Boston Dynamics pačynaje sieryjnuju vytvorčaść robata-humanoida Atlas. Jon pojdzie pracavać na zavody Hyundai
Na vystavie CES 2026 kampanija Boston Dynamics zrabiła histaryčnuju abjavu: znakamity robat Atlas, jaki hadami ździŭlaŭ internet tancami i parkuram, narešcie stanie paŭnavartasnym kamiercyjnym praduktam. Kampanija pačała zborku finalnaj sieryjnaj viersii, pryznačanaj dla realnaj pracy na pradpryjemstvach.
Pra heta paviedamlaje partał Engadget, zaŭvažyŭ telehram-kanał «Bel-Geek.com — Technałohii i Navuka».
Hiendyrektar Boston Dynamics Robiert Płejter nazvaŭ novuju madel «najlepšym robatam, jakoha my kali-niebudź stvarali». Kamiercyjny Atlas sprajektavany dla vykanańnia šyrokaha śpiektra pramysłovych zadač, dzie patrabujecca siła i hnutkaść.
Finalnaja viersija — całkam elektryčnaja, ad hruvastkaj hidraŭliki admovilisia jašče ŭ 2024 hodzie. Charaktarystyki navinki ŭražvajuć: robat moža padymać hruzy vahoj da 50 kh (110 funtaŭ) i maje rabočy dyjapazon ruk da 2,3 mietra (7,5 futaŭ). Jon zdolny pracavać aŭtanomna, pad kiravańniem apieratara abo praz płanšetny interfiejs u dyjapazonie tempieratur ad -20°C da +40°C.
Chto atrymaje robataŭ pieršym?
Pieršym klijentam stanie aŭtamabilny hihant Hyundai, jaki vałodaje kantrolnym pakietam akcyj Boston Dynamics, i łabaratoryja štučnaha intelektu Google DeepMind.
Hyundai płanuje ŭkaranić Atlas na svaich aŭtazavodach u 2028 hodzie. Spačatku robaty zojmucca łahistykaj i paśladoŭnym sartavańniem detalaŭ. Da 2030 hoda im davierać bolš składanyja zadačy, uklučajučy niepasrednuju zborku kampanientaŭ, pracu ź ciažkimi hruzami i manatonnyja apieracyi.
Google DeepMind atrymaje robataŭ dla inšych metaŭ: kampanija budzie intehravać u sistemu Atlas svaje pieradavyja madeli štučnaha intelektu Gemini Robotics, kab zrabić mašynu bolš razumnaj i zdolnaj da navučańnia.
Historyja Atlas pačałasia jašče ŭ 2011 hodzie jak prajekt dla amierykanskaha vajskovaha ahienctva DARPA. Za 15 hadoŭ robat prajšoŭ šlach ad niazhrabnaj łabaratornaj mašyny da sprytnaha elektryčnaha humanoida, hatovaha zamianić čałavieka na niebiaśpiečnych i ciažkich vytvorčaściach.
«Ciapier mnie čužaja sama kancepcyja ŭžyć niešta, čaho ty nie viedaješ». Vialikaja hutarka ź Ivanam Šyłam pra biznes, zarablańnie z dapamohaj ŠI, žančyn i botaks15
Kamientary