«Яе дзеянні інспіраваныя спецслужбамі». Павел Латушка даў жывы эфір і адказаў на абвінавачванні Вольгі Карпушонак у дамаганнях

Латушка адзначыў, што яшчэ 14 траўня гэтага года ў эфіры на «Еўрарадыё», на фоне знікнення Анжалікі Мельнікавай, ён папярэджваў, што ў дачыненні да яго і калег спецслужбамі Беларусі «рыхтуецца спецаперацыя, накіраваная на дыскрэдытацыю, на фізічнае ўздзеянне, шантаж», і вось цяпер яна працягваецца.

Таксама ён нагадаў, што на прэс-канферэнцыі 31 ліпеня ён і спікер Каардынацыйнай Рады Арцём Брухан прадставілі скрыншоты паведамленняў у месенджарах і электронных лістоў, якія паступалі на адрас іх калегаў і былі накіраваныя на тое, каб «завербаваць як мінімум сем чалавек каманды Народнага антыкрызіснага ўпраўлення, здзяйсняць іншыя супрацьпраўныя дзеянні на тэрыторыі Польшчы».

Палітык таксама звязаў абвінавачванні з раней апублікаванай інфармацыяй:

«Была публікацыя 22 чэрвеня на тэлеграм-канале вядомага прапагандыста рэжыму Лукашэнкі Ігара Тура пра тое, што бліжэй да канца сезона «шыкоўны кампрамат зліюць на Латушку». І як раз мы бачым гэтую публікацыю, якая з'явілася сёння».

Латушка катэгарычна адхіліў усе абвінавачванні Карпушонак:

«У пасце, які апублікавала Вольга Карпушонак на сваёй старонцы ў Facebook, няма ніводнага слова, ніводнага факту праўды. Усё гэта хлусня і паклёп. Я перакананы, і ў мяне ў гэтым няма ні найменшага сумневу, ні долі працэнта, што яе дзеянні інспіраваныя спецслужбамі рэжыму Лукашэнкі. І я паспрабую даказаць гэта».

Праца ў НАУ

«Па-першае. Вольга Карпушонак не была ініцыятыўна запрошаная ў каманду Народнага антыкрызіснага ўпраўлення. Такой ініцыятывы з майго боку не было. І не было з боку членаў каманды Народнага антыкрызіснага ўпраўлення. Доказам таго, што яна хлусіць з нагоды свайго працаўладкавання, з'яўляецца той факт, што сёння раніцай яна выдаліла ўвесь чат са мной і з [маім намеснікам] Арцёмам Праскаловічам, каб мы не маглі проста паказаць і даказаць гэта на падставе перапіскі.

Па-другое. Яна працавала ў якасці валанцёркі, не была працаўладкаваная ў камандзе Народнага антыкрызіснага ўпраўлення. Ніякіх кантрактаў з ёй ніхто не падпісваў. Ніякіх працоўных адносін з ёй не было. Вы выдатна ведаеце, што вялікая колькасць зваротаў з боку беларусаў накіроўваецца нам з просьбай аказаць садзейнічанне ў пытаннях знаходжання, легалізацыі на тэрыторыі тых краін, дзе яны знаходзяцца. Гэта велізарнейшы аб'ём працы… У нас проста не хапае рук займацца, таму гэта ўсё — валанцёрства. Гэтак жа, як і Кабінет — валанцёрства, і праца ў Каардынацыйнай радзе».

Сустрэча ў рэстаране

«Яна сцвярджае, што была нейкая сустрэча са мной у рэстаране. Ну, я хацеў бы проста спытаць у яе, няхай яна скажа, у якім рэстаране і якога чысла. Пры мне 24/7 знаходзіцца адмысловая прылада, якая фіксуе кожныя 30 секундаў маё месцазнаходжанне […]

Кожныя 30 секундаў ідзе паведамленне ў праваахоўныя органы Польшчы, якія займаюцца гарантаваннем бяспекі, пра тое, дзе я знаходжуся. Аж да метра лакалізацыі. Калі яна сцвярджае гэта, няхай скажа, які рэстаран, які дзень. Гэта вельмі лёгка праверыць».

Асобна Латушка спыніўся на дэталях пра алкаголь:

«Яна сцвярджае, што ў рэстаране былі афіцыянты, якія мяне ведалі, і нават ведаюць, якому віну я аддаю перавагу. Усім выдатна вядома, што я ўжо практычна каля васьмі гадоў не ўжываю алкаголь. Таму ніякіх афіцыянтаў у прыродзе […] быць не можа. Тым больш тых, хто «ведае мае вінныя перавагі».

