Kitajskaja kampanija prezientavała pieršaha poŭnapamiernaha robata-humanoida, jaki adčuvaje dotyk i biehaje marafony

Jak piša Interesting Engineering, 10 lutaha kitajskaja kampanija X-Humanoid pradstaviła Embodied Tiangong 3.0 — robata novaha pakaleńnia ahulnaha pryznačeńnia.

Adznačajecca, što heta pieršy poŭnapamierny čałaviekapadobny robat ź interaktyŭnym kiravańniem na asnovie dotyku. Jon zdolny reahavać na fizičny kantakt, što adkryvaje mahčymaści dla bolš biaśpiečnaha i intuityŭnaha supracoŭnictva z čałaviekam — naprykład, na zboračnych linijach.

Raspracoŭščyki padkreślivajuć, što novaja płatforma maje adkrytuju ekasistemu, jakaja pavinna vyrašyć prablemy sumiaščalnaści, ź jakimi sutykajucca padobnyja sistemy ŭ pramysłovaści. Tiangong 3.0 abstalavany mnostvam interfiejsaŭ pašyreńnia, što dazvalaje hnutka intehravać pieryfieryjnyja pryłady dla roznych scenaryjaŭ vykarystańnia — ad vykanańnia śpiecyjalizavanych apieracyj da zadač pramysłovaj vytvorčaści.

Što da prahramnaha zabieśpiačeńnia, Embodied Tiangong 3.0 padtrymlivaje asnoŭnyja pratakoły — ROS2, MQTT i TCP/IP, — što dazvalaje intehravać jaho ŭ isnujučuju vytvorčuju infrastrukturu.

The #Beijing Innovation Center of #HumanoidRobotics launched its next-generation general-purpose robot platform: Embodied #Tiangong 3.0.

The robot can tackle complex tasks such as climbing 1-meter obstacles, performing somersaults, juggling ping-pong balls, and dancing. pic.twitter.com/wk62fFBSmd

— Spotlight Beijing (@SpotlightBJ) February 12, 2026

Karystalniki mohuć dapracoŭvać funkcyjanał bieź źmieny bazavaj architektury, pakolki sistema pastaŭlajecca z poŭnym naboram instrumientaŭ raspracoŭki i nizkakodavaj (low-code) płatformaj. Heta istotna źnižaje vydatki i barjery ŭvachodu dla inžynieraŭ i raspracoŭščykaŭ.

Kampanija X-Humanoid taksama adkryła zychodny kod niekalkich klučavych technałohij, u tym liku aparatnaj płatformy Embodied Tiangong, vizualna-moŭnaj madeli Pelican-VL i naboru dadzienych RoboMIND. Hety krok nakiravany na źnižeńnie techničnych barjeraŭ i paskareńnie inavacyj va ŭsioj halinie robatatechniki.

Techničnyja mahčymaści

Embodied Tiangong 3.0 abstalavany intehravanymi šarnirami z vysokim momantam kručeńnia, što zabiaśpiečvaje stabilnaść i zdolnaść vykonvać składanyja dziejańni. Jon moža pieraadolvać pieraškody vyšynioj bolš za adzin mietr. Dziakujučy značnaj kolkaści stupieniaŭ svabody sistema dasiahaje milimietrovaj dakładnaści, što asabliva važna pry pracy ŭ abmiežavanaj prastory.

Asnovaj płatformy źjaŭlajecca ŭłasnaja sistema ŭvasoblenaha intelektu Huisi Kaiwu. Jana pabudavana jak zamknionaja architektura, što abjadnoŭvaje ŭsprymańnie, pryniaćcie rašeńniaŭ i vykanańnie dziejańniaŭ.

Unutranaja łohika padzielena na dva ŭzroŭni: «mały mozh» adkazvaje za dakładnaje kiravańnie ruchami, a «vialiki mozh» — za łahičnaje myśleńnie i pryniaćcie składanych rašeńniaŭ. Taki padychod dazvalaje sumiaścić chutkaść reakcyi z analityčnymi zdolnaściami i zabiaśpiečvaje całkam aŭtanomnyja pavodziny.

Akramia taho, architektura Huisi Kaiwu dazvalaje arhanizavać asinchronnuju kaardynacyju pamiž niekalkimi robatami. Na praktycy adzin centralny intelektualny modul moža adnačasova kiravać niekalkimi mašynami abo roznymi naborami navykaŭ.

More open, more agile, more user-friendly — Embodied Tiangong 3.0, with fully upgraded small and large brains, is ready for action! pic.twitter.com/sQCtkbsvYd

— Pandaily (@thePandaily) February 10, 2026

Historyja dasiahnieńniaŭ

Jak adznačaje vydańnie, novaja raspracoŭka źjaviłasia nie na pustym miescy. Jaje papiaredniki ŭžo prajšli vyprabavańni ŭ ekstremalnych umovach. U krasaviku 2025 hoda Tiangong Ultra ad X-Humanoid pieraadoleŭ paŭmarafonskuju dystancyju (21 km) za 2 hadziny 40 chvilin. Takim čynam jon staŭ pieršym humanoidam, jaki paśpiachova finišavaŭ u zabiehu takoha farmatu.

Paźniej, u žniŭni taho ž hoda, Tiangong Ultra i Tian Yi 2.0 zavajavali 2 załatyja, 6 siarebranych i 2 bronzavyja miedali na Suśvietnych hulniach čałaviekapadobnych robataŭ. Tiangong Ultra taksama pieramoh u finale biehu na 100 mietraŭ u całkam aŭtanomnym režymie z vynikam 21,50 siekundy.

Tian Yi 2.0, jaki taksama pracuje na bazie Huisi Kaiwu, prademanstravaŭ vysoki ŭzrovień univiersalnaha intelektu i aŭtanomnaści, zaniaŭšy pieršaje i druhoje miescy ŭ spabornictvach pa pieramiaščeńni hruzaŭ. Hetyja vyniki padkreślivajuć značeńnie płatformy ŭ zabieśpiačeńni vysokaj pradukcyjnaści i realnych mahčymaściej robatatechničnych sistem.

Pohlad u budučyniu

X-Humanoid pazicyjanuje siabie jak nacyjanalnuju inavacyjnuju płatformu i płanuje dalej raźvivać ekasistemu ŭvasoblenaha intelektu na bazie dvuch klučavych technałahičnych rašeńniaŭ.

Meta kampanii — paskoryć ukaranieńnie navukovych raspracovak u praktyku, pašyryć vykarystańnie čałaviekapadobnych robataŭ i raźvivać supracoŭnictva čałavieka i mašyny ŭ paŭsiadzionnym asiarodździ.

• 0
• 0
• 0
• 0
• 0
• 0
• 0
• 0