U vystupie 9 traŭnia Łukašenka niečakana zhadaŭ pra toje, što abyšoŭ maŭčańniem Miadźviedzieŭ. Piša ŭ svaim błohu Alaksandar Kłaskoŭski.
Za časami SSSR Dzień Pieramohi adznačali na adzin kapył na ŭsim absiahu ad Buhu da Kuryłaŭ. Zaraz usio inačaj. Postsavieckaja prastora vyjaŭlaje nadzvyčajnuju piarestaść i ŭ staŭleńni da hetaj niekali standartyzavanaj kamunistyčnym ahitprapam daty.
Dziaržavy Bałtyi — daŭno adrezanaja łusta. Tam kažuć nia tolki pra nacysckuju, ale i pra savieckuju akupacyju. Maskoŭskaje radyjo "Majak" padkreślivaje: "Dzień Pieramohi siońnia śviatkujuć rasiejskamoŭnyja žychary Łatvii".
Zhadvajučy ŭ tym samym paviedamleńni pra ŭračystaści ŭ Tbilisi, maskoŭskaje radyjo, adnak, abychodzić maŭčańniem toje, što tamtejšyja veterany zładzili akcyju pierad rasiejskaj ambasadaj, pratestujučy suprać palityki Kramla ŭ dačynieńni da Hruzii.
U svaju čarhu, ukrainskija medyi zavastrajuć uvahu na tym, što Julija Cimašenka, adrozna ad Juščanki, praihnaravała šeście veteranaŭ u Kijevie.
Zatoje ŭ Maskvie novaśpiečanyja prezydent i premjer byli jak sijamskija bliźniaty i na paradzie. Uvohule pampeznaść nadzvyčajnaja. Upieršyniu paśla 1990 hodu pa Krasnaj płoščy puścili tanki dy rakietnyja kompleksy, a źvierchu — avijacyju. Tanki byli abutyja ŭ humovyja traki, a vajskoŭcy — apranutyja ŭ formu ad Judaškina. Karaciej, styl "military" znoŭ u modzie. Akryjałaja imperyja demanstruje muskuły — mienavita tak uspryniali hetaje zatratnaje šoŭ na Zachadzie.
Darečy, tam zaŭvažyli: Miadźviedzieŭ u svaim vystupie 9 traŭnia ni słovam nie abmoviŭsia pra ŭkład sajuźnikaŭ.
Na hetym tle niečakana prahučaŭ pasaž z vusnaŭ Łukašenki na płoščy Pieramohi: "My nikoli nie dzialili hetuju pieramohu na svaju i čužuju. I zaŭždy budziem pamiatać dapamohu sajuźnikaŭ — krainaŭ antyhitleraŭskaj kaalicyi, udzielnikaŭ ruchu supracivu. Usich, chto zmahaŭsia z nacyzmam".
Zdavałasia, zaraz budzie zhadana, "chto nas na Elbie abdymaŭ".
Ale da verbalnaha bratańnia z amerykancami nie dajšło. Naadvarot, pramova skiravałasia ŭ tradycyjnaje rečyšča, prahučaŭ standartny nabor tezaŭ pra sučasnyja pahrozy: dyktat z boku asobnych krain, što "ŭjavili siabie zvyšdziaržavami"; aktyŭnaść NATO; elementy amerykanskaj supraćrakietnaj abarony… Praŭda, havaryłasia pra heta bieź impetu, dziažurna. I nie rabiłasia, jak raniej, vysnova, što za naš podźvih Zachad pierad nami viečna na kaleniach stajać musić, a nie vučyć niejkaj tam demakratyi.
Karaciej, adčuvałasia, što tutejšaje kiraŭnictva ŭsio ž, musić, uśviedamlaje, što ŭ stasunkach z Zachadam, i najpierš sa Štatami, apošnim časam i tak užo nałamana zašmat droŭ.
Samo ž śviatkavańnie Dnia Pieramohi ŭ Biełarusi stanovicca bolej ścipłym, asabliva na tle maskoŭskaj pampeznaści. Napiaredadni na ŭračystym schodzie ŭ honar daty znoŭ, jak i letaś, vystupiŭ z dakładam nie prezydent, a Sidorski. Niama i vajskovaha paradu.
Naŭrad ci reč u tym, što stali ekanomić na zapałkach. Najchutčej što zhas impet, bo da sapraŭdnaha pieraasensavańnia Vialikaj Ajčynnaj u prajekcyi na los biełaruskaj nacyi "naviersie" nie hatovyja, a dziaŭbci z hodu ŭ hod adny i tyja ž zašmalcavanyja tezy ŭžo niecikava. Dyj veteranaŭ zaŭvažna mienieje. Jak płast elektaratu jany stračvajuć značeńnie. Łukašenka ž — palityk prahmatyčny. Patetyka na temu toj vajny apošnimi hadami najčaściej zapatrabavanaja padčas enerhietyčnych kanfliktaŭ. "Sumiesnaje hnijeńnie ŭ akopach" stała arhumentam na karyść tannaha hazu.
I ŭžo amal nikomu nie zdajecca cyničnym, što ŭ nadakučlivaj reklamie ("Dziadula, a ty vieryŭ?..") staviacca na adnu roŭnicu Vialikaja Pieramoha i vypadkovy, "chalaŭny" vyjhryš u latarei. Zrešty, ci nie zakanamiernaja heta dehradacyja zaciahanaj kazionnaj rytoryki?
A voś temu pra tych, "chto nas na Elbie abdymaŭ", siońnia, daliboh, varta było b raźvić :) Samy čas zhortvać aperetkavuju "vajnu z Amerykaj".
Ciapier čytajuć
«Ja byŭ suprać, kab mianie mianiali na 20 rasijskich vajskoŭcaŭ. Nie zmoh by hladzieć u vočy ludziam, syny jakich siadziać»: pieršaje intervju eks-mera Chiersona22
Kamientary