«Jaje dziejańni inśpiravanyja śpiecsłužbami». Pavieł Łatuška daŭ žyvy efir i adkazaŭ na abvinavačvańni Volhi Karpušonak u damahańniach

Łatuška adznačyŭ, što jašče 14 traŭnia hetaha hoda ŭ efiry na «Jeŭraradyjo», na fonie źniknieńnia Anžaliki Mielnikavaj, jon papiaredžvaŭ, što ŭ dačynieńni da jaho i kaleh śpiecsłužbami Biełarusi «rychtujecca śpiecapieracyja, nakiravanaja na dyskredytacyju, na fizičnaje ŭździejańnie, šantaž», i voś ciapier jana praciahvajecca.

Taksama jon nahadaŭ, što na pres-kanfierencyi 31 lipienia jon i śpikier Kaardynacyjnaj Rady Arciom Bruchan pradstavili skrynšoty paviedamleńniaŭ u miesiendžarach i elektronnych listoŭ, jakija pastupali na adras ich kalehaŭ i byli nakiravanyja na toje, kab «zavierbavać jak minimum siem čałaviek kamandy Narodnaha antykryzisnaha ŭpraŭleńnia, ździajśniać inšyja supraćpraŭnyja dziejańni na terytoryi Polščy».

Palityk taksama źviazaŭ abvinavačvańni z raniej apublikavanaj infarmacyjaj:

«Była publikacyja 22 červienia na telehram-kanale viadomaha prapahandysta režymu Łukašenki Ihara Tura pra toje, što bližej da kanca siezona «šykoŭny kampramat źlijuć na Łatušku». I jak raz my bačym hetuju publikacyju, jakaja źjaviłasia siońnia».

Łatuška kateharyčna adchiliŭ usie abvinavačvańni Karpušonak:

«U paście, jaki apublikavała Volha Karpušonak na svajoj staroncy ŭ Facebook, niama nivodnaha słova, nivodnaha faktu praŭdy. Usio heta chłuśnia i paklop. Ja pierakanany, i ŭ mianie ŭ hetym niama ni najmienšaha sumnievu, ni doli pracenta, što jaje dziejańni inśpiravanyja śpiecsłužbami režymu Łukašenki. I ja pasprabuju dakazać heta».

Praca ŭ NAU

«Pa-pieršaje. Volha Karpušonak nie była inicyjatyŭna zaprošanaja ŭ kamandu Narodnaha antykryzisnaha ŭpraŭleńnia. Takoj inicyjatyvy z majho boku nie było. I nie było z boku členaŭ kamandy Narodnaha antykryzisnaha ŭpraŭleńnia. Dokazam taho, što jana chłusić z nahody svajho pracaŭładkavańnia, źjaŭlajecca toj fakt, što siońnia ranicaj jana vydaliła ŭvieś čat sa mnoj i z [maim namieśnikam] Arciomam Praskałovičam, kab my nie mahli prosta pakazać i dakazać heta na padstavie pierapiski.

Pa-druhoje. Jana pracavała ŭ jakaści vałanciorki, nie była pracaŭładkavanaja ŭ kamandzie Narodnaha antykryzisnaha ŭpraŭleńnia. Nijakich kantraktaŭ ź joj nichto nie padpisvaŭ. Nijakich pracoŭnych adnosin ź joj nie było. Vy vydatna viedajecie, što vialikaja kolkaść zvarotaŭ z boku biełarusaŭ nakiroŭvajecca nam z prośbaj akazać sadziejničańnie ŭ pytańniach znachodžańnia, lehalizacyi na terytoryi tych krain, dzie jany znachodziacca. Heta vielizarniejšy abjom pracy… U nas prosta nie chapaje ruk zajmacca, tamu heta ŭsio — vałanciorstva. Hetak ža, jak i Kabiniet — vałanciorstva, i praca ŭ Kaardynacyjnaj radzie».

