Pamierła Luboŭ Sankievič z Babrujska. Jana publična prasiła prabačeńnia za toje, što ŭ 1994‑m hałasavała za Łukašenku
Pra śmierć žančyny stała viadoma ź jaje sacyjalnych sietak. Žančynu pachavali 27 maja.
Luboŭ Sankievič stała viadomaj jašče ŭ 2003 hodzie, kali trymała haładoŭku pratestu suprać zvalnieńnia z pracy. Našmat paźniej, 22 červienia 2017 hoda Biełaruś ubačyła jaje ŭ intervju na pikiecie salidarnaści ŭ Minsku, dzie jana publična paprasiła prabačeńnia za toje, što ŭ 1994 hodzie hałasavała za Alaksandra Łukašenku, piša Radyjo Svaboda.
Pa viartańni ŭ rodny Babrujsk na vakzale piensijanierku zatrymali milicyjanty i pavieźli va ŭpravu składać pratakoły. Tam spadaryni Sankievič stała drenna, jana vyklikała chutkuju dapamohu i trapiła ŭ balnicu, ź jakoj vyjšła paźniej.
Luboŭ Sankievič rasčaravałasia ŭ Łukašenku tamu, što jaho słovy nijak nie adpaviadali dziejańniam. Buchhałtarka pa prafiesii, jana bačyła nieadpaviednaści ŭ ličbach, ekanamičnych pakazčykach, na što i źviartała ŭvahu hramadstva.
«Kali b nie karupcyja, jakuju raźvioŭ Łukašenka vakoł siabie, my žyli b jak u Jeŭropie. Hrašovyja ŭkłady nie viarnuŭ, kvateru, jakuju ja atrymała jašče ŭ SSSR, davodzicca vykuplać», — havaryła jana «Svabodzie» ŭ 2017 hodzie.
Žančyna vyjšła na piensiju ŭ Babrujsku, dzie pracavała buchhałtarkaj na zavodzie traktarnych detalaŭ i ahrehataŭ. U 2003 hodzie jaje zvolnili z pracy, i jana pačała sudzicca, bo ličyła pastanovu ab zvalnieńni niezakonnaj.
Sankievič kazała, što kiraŭnictva zvolniła jaje za toje, što jana sprabavała vykryć fakty raskradańnia majomaści i roznych złoŭžyvańniaŭ na pradpryjemstvie. A zatym abviaściła haładoŭku, zajaviŭšy pra falsifikacyju svajoj sudovaj spravy. Jana śćviardžała, što Ministerstva justycyi, kudy jana skardziłasia, navat nie zapatrabavała z Babrujska ŭsich patrebnych dakumientaŭ, kab sapraŭdy razabracca.
Syn Lubovi Sankievič chadziŭ u adzin kłas z synam byłoj kiraŭnicy CVK Lidzii Jarmošynaj, ale taja adnojčy admoviła joj u jurydyčnaj dapamozie.
Luboŭ Sankievič raskazvała pra vypadki chabarnictva ŭ rodnym horadzie, była jana aktyŭnaj i palityčnaj — pracavała naziralnicaj na vybarach, havoračy pra padtasoŭki i falsifikacyju vynikaŭ. Uvachodziła ŭ «Hramadzianskuju inicyjatyvu suprać biezzakońnia ŭ sudach i prakuratury», ładziła pikiety jak u Babrujsku, tak i ŭ Minsku. Nieadnojčy traplała za heta ŭ sud, dzie ŭłady pryznačali joj štrafy.
Ciapier čytajuć
U dzień pačatku Pieciarburhskaha ekanamičnaha forumu USU nanieśli dziasiatak udaraŭ pa naftavym terminale ŭ porcie horada i bazie Bałtfłota ŭ Kranštacie13
Kamientary