Паліграф і падазрэнні

Па словах Латушкі, у НАУ «на пэўным этапе» знаходжання Вольгі ў камандзе валанцёраў узніклі падазрэнні адносна магчымага супрацоўніцтва Карпушонак са спецслужбамі Беларусі. 15 красавіка адбылася сустрэча з удзелам спікера КР Арцёма Брухана і намесніка Латушкі Арцёма Праскаловіча, дзе ёй прапанавалі прайсці паліграф.

«Яны прапанавалі ёй прайсці паліграф. Праз тыдзень яна пакінула нашу каманду. Яна проста пайшла. Такім чынам прадэманстраваўшы, што яна не гатовая прайсці паліграф».

Акрамя таго, Латушка заявіў, што ад беларускіх добраахвотнікаў, якія ваююць ва Украіне, паступіла інфармацыя пра тое, што Карпушонак падчас пражывання ва Украіне (да пераезду ў Польшчу) праходзіла паліграф у СБУ (Службе бяспекі Украіны) — і не прайшла.

«У СБУ далі адказ, што яна працуе на КДБ, і дэпартавалі. Яна збірала інфармацыю пра падраздзяленне «Тэрор» […] Цяпер яна ў Польшчы. І я так зразумеў, КДБ праз яе спрабуе зламаць нашу беларускую дыяспару там. Гэтую мадам трэба тэрмінова затрымаць, альбо яна з'едзе ў Беларусь з усімі звесткамі, якія назбірала», — зачытаў Латушка паведамленне ад кагосьці з добраахвотнікаў, не назваўшы крыніцу.

Акрамя таго, са слоў Латушкі, сястра Карпушонак працуе нейкай начальніцай у Дзяржаўным мытным камітэце Беларусі.

Па словах палітыка, Карпушонак цяпер не знаходзіцца ў Польшчы.

«Яна, паводле нашых звестак, знаходзіцца ў Іспаніі. І тое відэа, якое яна запісала і апублікавала толькі для сваіх сяброў, — гэта відэа запісана ў Іспаніі (гаворка пра відэазварот, які Вольга згадала ў сваім пасце з абвінавачваннямі, але яго няма ў адкрытым доступе. — Заўв. рэд.). Яна пакінула тэрыторыю Польшчы».

Прававыя дзеянні

«Што тычыцца майго адказу Вользе [ … ] Яна піша ў фэйсбуку і яна публікуе гэтае відэа, што яна адвакатка, і яна не ведае, што рабіць. Яна юрыстка. Я таксама юрыст. Я адкажу з юрыдычнага пункту гледжання. Той чалавек, які з'яўляецца адвакатам […] выдатна ведае, што трэба зрабіць.

Трэба проста падаць заяву ў пракуратуру, у паліцыю, і настойваць на правядзенні расследавання. І гэта выдатна ведае любы адвакат. Вольга Карпушонак гэтага не зрабіла. І вось вам, калі ласка, адказ».

Латушка паабяцаў абараняць сваю рэпутацыю ў судзе:

«У мяне ёсць два варыянты дзеянняў. Першае: падача заявы ў пракуратуру аб здзяйсненні ў дачыненні да мяне злачынства, якое праявілася ў паклёпе, гэта значыць распаўсюдзе хлуслівай інфармацыі, абсалютна ва ўсім, на 100% не адпаведнай рэчаіснасці. Другі варыянт дзеянняў […] — гэта падача пазову, грамадзянскага пазову, аб абароне майго гонару, годнасці і дзелавой рэпутацыі як грамадскай персоны, як палітыка».

Пра «асабістае жыццё»

Па сутнасці заяў Вольгі Карпушонак пра тое, што Латушка спрабаваў схіліць яе да інтымных адносін і меў некалькі палюбоўніц, ён дадаў, што ніякіх падобных адносін у яго цяпер няма.

«У мяне няма асабістага жыцця.

Калі ты знаходзішся пад перманентнай пагрозай, калі ты атрымаў больш за 150 пагроз фізічнай ліквідацыі, калі табе пішуць, што тваю галаву рассякуць ледарубам на беразе Віслы […] калі здымаюцца фільмы пра выкраданне з тэрыторыі Польшчы, пра тое, што мяне вывозяць у багажніку.