Sustreča ŭ restaranie

«Jana śćviardžaje, što była niejkaja sustreča sa mnoj u restaranie. Nu, ja chacieŭ by prosta spytać u jaje, niachaj jana skaža, u jakim restaranie i jakoha čysła. Pry mnie 24/7 znachodzicca admysłovaja pryłada, jakaja fiksuje kožnyja 30 siekundaŭ majo miescaznachodžańnie […]

Kožnyja 30 siekundaŭ idzie paviedamleńnie ŭ pravaachoŭnyja orhany Polščy, jakija zajmajucca harantavańniem biaśpieki, pra toje, dzie ja znachodžusia. Až da mietra łakalizacyi. Kali jana śćviardžaje heta, niachaj skaža, jaki restaran, jaki dzień. Heta vielmi lohka pravieryć».

Asobna Łatuška spyniŭsia na detalach pra ałkahol:

«Jana śćviardžaje, što ŭ restaranie byli aficyjanty, jakija mianie viedali, i navat viedajuć, jakomu vinu ja addaju pieravahu. Usim vydatna viadoma, što ja ŭžo praktyčna kala vaśmi hadoŭ nie ŭžyvaju ałkahol. Tamu nijakich aficyjantaŭ u pryrodzie […] być nie moža. Tym bolš tych, chto «viedaje maje vinnyja pieravahi».

Palihraf i padazreńni

Pa słovach Łatuški, u NAU «na peŭnym etapie» znachodžańnia Volhi ŭ kamandzie vałancioraŭ uźnikli padazreńni adnosna mahčymaha supracoŭnictva Karpušonak sa śpiecsłužbami Biełarusi. 15 krasavika adbyłasia sustreča z udziełam śpikiera KR Arcioma Bruchana i namieśnika Łatuški Arcioma Praskałoviča, dzie joj prapanavali prajści palihraf.

«Jany prapanavali joj prajści palihraf. Praz tydzień jana pakinuła našu kamandu. Jana prosta pajšła. Takim čynam prademanstravaŭšy, što jana nie hatovaja prajści palihraf».

Akramia taho, Łatuška zajaviŭ, što ad biełaruskich dobraachvotnikaŭ, jakija vajujuć va Ukrainie, pastupiła infarmacyja pra toje, što Karpušonak padčas pražyvańnia va Ukrainie (da pierajezdu ŭ Polšču) prachodziła palihraf u SBU (Słužbie biaśpieki Ukrainy) — i nie prajšła.

«U SBU dali adkaz, što jana pracuje na KDB, i departavali. Jana źbirała infarmacyju pra padraździaleńnie «Teror» […] Ciapier jana ŭ Polščy. I ja tak zrazumieŭ, KDB praź jaje sprabuje złamać našu biełaruskuju dyjasparu tam. Hetuju madam treba terminova zatrymać, albo jana źjedzie ŭ Biełaruś z usimi źviestkami, jakija naźbirała», — začytaŭ Łatuška paviedamleńnie ad kahości z dobraachvotnikaŭ, nie nazvaŭšy krynicu.

Akramia taho, sa słoŭ Łatuški, siastra Karpušonak pracuje niejkaj načalnicaj u Dziaržaŭnym mytnym kamitecie Biełarusi.

Pa słovach palityka, Karpušonak ciapier nie znachodzicca ŭ Polščy.

«Jana, pavodle našych źviestak, znachodzicca ŭ Ispanii. I toje videa, jakoje jana zapisała i apublikavała tolki dla svaich siabroŭ, — heta videa zapisana ŭ Ispanii (havorka pra videazvarot, jaki Volha zhadała ŭ svaim paście z abvinavačvańniami, ale jaho niama ŭ adkrytym dostupie. — Zaŭv. red.). Jana pakinuła terytoryju Polščy».

Pravavyja dziejańni

«Što tyčycca majho adkazu Volzie [ … ] Jana piša ŭ fejsbuku i jana publikuje hetaje videa, što jana advakatka, i jana nie viedaje, što rabić. Jana jurystka. Ja taksama juryst. Ja adkažu ź jurydyčnaha punktu hledžańnia. Toj čałaviek, jaki źjaŭlajecca advakatam […] vydatna viedaje, što treba zrabić.

