«Miedsiastra turbuje, abnaŭlaju vašu miedkartu». Machlary prydumali novuju schiemu padmanu praz telehram
Biełarusy masava dzielacca ŭ sacsietkach historyjami pra dziŭnyja pierapiski byccam by z supracoŭnikami paliklinik. Pačynajecca ŭsio sa, zdajecca, biasškodnaha pytańnia pra rost. A što budzie, kali adkazać?
Biełaruska Alina prademanstravała ŭ Threads skrynšoty pierapiski z machlarami. U telehramie dziaŭčynie napisali z akaŭnta, jaki byŭ padpisany Hanna Bałucienka. Darečy, adrazu kidajecca ŭ vočy toje, što jaho ŭładalnik źmianiŭ imia za 4 chviliny da pačatku pierapiski.
«Hanna» paviedamiła, što piša z palikliniki — i voś jakraz ciapier zapaŭniaje miedkartku Aliny: «Nieabchodna paznačyć vaš rost. Udakładnicie, kali łaska, pryblizny».
Dziaŭčyna vyrašyła pacikavicca, u jakoj kankretna paliklinicy pracuje «Hanna» — taja pasprabavała saskočyć z pytańnia. Ale ŭ vyniku naŭhad nazvała tolki horad — Hrodna.
Sama Alina nie toje, što nie žyvie ŭ Hrodna, ale i ŭvohule nikoli tam nie była. Tamu z čystym sumleńniem adrazu zabłakavała «miedsiastru».
Biełarusy ŭ kamientarach pačali dzialicca svaimi skrynšotami anałahičnych pierapisak. Ź ich stała zrazumieła, što adbyvajecca dalej, kali čałaviek nazyvaje svoj rost.
Kab jašče bolš usypić pilnaść surazmoŭcy, machlar zadaje pytańnie pra alerhii i inšyja skarhi na zdaroŭje. Atrymaŭšy adkaz kštałtu «Nie, usio dobra», jon piša: «Vielmi dobra, nie chvarejcie!».
A dalej pačynajecca hałoŭnaje: «miedsiastra» kaža, što treba jašče spraŭdzić numar — a dziela hetaha spatrebicca ci nazvać apošnija 4 ličby numara, ź jakoha telefanujuć, ci napisać kod z SMS.
Kali čałaviek daje takuju infarmacyju, jon ryzykuje zastacca biez hrošaj na svaim rachunku. Kali ž jon łović machlara na vidavočnych niestykoŭkach u adkazach, surazmoŭca chutka vydalaje svaje paviedamleńni.
Časam machlary telefanujuć jak supracoŭniki palikliniki. Schiema pryblizna taja ž: prapanoŭvajuć, naprykład, zapisacca na fluarahrafiju — a kab paćvierdzić vizit, treba nazvać kod z SMS.
Takoj historyjaj padzialiłasia ŭ kamientarach inšaja biełaruska: «Siońnia ranicaj tatu patelefanavali, ja spała, jon pačaŭ mianie budzić u panicy, što nie moža znajści kod, jaki jamu adpravili. Ja tak chutka pračnułasia, što jašče nie zrazumieła, što adbyvajecca… Vychapiła ŭ jaho telefon, a tam «miedrabotnik». Ja pačynaju ź joj razmaŭlać, a jana: «Vy ŭvohule chto? Kim prychodziciesia?». Ja kažu: «Dačka». Jana: «Pieradajcie tatu telefon, mnie treba zapisać jaho na pryjom». Ja kažu: nie, sami pryjdziem, zapišamsia, kali treba budzie. «Nu čamu ž vy raniej nie pryjšli, havarycie kod, dačka sr*naja».
Minčanka ŭziała baćkoŭskija 11 000 rubloŭ i pieraviała ašukancam, kab nie zarabić kryminalnuju spravu
U siecivie ludziej łoviać na rozyhryš nibyta ad imia «Jeŭraopta»
80‑hadovaja babula z Udmurcii dvojčy pryjazdžała ŭ Minsk pa zadańni machlaroŭ
U Hrodnie školnik pieradaŭ afierystam 82 tysiačy rubloŭ. Ale ŭsio skončyłasia dobra
Kamientary