Калі здзяйсняюцца рэальныя дзеянні. Я быў праінфармаваны спецслужбамі, што была двойчы ліквідаваная пагроза маёй фізічнай ліквідацыі.

Калі ты ведаеш пра тое, што да цябе ў офіс прыходзіў Пабла Гансалес, Павел Рубцоў, палкоўнік Галоўнага ўпраўлення вайсковай разведкі Міністэрства абароны Расіі, нібыта для таго, каб браць інтэрв'ю […] А пасля ты бачыш, што каля трапа самалёта яму асабіста паціскае руку Пуцін, калі яго ў рамках абмену паміж Вашынгтонам і Масквой перадаюць у Маскву.

Калі ты ведаеш пра тое, што […] на паверх ніжэй, літаральна дзе я зараз вяду гэты стрым, практычна месяц прыходзілі два афіцэры Галоўнага разведвальнага ўпраўлення Міністэрства абароны Беларусі і спрабавалі ўвайсці ў камунікацыю з супрацоўнікамі Народнага антыкрызіснага ўпраўлення.

Калі робіцца спроба фэйкавых журналістаў расійскага ліберальнага выдання [ … ] яны спрабавалі ўзяць інтэрв'ю ў Святланы Ціханоўскай, а таксама заходзілі да мяне.

Калі ты бачыш, што гэта абсалютна рэальныя дзеянні, і на нейкім этапе ў цябе ёсць адчуванне, што хтосьці ў прыцэл глядзіць у тваю патыліцу. Псіхалагічна гэта складана. Я не буду хаваць, псіхалагічна гэта цісне».

«Адкрытая вайна супраць апазіцыі»

«Тое, што было зроблена сёння, гэта проста танны трук», — рэзюмаваў палітык.

Латушка назваў тое, што адбываецца, часткай больш шырокай кампаніі ўладаў і спецслужбаў Беларусі супраць апазіцыі:

«Навошта гэта робіцца? [ … ] Галоўнае — «замачыць» Латушку, дыскрэдытаваць, прыбраць мяне з публічнага поля, каб я не мог быць тым чалавекам, які надалей артыкулюе перад заходнімі партнёрамі важнасць не адыходзіць ад беларускага парадку дня, важнасць крымінальнага пераследу міжнароднага злачынца Лукашэнкі, каб была распачатая справа ў рамках офіса пракурора Міжнароднага крымінальнага суда і быў выдадзены ордар на арышт Лукашэнкі.

Другая мэта — дыскрэдытаваць нашу каманду, нанесці ўдар у Народнае антыкрызіснае ўпраўленне, ініцыятыву, якая… не аддае парадак дня ў рукі тых, хто хацеў бы стаць на калені, папрасіць у Лукашэнкі прабачэння і пакаяцца.

Гэта ўдар і ў нашу дэлегацыю ў Каардынацыйнай радзе, а такім чынам і ў Каардынацыйную раду. Вольга Карпушонак была абраная чальцом дэлегацыі Парламенцкай асамблеі Рады Еўропы ад Каардынацыйнай рады замест Анжалікі Мельнікавай, якая знікла (мы дагэтуль не маем ніякай інфармацыі. Кожны раз, калі я сустракаюся з праваахоўнымі органамі Польшчы, якія вядуць расследаванне, я задаю гэтае пытанне. На жаль, навін тут няма).

Дык вось, гэта ўдар для таго, каб дыскрэдытаваць нашу дэлегацыю ў Парламенцкай асамблеі Рады Еўропы. Для чаго? Таму што Каардынацыйная рада прызнаная Парламенцкай асамблеяй Рады Еўропы. І цяпер яны (спецслужбы Беларусі. — Заўв. рэд.) хочуць прывесці да таго, каб гэты статус быў страчаны.

Гэта адкрытая і абвешчаная вайна супраць мяне, супраць членаў нашай каманды, Народнага антыкрызіснага ўпраўлення [ … ] Мы знаходзімся на вайне. За гэтым стаіць велізарны рэсурс: фінансавы, матэрыяльны, арганізацыйны, чалавечы, які выкарыстоўвае рэжым Лукашэнкі. Што гэта адкрытая вайна, пацвярджае сам начальнік следчага ўпраўлення КДБ Беларусі Бычак, які публічна заявіў пра тое, што ўсе, хто знаходзіцца за мяжой, будуць дастаўленыя ў Беларусь.

