Pa danych zachodnich śpiecsłužbaŭ, viarboŭščyki i prapahandysty, jakija raniej pracavali na rasijskuju hrupu «Vahnier», stali asnoŭnym kanałam dla arhanizavanych Kramlom dyviersij u Jeŭropie.
Jak piša The Financial Times, paśla niaŭdałaha miaciažu suprać vajennaha kiraŭnictva Rasii ŭ červieni 2023 hoda i hibieli zasnavalnika hrupoŭki Jaŭhiena Pryhožyna status «Vahniera» zastajecca niavyznačanym. Adnak ciapier tyja, chto raniej śpiecyjalizavaŭsia na viarboŭcy maładych ludziej z rasijskaj hłybinki dla vajny va Ukrainie, atrymali novuju zadaču — vierbavać ekanamična ŭraźlivych jeŭrapiejcaŭ dla ŭčynieńnia hvałtoŭnych akcyj na terytoryi krain NATA.
Pavodle adnaho z pradstaŭnikoŭ zachodnich śpiecsłužbaŭ, Hałoŭnaje ŭpraŭleńnie Hienieralnaha štaba Rasii (HRU) «vykarystoŭvaje dastupnyja joj talenty», majučy na ŭvazie sietku «Vahniera». HRU razam z FSB aktyŭna šukajuć u Jeŭropie tak zvanych «adnarazovych» ahientaŭ, kab siejać chaos.
Za apošnija dva hady Kreml značna pašyryŭ kampaniju destabilizacyi i sabatažu, majučy na mecie padarvać rašučaść zachodnich krain u padtrymcy Ukrainy i spravakavać sacyjalnyja chvalavańni. Sutyknuŭšysia z maštabnaj vysyłkaj dypłamataŭ i skaračeńniem kolkaści kadravych špijonaŭ, Maskva vymušana ŭsio čaściej źviartacca da pasłuh pasiarednikaŭ. Dla HRU sietka «Vahniera» stałasia hrubym, ale dziejsnym instrumientam dla hetych metaŭ.
Zadačy, jakija staviacca pierad ahientami, varjirujucca ad padpałaŭ aŭtamabilaŭ palitykaŭ i składoŭ z dapamohaj dla Ukrainy da imitacyi dziejnaści nacysckich prapahandysckich hrup. Zvyčajna vykanaŭcaŭ vierbujuć za hrošy; čaściej za ŭsio heta marhinalizavanyja asoby biez peŭnych žyćciovych metaŭ i aryjenciraŭ.
Pa słovach adnaho ź jeŭrapiejskich čynoŭnikaŭ, viarboŭščyki «Vahniera» ŭmiejuć razmaŭlać z takimi ludźmi na adnoj movie. Rasijskija śpiecsłužby zvyčajna imknucca stvaryć niekalki pramiežkavych słajoŭ pamiž saboj i vykanaŭcami, kab zachavać mahčymaść praŭdapadobnaha admaŭleńnia svajho dačynieńnia, i «vahnieraŭcy» majuć daŭni dośvied takoj pracy z HRU.
U toj ža čas FSB, jak praviła, źviartajecca da złačynnych sietak i dyjaspar, ź jakimi naładziła suviazi ŭ bližnim zamiežžy. Adnak hetyja kanały akazalisia mienš efiektyŭnymi dla masavaj viarboŭki vykanaŭcaŭ.
Značnuju rolu ŭ hetym pracesie adyhryvaje aktyŭnaść u internecie. «Vahnier» i jaho prychilniki paśpiachova adaptavali svaju pracu ŭ sacyjalnych sietkach i Telegram-kanałach dla mižnarodnaj aŭdytoryi, dziejničajučy nadziva prafiesijna i sprytna. Tut adčuvajecca ŭpłyŭ «fabryki trolaŭ» — Ahienctva internet-daśledavańniaŭ, stvoranaha Pryhožynym, jakoje hadami zajmałasia dezinfarmacyjaj na Zachadzie.
Jeŭrapiejskija śpiecsłužby ad pačatku sačyli za rolaj sietki «Vahniera» ŭ kampanii sabatažu. Prykładam takoj dziejnaści staŭ vypadak u Vialikabrytanii ŭ kancy 2023 hoda, dzie praz sacsietki byŭ zavierbavany 21‑hadovy drobny złačynca Dyłan Erł. Jon, uciahnuŭšy ŭ spravu jašče čaćviarych maładych ludziej, arhanizavaŭ padpał składa ŭ Łondanie, za što paźniej byŭ asudžany da 23 hadoŭ źniavoleńnia. Jak adznačyła sudździa, ananimnyja kuratary praź internet znajšli maładych ludziej, hatovych prajści radykalizacyju i zdradzić svajoj krainie dziela lohkich hrošaj.
Paśla hetaha incydentu jeŭrapiejskija słužby biaśpieki pačali vyjaŭlać značna bolš šyrokuju sietku padobnych «adnarazovych» vykanaŭcaŭ pa ŭsioj Jeŭropie. Adnak u hetaj stratehii jość i słaby bok: vyjhrajučy ŭ maštabach i tannaści za košt vykarystańnia dyletantaŭ, Maskva hublaje ŭ kampietentnaści i sakretnaści. Na hety momant kolkaść praduchilenych napadaŭ pieravyšaje kolkaść tych, što ŭdałosia ažyćciavić.
Ciapier čytajuć
Addanaha jabaćku, jaki abražaŭ Śviatłanu Cichanoŭskuju ŭ Threads, kinuli za kraty5
Kamientary