Treba prosta padać zajavu ŭ prakuraturu, u palicyju, i nastojvać na praviadzieńni rasśledavańnia. I heta vydatna viedaje luby advakat. Volha Karpušonak hetaha nie zrabiła. I voś vam, kali łaska, adkaz».

Łatuška paabiacaŭ abaraniać svaju reputacyju ŭ sudzie:

«U mianie jość dva varyjanty dziejańniaŭ. Pieršaje: padača zajavy ŭ prakuraturu ab ździajśnieńni ŭ dačynieńni da mianie złačynstva, jakoje prajaviłasia ŭ paklopie, heta značyć raspaŭsiudzie chłuślivaj infarmacyi, absalutna va ŭsim, na 100% nie adpaviednaj rečaisnaści. Druhi varyjant dziejańniaŭ […] — heta padača pazovu, hramadzianskaha pazovu, ab abaronie majho honaru, hodnaści i dziełavoj reputacyi jak hramadskaj piersony, jak palityka».

Pra «asabistaje žyćcio»

Pa sutnaści zajaŭ Volhi Karpušonak pra toje, što Łatuška sprabavaŭ schilić jaje da intymnych adnosin i mieŭ niekalki paluboŭnic, jon dadaŭ, što nijakich padobnych adnosin u jaho ciapier niama.

«U mianie niama asabistaha žyćcia.

Kali ty znachodzišsia pad piermanientnaj pahrozaj, kali ty atrymaŭ bolš za 150 pahroz fizičnaj likvidacyi, kali tabie pišuć, što tvaju hałavu raśsiakuć ledarubam na bierazie Visły […] kali zdymajucca filmy pra vykradańnie z terytoryi Polščy, pra toje, što mianie vyvoziać u bahažniku.

Kali ździajśniajucca realnyja dziejańni. Ja byŭ prainfarmavany śpiecsłužbami, što była dvojčy likvidavanaja pahroza majoj fizičnaj likvidacyi.

Kali ty viedaješ pra toje, što da ciabie ŭ ofis prychodziŭ Pabła Hansales, Pavieł Rubcoŭ, pałkoŭnik Hałoŭnaha ŭpraŭleńnia vajskovaj raźviedki Ministerstva abarony Rasii, nibyta dla taho, kab brać intervju […] A paśla ty bačyš, što kala trapa samalota jamu asabista paciskaje ruku Pucin, kali jaho ŭ ramkach abmienu pamiž Vašynhtonam i Maskvoj pieradajuć u Maskvu.

Kali ty viedaješ pra toje, što […] na pavierch nižej, litaralna dzie ja zaraz viadu hety strym, praktyčna miesiac prychodzili dva aficery Hałoŭnaha raźviedvalnaha ŭpraŭleńnia Ministerstva abarony Biełarusi i sprabavali ŭvajści ŭ kamunikacyju z supracoŭnikami Narodnaha antykryzisnaha ŭpraŭleńnia.

Kali robicca sproba fejkavych žurnalistaŭ rasijskaha libieralnaha vydańnia [ … ] jany sprabavali ŭziać intervju ŭ Śviatłany Cichanoŭskaj, a taksama zachodzili da mianie.

Kali ty bačyš, što heta absalutna realnyja dziejańni, i na niejkim etapie ŭ ciabie jość adčuvańnie, što chtości ŭ pryceł hladzić u tvaju patylicu. Psichałahična heta składana. Ja nie budu chavać, psichałahična heta ciśnie».

«Adkrytaja vajna suprać apazicyi»

«Toje, što było zroblena siońnia, heta prosta tanny truk», — reziumavaŭ palityk.

