U Rasii pačali rychtavać nasielnictva da pryznańnia niemahčymaści pieramohi nad Ukrainaj

U Rasii jak u žoŭtych, tak i ŭ «ekśpiertnych» vydańniach apošnim časam źjavilisia publikacyi, dzie publiku padvodziać da dumki, što ciapierašni tupik u «SVA» ŭžo možna ličyć pieramohaj u vajnie z Ukrainaj. I što navat paražeńnie budzie Rasii na karyść, piša The Moscow Times.

A apošnija hučnyja pahrozy — jak ahresiŭnaja rytoryka z zaklikam da zachodnich ambasad pakinuć Kijeŭ, tak i ŭsio bolš masavanyja i žorstkija rakietna-dronavyja ŭdary pa ŭkrainskich haradach — mohuć być sprobaj viarnuć Vašynhton i Kijeŭ da pieramoŭ, piša The Washington Post sa spasyłkaj na jeŭrapiejskich čynoŭnikaŭ i analitykaŭ.

Navat prafiesar rasijskaj VNU, blizki da kiraŭnictva MZS (tak zachodnija žurnalisty zvyčajna nazyvajuć krynicy ŭ MDIMA, jaki kansultuje dypłamataŭ), skazaŭ WaPo, što apošnija rasijskija pahrozy i bambavańni źjaŭlajucca reakcyjaj na «pašyreńnie hieahrafii ŭdaraŭ ukrainskich dronaŭ i rakiet» i na zapavoleńnie tempaŭ prasoŭvańnia na froncie.

Pucin, vidać, usio jašče ličyć, što moža zachapić astatniuju častku Danbasa «na praciahu niekalkich miesiacaŭ» i ŭžo z ulikam hetaha adnavić pieramovy pra spynieńnie kanfliktu, skazaŭ jon. Ale dadaŭ pra situacyju na froncie: «My hetaha nie bačym. Maj zakančvajecca, i jasna, što, kali nie buduć zrobleny dadatkovyja namahańni, to havaryć možna tolki pra stahnacyju».

Blizkija da Kramla ekśpierty stali padvodzić publiku da mierkavańnia pra toje, što prypynieńnie vajny pa ciapierašniaj linii bajavoha sutyknieńnia ŭžo možna ličyć pieramohaj.

Pra heta piša ŭ artykule «Čyhunnaja proza realnaści» dyrektar Centra kompleksnych jeŭrapiejskich i mižnarodnych daśledavańniaŭ NDU VŠE Vasil Kašyn. Publikacyja vyjšła ŭ vydańni «Rasija ŭ hłabalnaj palitycy», jakim niaźmienna kiruje Fiodar Łukjanaŭ, viadučy siesij z Pucinym u Vałdajskim kłubie.

Vajna ciapier idzie pamiž suvymiernymi pa sile praciŭnikami, a histaryčna takija vojny «krajnie redka pryvodzili da poŭnaha źniščeńnia adnaho z bakoŭ», piša Kašyn.

U hetym vypadku mety vajny treba padviarhać karekciroŭcy, u jakoj «niama ničoha dziŭnaha, sam jaje fakt nie havoryć pra niaŭdaču». Idei pra toje, «što my možam chutka abrušyć ukrainski front, kali «mabilizujemsia, napružymsia, udarym z usioj siły», treba adkinuć i zabyć», nastojvaje Kašyn.

Artykuł z padobnym pasyłam niadaŭna vyjšaŭ u «Maskoŭskim kamsamolcy» (praŭda, nieŭzabavie byŭ vydaleny).

Mienavita «prajhranyja vojny i źnievažalnyja pieramirji rehularna pryvodzili da novych ryŭkoŭ, reformaŭ i, jak ni dziŭna, da novych pieramoh», śćviardžałasia ŭ im.

U jakaści prykładaŭ padavalisia, u pryvatnaści, adnosiny z Załatoj Ardoj, parazy ŭ Krymskaj, ruska-japonskaj i inšych vojnach. Paśla jakich «Rasija raz za razam, z časoŭ jarma, vybirała zbaŭčy [šlach] — suniać raśpierazanyja elity i dać bolš svabody ludziam».

Pavialičyć

• 1
• 1
• 81
• 3
• 0
• 0
• 2
• 0