Kavaleŭski zajaviŭ, što Cichanoŭskaja zapavolvaje praces vyzvaleńnia palitviaźniaŭ
«Ich pazicyja nie maje ŭpłyvovaha praktyčnaha napaŭnieńnia», — kamientuje jon dziejnaść Cichanoŭskaj.
U intervju Politico Śviatłana Cichanoŭskaja adznačyła, što ciapier Jeŭropa — «kiepski palicejski» ŭ dačynieńni da režymu Łukašenki.
«My prosim Jeŭropu nie kapijavać palityku Trampa, tamu što ŭ nas jość takaja formuła: amierykanskija sankcyi — kab vyzvalać ludziej, jeŭrapiejskija sankcyi — kab vyzvalić krainu», — skazała jana.
Na jaje słovy adreahavaŭ Valer Kavaleŭski, kiraŭnik Ahienctva jeŭraatłantyčnaha supracoŭnictva.
«Śviatłana Cichanoŭskaja sprabuje strymać Jeŭropu ad vykarystańnia sankcyjnych pasłableńniaŭ, jakija mohuć pryvieści da vyzvaleńnia palitviaźniaŭ u Biełarusi i spynieńnia represij», — napisaŭ Valer Kavaleŭski ŭ fejsbuku.
«Pa-pieršaje, heta supiarečyć pryjarytetu vyzvaleńnia palitviaźniaŭ, jaki zajaŭleny jaje strukturami. Ich pazicyja nie maje ŭpłyvovaha praktyčnaha napaŭnieńnia — vyzvaleńni adbyvajucca nasupierak patrabavańniam Cichanoŭskaj ab niepryznańni, praciahu izalacyi, zachavańniu sankcyj. Jość i pastajannyja sproby zapavolić praces humanitarnaj dypłamatyi, kinuć cień sumnievaŭ na jaho vartaść», — ličyć Kavaleŭski, jaki razam z Taćcianaj Chomič i Volhaj Harbunovaj stvaryli kaalicyju za vyzvaleńnie palitviaźniaŭ. Paźniej da jaje dałučyłasia Nastaśsia Kaściuhova.
«Pa-druhoje, Cichanoŭskaja śviadoma zaklikaje Zachad da raskołu ŭ stratehii pa Biełarusi. Taki raskoł zaŭsiody asłablaje ryčahi cisku i pieramoŭnyja pazicyi (lusterkava ad «padzialaj i ŭładar»). Abjadnańnie, naadvarot, takija pazicyi ŭzmacniaje. Mienavita zaraz treba spryjać adnaŭleńniu miechanizmaŭ kaardynacyi i sinchranizacyi padychodaŭ pamiž ZŠA i JEZ, jakija dziejničali ŭ 2020‑2024 hadach. Admietna, što adnačasova Cichanoŭskaja vystupaje suprać padziełaŭ u biełaruskim demruchu.
Treciaje, Cichanoŭskaja pa-raniejšamu nie aceńvaje adekvatna ni źmieny ŭ kantekście, ni pazicyju Zachada, kali zaklikaje da demantažu režymu (dismantling the regime). Zachad šarachajecca ad takich zadač užo daŭno. U Biełarusi — u značnaj stupieni padkantrolnaj Rasii — takaja pierśpiektyva vyhladaje fantazijna», — vykazaŭ svajo mierkavańnie Kavaleŭski.
Ciapier čytajuć
«Vy bačyli špalery ad zabudoŭščyka? Heta ž strašny son». Za što krytykujuć dziaržaŭny ramont u kvaterach dla čarhavikoŭ?1
Kamientary
Chaj dałučajecca da Prakopa i pačynajuć baradźbu z Cichanoŭskaj. )
Z Łukoj nie atrymałasia.