Łatuška nazvaŭ toje, što adbyvajecca, častkaj bolš šyrokaj kampanii ŭładaŭ i śpiecsłužbaŭ Biełarusi suprać apazicyi:

«Navošta heta robicca? [ … ] Hałoŭnaje — «zamačyć» Łatušku, dyskredytavać, prybrać mianie z publičnaha pola, kab ja nie moh być tym čałaviekam, jaki nadalej artykuluje pierad zachodnimi partniorami važnaść nie adychodzić ad biełaruskaha paradku dnia, važnaść kryminalnaha pieraśledu mižnarodnaha złačynca Łukašenki, kab była raspačataja sprava ŭ ramkach ofisa prakurora Mižnarodnaha kryminalnaha suda i byŭ vydadzieny ordar na aryšt Łukašenki.

Druhaja meta — dyskredytavać našu kamandu, nanieści ŭdar u Narodnaje antykryzisnaje ŭpraŭleńnie, inicyjatyvu, jakaja… nie addaje paradak dnia ŭ ruki tych, chto chacieŭ by stać na kaleni, paprasić u Łukašenki prabačeńnia i pakajacca.

Heta ŭdar i ŭ našu delehacyju ŭ Kaardynacyjnaj radzie, a takim čynam i ŭ Kaardynacyjnuju radu. Volha Karpušonak była abranaja čalcom delehacyi Parłamienckaj asamblei Rady Jeŭropy ad Kaardynacyjnaj rady zamiest Anžaliki Mielnikavaj, jakaja źnikła (my dahetul nie majem nijakaj infarmacyi. Kožny raz, kali ja sustrakajusia z pravaachoŭnymi orhanami Polščy, jakija viaduć rasśledavańnie, ja zadaju hetaje pytańnie. Na žal, navin tut niama).

Dyk voś, heta ŭdar dla taho, kab dyskredytavać našu delehacyju ŭ Parłamienckaj asamblei Rady Jeŭropy. Dla čaho? Tamu što Kaardynacyjnaja rada pryznanaja Parłamienckaj asamblejaj Rady Jeŭropy. I ciapier jany (śpiecsłužby Biełarusi. — Zaŭv. red.) chočuć pryvieści da taho, kab hety status byŭ stračany.

Heta adkrytaja i abvieščanaja vajna suprać mianie, suprać členaŭ našaj kamandy, Narodnaha antykryzisnaha ŭpraŭleńnia [ … ] My znachodzimsia na vajnie. Za hetym staić vielizarny resurs: finansavy, materyjalny, arhanizacyjny, čałaviečy, jaki vykarystoŭvaje režym Łukašenki. Što heta adkrytaja vajna, paćviardžaje sam načalnik śledčaha ŭpraŭleńnia KDB Biełarusi Byčak, jaki publična zajaviŭ pra toje, što ŭsie, chto znachodzicca za miažoj, buduć dastaŭlenyja ŭ Biełaruś.

Darečy, učora ja atrymaŭ mienavita hetaha źmiestu pahrozy z taho kanała kamunikacyi, jaki papiaredžvaŭ mianie pra napad u Varšaŭskim univiersitecie. Ja atrymaŭ ad hetaha adrasata list u 16:00, i [nazaŭtra] u 12:45 adbyŭsia napad u Varšaŭskim univiersitecie. Hety ž adras vykarystoŭvaŭsia dla taho, kab papiaredžvać pra fejkavy film, jaki byŭ padrychtavany ŭ adnosinach da Śviatłany Cichanoŭskaj i mianie.

Vy viedajecie hetuju historyju ź nibyta płanavanym padpałam […] što ja rychtavaŭ piać scenaryjaŭ, jak źniščyć lidaraŭ biełaruskaj apazicyi. Čamu ŭ toj momant ja nie byŭ zatrymany razam z hrupaj zmoŭščykaŭ, jak śćviardžajuć u hetym prapahandysckim filmie? […] Usio heta — fejkavyja historyi, nakiravanyja na dyskredytacyju, jakija pad saboj nie majuć nivodnaha faktu, nivodnaha dokazu».

U kancy Łatuška skazaŭ, što, jak daviedaŭsia ad «zachodnich partnioraŭ», padčas «adnoj z apošnich kamunikacyj» ź imi Łukašenka zhadaŭ jahonaje proźvišča šeść razoŭ u jakaści piersanalnaha voraha.

