Prapahandyst Račyłoŭski bolš nie vykładaje ŭ minskaj himnazii. Kudy jon prytknuŭsia ciapier?
Małady i adyjozny prapahandyst Mikita Račyłoŭski nastolki demanstravaŭ svaju addanaść režymu, što navat trapiŭ pad jeŭrapiejskija sankcyi. Dva hady jon pracavaŭ nastaŭnikam u minskaj himnazii №13, ale ciapier zvolniŭsia.
Zorka Mikity Račyłoŭskaha zaźziała na niebaschile biełaruskaj prapahandy ŭ 2022 hodzie. Tady 25-hadovaha chłopca pryznačyli kiraŭnikom Moładzievaha parłamienta — jon navat atrymaŭ čyrvona-zialony bukiet z ruk Natalli Kačanavaj. Tady ž Mikita staŭ kiravać moładzievym hramadskim abjadnańniem «Ruch napierad».
U 2023 hodzie Mikita jak kiraŭnik Moładzievaha parłamienta kataŭsia ŭ «DNR» i chvaliŭsia tym, što zaklučyŭ damovu ab supracoŭnictvie z tamtejšym Moładzievym parłamientam.
U tym ža 2023 hodzie Račyłoŭski staŭ častym hościem tok-šou na biełaruskim telebačańni. Ad imia biełaruskaj moładzi jon asudžaŭ «nacyjanał-zdradnikaŭ». Jamu davieryli vieści prahramu «Sienat» na STB i brać intervju ŭ deputataŭ.
Chłopiec navat abiacaŭ pamierci za Łukašenku.
Letaś u žniŭni Račyłoŭski trapiŭ pad sankcyi Jeŭrasajuza. Ale dalej karjera zabuksavała. U kastryčniku jaho zamianili ŭ Moładzievym parłamiencie na Alinu Raćkovu. Na STB Račyłoŭskaha taksama apošni raz zhadvali ŭ žniŭni 2024 hoda. Na «RTR-Biełaruś» jaho praciahvali kali-niekali klikać — naprykład, kab pachvalić subotniki.
Zatoje chłopiec zhaniaŭ na Suśvietny kanhres antyfašysckaj moładzi i studentaŭ u Vieniesuele, dzie nasiŭ mierč z kramy Łukašenki.
Mikita zastavaŭsia kiraŭnikom taho samaha «Ruchu napierad» (abjadnańnie ładziła prapahandysckija prajekty kštałtu «Pakaleńnie Pieršaha», pryśviečanaha čarhovym vybaram) i byŭ nastaŭnikam u staličnaj himnazii №13. Davieryli jamu vieści pradmiet «Mastactva (ajčynnaja i suśvietnaja mastackaja kultura)».
Ciapier Račyłoŭski abvieściŭ, što dva tydni tamu zvolniŭsia z himnazii.
Miarkujučy pa jaho instahramie, Račyłoŭski pasiabravaŭ z byłym paralimpijcam, a ciapier hramadskim dziejačam Alaksiejem Tałajem. Z fondam Tałaja Račyłoŭski jak kiraŭnik «Ruchu napierad» padpisaŭ damovu ab supracoŭnictvie.
Alaksiej Tałaj nazyvaje Mikitu nie tolki svaim siabram, ale i «adnym z najbolš pierśpiektyŭnych budučych kiraŭnikoŭ».
Apošnim časam Račyłoŭski aktyŭna pijaryć mierapryjemstvy z udziełam Tałaja i dziejnaść jaho dabračynnaha fondu. Naprykład, raspaviadaje pra matyvacyjnuju sustreču Alaksieja z rasijskimi vajskoŭcami, jakim paśla vajny amputavali niekatoryja častki cieła. U cheštehach Račyłoŭski paznačyŭ #SVA i #Z.
Abjadnoŭvaje mužčyn nie tolki toje, što jany abodva pad sankcyjami Jeŭrasajuza, ale i znachodžańnie va ŭkrainskaj bazie «Miratvorac».
Užo dva tydni Mikita Račyłoŭski aficyjna pracuje namieśnikam pa raźvićci mižnarodnych adnosin i prajektnaj dziejnaści dabračynnaha fondu imia Alaksieja Tałaja.
Kaža, što ŭ asnoŭnym budzie zajmacca dvuma asnoŭnymi kirunkami: stvareńnie reabilitacyjnaha centra dla dziaciej, a taksama realizacyja prajekta «Žyvaja pamiać udziačnych pakaleńniaŭ» na terytoryi Rasii.
«Pamierci za Łukašenku». Chto taki Mikita Račyłoŭski, novy tvar prapahandy
Fond Tałaja znoŭ pieradaŭ humanitarnuju dapamohu na akupavanyja terytoryi Ukrainy
«Pieravychoŭvajuć i militaryzujuć». Dla suda ŭ Haazie padrychtavali dakład pra toje, chto i jak vyvozić ukrainskich dziaciej u Biełaruś
Alaksiej Tałaj raźvioŭsia z druhoj žonkaj
Ciapier čytajuć
«Dzied budzie hladzieć asabista. Kali jamu spadabajecca…» Ziankovič raskazaŭ, jak ź im zapisvali pieršaje intervju ŭ SIZA KDB4
Kamientary