Što pytalisia ŭ svajakoŭ palitviaźniaŭ, jakich masava zatrymlivali ŭčora? I pry čym tut «Jedastaŭka»
Pa ŭsioj Biełarusi 23 studzienia pryjšli ź pieratrusami minimum da 84 čałaviek, heta svajaki palitviaźniaŭ i byłyja palitviaźni. Niekatoryja ź ich zastajucca za kratami, niekatorych vyzvalili. Što źviazvała ŭsich hetych ludziej? Nakolki nam viadoma, bolšaść ź ich atrymlivała dapamohu ad inicyjatyvy IneedHelp.
Hety prajekt dapamahaŭ achviaram palityčnych represij prostym čynam — dla siemjaŭ palitviaźniaŭ, jakija apynulisia ŭ ciažkaj finansavaj situacyi, nieabyjakavyja biełarusy zamaŭlali pradukty. Dla hetaha vykarystoŭvałasia «Jedastaŭka» — papularny servis «Jeŭraopta». Kurjery kampanii razvoziać klijentam zamoŭlenyja tavary. Apłacić zamovu možna pry atrymańni praduktaŭ, a možna i zahadzia, u internecie.
Padčas dopytaŭ u ludziej pieradusim pytalisia, ci atrymlivali jany niešta praz dastaŭku «Jeŭraopta» i chto apłačvaŭ hetyja pradukty. Pra heta «Našaj Nivie» stała viadoma ad niekalkich krynic.
Naturalna, atrymańnie praduktaŭ nie zabaroniena zakanadaŭstvam — niaredkaja situacyja, kali dzieci z-za miažy zamaŭlajuć pradukty stałym baćkam.
Ale tydzień tamu inicyjatyvu IneedHelp pryznali «ekstremisckim farmavańniem». I ciapier ludziam pahražajuć kryminalnymi spravami za «ŭdzieł» u dziejnaści farmavańnia. U zaležnaści ad adkazaŭ na pytańni śpiecsłužbistaŭ niekatorym nibyta prapanujuć pierajści z padazravanych u śviedki. Vidavočcy adznačajuć, što ludziej u KDB zavozili dziasiatkami.
Jak siłaviki mahli vyjści na atrymalnikaŭ dapamohi? Najchutčej, stvaralniki IneedHelp ažyćciaŭlali apłatu ŭ «Jedastaŭcy» svajoj bankaŭskaj kartkaj (adnoj ci niekalkimi). Jana była niebiełaruskaj, tamu apieracyj pa rachunku śpiecsłužbisty ŭbačyć nie mahli.
Ale z techničnaha punkta hledžańnia zusim nieskładana vyličyć tyja sotni ci tysiačy zamovaŭ, zroblenych z adnaho akaŭnta (ci navat niekalkich) i aformlenych pa adrasach pražyvańnia siemjaŭ palitviaźniaŭ.
Heta apieracyja mahła pravodzicca jak praz zapyt u «Jeŭraopt», tak i praz bankaŭskija miechanizmy.
Pavodle statystyki na sajcie IneedHelp, prajekt ahułam sabraŭ $1,55 miljona, była adpraŭlena 15 161 praduktovaja dapamoha.
Historyja ŭ EHU — heta histfak vašaj mary. Jeŭrapiejski dypłom z navučańniem na biełaruskaj movie pry intensiŭnym vyvučeńni anhlijskaj. I poŭnaja svaboda11
Kamientary
Vsie hosudarstviennoje možiet i budiet byť ispolzovano protiv hraždan. Vychod odin - priamyje piersonalnyje kontakty po starinkie. Ili sistiemy, nie kontrolirujemyje hosudarstvom. Po krajniej mierie takim.