзенне хоць і выглядае апакаліптычным, але не зусім рэлевантнае для параўнання праз розныя стаўкі.
Тады ўтыльзбор на новыя машыны (ва ўзросце да 3 гадоў) з аб'ёмам рухавіка ад 1 да 2 літраў (самы распаўсюджаны варыянт) для юрыдычных асоб вырас з 11 645 рублёў да 23 575 рублёў.
Адбыліся змены і для электрамабіляў: калі па старых стаўках юрыдычныя асобы пры ўвозе новай «электрычкі» плацілі 544 рублі, то сталі 1 148 рублёў. Але тут не такія вялікія сумы.
У той жа час для фізічных асоб стаўкі ўтыльзбору на легкавыя аўто засталіся малымі — 544 рублі для аўто ва ўзросце да трох гадоў і 1089 рублёў для старэйшых за тры гады. Для прыватнікаў яны аднолькавыя ў незалежнасці ад тыпу рухавіка.
Па-другое, гэта змены ў класіфікацыі некаторых гібрыдаў. Рэч у тым, што з 2026 года працуюць новыя правілы ўвозу для паслядоўных гібрыдаў (машын, якія маюць рухавік унутранага згарання, што працуе выключна як генератар, бо колы ў рух прыводзяцца электраматорам).
Ад 1 студзеня 2026 года такія аўто пры ўвозе ў Беларусь пазбаўлены ільгот па ПДВ, якія засталіся ў чыстых электрамабіляў. У дадатак пры іх імпарце будзе дзейнічаць стандартная для электракараў мытная пошліна памерам 15%.
Для юрыдычных асоб у дачыненні да такіх аўто змяніліся і стаўкі ўтылізацыйнага збору.
Праз усе гэтыя акалічнасці імпарт гібрыдаў з рухавіком-генератарам юрыдычнымі асобамі фактычна стаў бессэнсоўным.
Фізічныя асобы ж могуць сэканоміць як на ўтыльзборы, так і на мыце, калі ў іх ёсць ільгота, заплаціўшы 7,5% замест 15%.
Па-трэцяе, уплывае 140‑ы ўказ, які дзейнічае з красавіка 2019 года і дазваляе шматдзетным і інвалідам 1‑й і 2‑й груп размытніваць аўто з 50‑працэнтнай зніжкай.
Адзначым, што прадстаўнікі БАА ўжо неаднаразова публічна выказваліся за тое, каб указ быў перагледжаны, бо, па іх даных, 2/3 машын, увезеных па ільгоце, змяняюць уласніка цягам трох месяцаў пасля ўвозу ў Беларусь.
Чаго хочуць афіцыйныя дылеры
Калі да 140‑га ўказа дадаліся павышаныя стаўкі утыльзбору для юрасоб і змены ў класіфікацыі гібрыдаў, пра змены ў патрабаваннях для прыватнікаў загаварылі з новай сілай.
Асабліва калі пад бокам ёсць Расія, у якой фізічная асоба можа скарыстацца ільготамі, але ў выпадку продажу раней чым праз 12 месяцаў мусіць даплаціць утыльзбор да камерцыйнага ўзроўню. Гэта зрабіла прывоз машын на перапродаж фізасобамі немэтазгодным.
З заяў, якія гучаць ад БАА, менавіта такі рэжым увозу фізічнымі асобамі яны хочуць бачыць і ў Беларусі.
Пакуль жа адзіным крокам, зробленым у кірунку барацьбы з шэрым імпартам, можна назваць адмову аўтарызаваных дылераў СЗАА «Белджы» прымаць на сэрвіснае абслугоўванне аўтамабілі Geely, купленыя не праз афіцыйную дылерскую сетку Беларусі.
Цяпер чытаюць
Лукашэнка нервова пракаментаваў візіт Ціханоўскай у Кіеў20
Каментары