Kiemlivy biełarus, jaki 23 hady pražyŭ u Čechii nielehalna, uspomniŭ pra svaju palityčnuju aktyŭnaść, kali jaho spyniła palicyja

Krajavy sud va Uści-nad-Łabam (filijał u Libiercy) admoviŭ hramadzianinu Biełarusi ŭ mižnarodnaj abaronie, paličyŭšy, što toj «pierabolšvaje značnaść svajoj asoby» dla biełaruskich uładaŭ, a sapraŭdny matyŭ zajavy — lehalizavać znachodžańnie ŭ Čechii. Rašeńnie było vyniesiena 18 lipienia 2025 hoda, i ŭstupiła ŭ siłu. Imia zajaŭnika ŭ apublikavanym tekście nie ŭkazvajecca.

Mužčyna pryjechaŭ aŭtobusam ź Minska ŭ Prahu ŭviesnu 2001 hoda i z taho času Čechiju nie pakidaŭ. Bolš za dva dziesiacihodździ jon žyŭ u krainie nielehalna.

Upieršyniu pa prytułak biełarus źviartaŭsia jašče ŭ 2003‑m — tady jamu admovili. Novuju zajavu jon padaŭ tolki ŭ červieni 2024 hoda — paśla taho, jak jaho spyniła palicyja i zahadała vyjechać z krainy. U listapadzie 2024‑ha jon ažaniŭsia z hramadziankaj Čechii, uziaŭ jaje proźvišča, a praz dva tydni padaŭ dakumienty na dazvoł na žycharstva jak člen siamji češskaha hramadzianina.

Kab dakazać, što na radzimie jamu pahražaje pieraśled, zajaŭnik pradstaviŭ nastupnuju palityčnuju bijahrafiju.

U 2017—2018 hadach jon sačyŭ za błoham Siarhieja Cichanoŭskaha. Telefanavaŭ baćkam u Biełaruś i ŭhavorvaŭ ich hałasavać za apazicyju — spačatku za Cichanoŭskaha, potym za Śviatłanu Cichanoŭskuju. Padčas razmoŭ «abhavorvaŭ» Łukašenku, a paśla pačatku vaj­ny va Ukrainie pierakonvaŭ rodnych, što NATA lepšaje za Biełaruś, i tłumačyŭ im upłyŭ prapahandy. Śćviardžaŭ taksama, što pierakonvaŭ «niekalkich ludziej», što Łukašenka — zabojca i złačynca, i «padtrymlivaŭ apazicyjnyja błohi», pavyšajučy im kolkaść prahladaŭ.

Pahrozu jon źviazvaŭ z tym, što ŭsie zamiežnyja zvanki prasłuchoŭvajucca: maŭlaŭ, padčas razmoŭ čuŭ «pstrykańnie i recha», a baćki skazali, što pra palityku pa telefonie bolš havaryć nie mohuć. Adsiul jon rabiŭ vysnovu, što pa viartańni jaho zatrymajuć i siłaj vybjuć pryznańnie, a sam fakt zajavy pra prytułak u Biełarusi pryraŭniajuć da paklopu na dziaržavu abo dziaržzdrady.

U dadatkovym apytańni mužčyna pryznaŭ, što ŭ apošnija hady palityčna aktyŭny nie byŭ i ŭ demanstracyjach — u tym liku ŭ pratestach 2020 hoda — nie ŭdzielničaŭ: nie chacieŭ ryzykavać, nie mieŭ ni hrošaj, ni dakumientaŭ.

Dźvie staryja kryminalnyja spravy zajaŭnik taksama pasprabavaŭ padać jak palityčny pieraśled. Adna — umoŭny prysud 1992 hoda za dapamohu ŭ kradziažy. Druhaja — sprava pra DTZ (jon davieryŭ kiravańnie čałavieku biez pravoŭ), jakuju spynili ŭ 2011 hodzie za daŭnaściu.

Sud pahadziŭsia z MUS, jakoje admoviła zajaŭniku ŭ studzieni 2025 hoda. U rašeńni pryznajecca, što Biełaruś zastajecca represiŭnaj dziaržavaj u dačynieńni da realnych apanientaŭ režymu, adnak sam zajaŭnik da hetaj katehoryi nie naležyć.

Prasłuchoŭvańnie jaho razmoŭ sud paličyŭ małavierahodnym: dla biełaruskich orhanaŭ heta «maksimum hramadzianin, jaki dziesiacihodździami znachodzicca za miažoj i pra jakoha viadoma niašmat», a mahčymaści śpiecsłužbaŭ vieści nahlad nie biaźmiežnyja.

Viersiju pra toje, što palicyja nibyta šukała jaho ŭ domie baćkoŭ, sud nazvaŭ nadumanaj: šukać čałavieka, jakoha dvaccać hadoŭ niama ŭ krainie, nie było pryčyny — tym bolš kali b ułady sapraŭdy prasłuchoŭvali jaho zvanki i viedali, što jon telefanuje z-za miažy.

Sapraŭdnaja meta zajavy, zaklučyŭ sud, — lehalizavać znachodžańnie ŭ Čechii, dzie ŭ mužčyny ciapier jość žonka; dla hetaha isnuje zakon ab znachodžańni zamiežnikaŭ, a nie instytut palityčnaha prytułku. Zajavu adchilili jak nieabhruntavanuju.

• 4
• 1
• 13
• 4
• 0
• 0
• 0
• 0