«Ja razumieju, što jon nie spynicca. Nu, i ja nie spyniusia. Nie atrymajecca! Nie atrymajecca ŭ ciabie mianie źbić z noh. Nie atrymajecca zakryć mnie rot. Nie atrymajecca spynić dziejnaść Narodnaha antykryzisnaha ŭpraŭleńnia. My budziem damahacca kryminalnaj adkaznaści. Ty paniasieš mienavita hetuju adkaznaść za ŭsie złačynstvy, jakija ŭčyniŭ u dačynieńni da biełaruskaha naroda i ŭ dačynieńni da Ukrainy. Ty budzieš za heta adkazvać».

Pierad hetym 30 žniŭnia siabra Kaardynacyjnaj rady i byłaja advakatka Volha Karpušonak apublikavała ŭ fejsbuku abvinavačvańni suprać kiraŭnika Narodnaha antykryzisnaha ŭpraŭleńnia (NAU) Paŭła Łatuški. U paście, jaki jana nazvała «spoviedź ab mužčynskaj žorstkaści siarod svaich», žančyna abvinavaciła palityka ŭ seksualnych damahańniach i pahrozach.

Pa słovach Karpušonak, u 2024 hodzie jana była vymušanaja pakinuć Ukrainu praź cisk SBU. U hety momant Łatuška asabista i praz kalehaŭ nibyta zaprasiŭ jaje na pracu ŭ NAU ŭ Polšču, paabiacaŭšy «pratekcyju, hrošy i spakoj». Karpušonak śćviardžaje, što praktyčna adrazu paśla pierajezdu Łatuška zaprasiŭ jaje ŭ restaran u centry Varšavy, dzie kazaŭ pra žadańnie bačyć pobač «razumnuju pryvabnuju dziaŭčynu, hodnuju ŭ budučyni stać «pieršaj łedzi».

Kali žančyna vykazała niezadavolenaść paŭtornym zaprašeńniem u restaran, palityk, ź jaje słoŭ, staŭ damahacca, a paśla admovy pahražaŭ «prablemami ŭ Polščy», abiacajučy «raskazać pra jaje takoje», što jaje «albo pasadziać u turmu, albo vypravadziać u Biełaruś».

Volha Karpušonak raniej pracavała advakatam u biuro «Masłaŭ, Hašynski i partniory» i abaraniała ŭ sudach palitviaźniaŭ, u tym liku žurnalista Andreja Alaksandrava.

U žniŭni 2021 hoda Volha na aficyjnych staronkach biełaruskaj Respublikanskaj kalehii advakataŭ vystupiła z asudžeńniem kalehaŭ, jakija «palityzujuć» abaronu klijentaŭ i imknucca «vyłučycca» za košt palityčnaha paradku dnia. Havorka pra advakataŭ, jakija abaraniali abvinavačanych pa palityčnych spravach i nie bajalisia vykazvacca pra toje, što ŭłady parušajuć zakon.

«U apošni hod žyćcio ŭ krainie adčuvalna palityzavałasia, i niekatoryja advakaty stali stavić pad sumnieŭ pryncyp «advakaty pa-za palitykaj». Stała modna krytykavać dziaržaŭnyja orhany ŭ cełym. Čaściakom takaja krytyka nosić ahulny i biazdokazny charaktar, što ŭ prafiesijnaj dziejnaści advakata niedapuščalna», — havaryłasia ŭ zvarocie Karpušonak.

Heta nie dapamahło joj paźbiehnuć tych ža prablem, ź jakimi sutyknulisia «advakaty ŭ palitycy». Nieŭzabavie Ministerstva justycyi pazbaviła jaje licenzii nibyta praz «niedastatkovuju kvalifikacyju». Takija atestacyi časta vykarystoŭvalisia dla cisku na advakataŭ, jakija abaraniali fihurantaŭ palityčnych spraŭ.

• 14
• 2
• 2
• 1
• 0
• 0
• 1
• 0