Biełarusam u asobnych vypadkach zrobiać pieraraźlik za kamunałku

Dakumientam vyznačajecca paradak pieraraźliku płaty za niekatoryja vidy «kamunałki», kali čałaviek vyjechaŭ ź miesca pražyvańnia abo rehistracyi na termin bolš za 10 sutak zapar. Taksama ŭchvalajecca paradak prypynieńnia (adnaŭleńnia) pasłuh ŽKH žycharam, jakija majuć biez pavažlivych pryčyn zapazyčanaść pa apłacie i nie pahasili jaje va ŭstanoŭlenyja terminy.

U pryvatnaści, kali čałaviek vyjechaŭ z pastajannaha miesca pražyvańnia na termin zvyš 10 sutak zapar, budzie zrobleny pieraraźlik płaty za abychodžańnie ź ćviordymi kamunalnymi adchodami, chałodnaje i haračaje vodazabieśpiačeńnie, vadaadvod (kanalizacyju), hazazabieśpiačeńnie. U tym vypadku, kali ŭ spažyŭcoŭ niama pryboraŭ indyvidualnaha ŭliku raschodu vady i hazu. Pieraraźličvajecca taksama kampiensacyja raschodaŭ na elektryčnuju enierhiju, spažyvany na pracu lifta — ale nie bolš čym za try hady.

Pieraraźlik apłaty robicca na padstavie zajavy žychara i inšych dakumientaŭ, jakija pavinny pradstaŭlacca nie paźniej za 30 kalandarnych dzion z dnia viartańnia čałavieka na miesca pražyvańnia.

Jakija mohuć być padstavy dla pieraraźliku

U liku padstaŭ dla pieraraźliku — vyjezd za miažu, na azdaraŭleńnie i sanatorna-kurortnaje lačeńnie, lačeńnie ŭ balnicy, špitali abo dziaržaŭnym ustanovie achovy zdaroŭja, a taksama časovaje źmiaščeńnie ŭ miescach papiaredniaha ŭtrymańnia i pazbaŭleńnia voli. Da takich vypadkaŭ adnosiacca i prachodžańnie vajskovaj słužby abo słužby ŭ reziervie, prachodžańnie alternatyŭnaj słužby.

Akramia taho, pieraraźlik mohuć zrabić pry vyjeździe ŭ sielskija nasielenyja punkty, sadoŭničyja tavarystvy, dačnyja kaapieratyvy, na vučobu, u słužbovuju kamandziroŭku, pry pražyvańni pa dahavorach najmu žylla, a taksama vyjeździe na siało dla pracy ŭ ahrarnaj haspadarcy i sacyjalnaj śfiery.

Padstavami taksama moža być vyjezd na pracu pa pracoŭnym dahavory (kantrakcie) ŭ arhanizacyi (ustanovy), raźmieščanyja ŭ rajonach, paciarpiełych ad radyjacyjnaha zabrudžvańnia paśla avaryi na ČAES. Idzie taksama razmova pra vyjezd u inšyja nasielenyja punkty dla pracy ŭ jakaści baćkoŭ-vychavaŭcaŭ u dziciačych damach siamiejnaha typu, dla dohladu za invalidam I hrupy abo asobaj, jakaja dasiahnuła 80-hadovaha ŭzrostu, jakoj patrebna pastajannaja dapamoha.

Pry hetym dla pieraraźliku ŭ kožnym vypadku treba budzie pradstavić paćviardžajučyja dakumienty. Kali čałaviek vyjechaŭ za miežy krainy z 1 sakavika 2022 hoda na termin zvyš 30 dzion zapar, apłata za asobnyja vidy pasłuh ŽKH nie pieraraźličvajecca. Idzie havorka pra pieryjad, kali vyjechajeŭšyja byli ŭklučanyja ŭ śpis nie zaniatych u ekanomicy pracazdolnych hramadzian, jakija apłačvajuć kamunałku ŭ poŭnym abjomie. Heta tyčycca i vyjechaŭšych ź Biełarusi pracazdolnych hramadzian, nie zaniatych u ekanomicy.

• 0
• 0
• 0
• 0
• 0
• 0
• 0
• 0