Дарэчы, учора я атрымаў менавіта гэтага зместу пагрозы з таго канала камунікацыі, які папярэджваў мяне пра напад у Варшаўскім універсітэце. Я атрымаў ад гэтага адрасата ліст у 16:00, і [назаўтра] у 12:45 адбыўся напад у Варшаўскім універсітэце. Гэты ж адрас выкарыстоўваўся для таго, каб папярэджваць пра фэйкавы фільм, які быў падрыхтаваны ў адносінах да Святланы Ціханоўскай і мяне.

Вы ведаеце гэтую гісторыю з нібыта планаваным падпалам […] што я рыхтаваў пяць сцэнарыяў, як знішчыць лідараў беларускай апазіцыі. Чаму ў той момант я не быў затрыманы разам з групай змоўшчыкаў, як сцвярджаюць у гэтым прапагандысцкім фільме? […] Усё гэта — фэйкавыя гісторыі, накіраваныя на дыскрэдытацыю, якія пад сабой не маюць ніводнага факту, ніводнага доказу».

У канцы Латушка сказаў, што, як даведаўся ад «заходніх партнёраў», падчас «адной з апошніх камунікацый» з імі Лукашэнка згадаў ягонае прозвішча шэсць разоў у якасці персанальнага ворага.

«Я разумею, што ён не спыніцца. Ну, і я не спынюся. Не атрымаецца! Не атрымаецца ў цябе мяне збіць з ног. Не атрымаецца закрыць мне рот. Не атрымаецца спыніць дзейнасць Народнага антыкрызіснага ўпраўлення. Мы будзем дамагацца крымінальнай адказнасці. Ты панясеш менавіта гэтую адказнасць за ўсе злачынствы, якія ўчыніў у дачыненні да беларускага народа і ў дачыненні да Украіны. Ты будзеш за гэта адказваць».

Перад гэтым 30 жніўня сябра Каардынацыйнай рады і былая адвакатка Вольга Карпушонак апублікавала ў фэйсбуку абвінавачванні супраць кіраўніка Народнага антыкрызіснага ўпраўлення (НАУ) Паўла Латушкі. У пасце, які яна назвала «споведзь аб мужчынскай жорсткасці сярод сваіх», жанчына абвінаваціла палітыка ў сэксуальных дамаганнях і пагрозах.

Па словах Карпушонак, у 2024 годзе яна была вымушаная пакінуць Украіну праз ціск СБУ. У гэты момант Латушка асабіста і праз калегаў нібыта запрасіў яе на працу ў НАУ ў Польшчу, паабяцаўшы «пратэкцыю, грошы і спакой». Карпушонак сцвярджае, што практычна адразу пасля пераезду Латушка запрасіў яе ў рэстаран у цэнтры Варшавы, дзе казаў пра жаданне бачыць побач «разумную прывабную дзяўчыну, годную ў будучыні стаць «першай лэдзі».

Калі жанчына выказала незадаволенасць паўторным запрашэннем у рэстаран, палітык, з яе слоў, стаў дамагацца, а пасля адмовы пагражаў «праблемамі ў Польшчы», абяцаючы «расказаць пра яе такое», што яе «альбо пасадзяць у турму, альбо выправадзяць у Беларусь».

Вольга Карпушонак раней працавала адвакатам у бюро «Маслаў, Гашынскі і партнёры» і абараняла ў судах палітвязняў, у тым ліку журналіста Андрэя Аляксандрава.

У жніўні 2021 года Вольга на афіцыйных старонках беларускай Рэспубліканскай калегіі адвакатаў выступіла з асуджэннем калегаў, якія «палітызуюць» абарону кліентаў і імкнуцца «вылучыцца» за кошт палітычнага парадку дня. Гаворка пра адвакатаў, якія абаранялі абвінавачаных па палітычных справах і не баяліся выказвацца пра тое, што ўлады парушаюць закон.

«У апошні год жыццё ў краіне адчувальна палітызавалася, і некаторыя адвакаты сталі ставіць пад сумнеў прынцып «адвакаты па-за палітыкай». Стала модна крытыкаваць дзяржаўныя органы ў цэлым. Часцяком такая крытыка носіць агульны і бяздоказны характар, што ў прафесійнай дзейнасці адваката недапушчальна», — гаварылася ў звароце Карпушонак.

Гэта не дапамагло ёй пазбегнуць тых жа праблем, з якімі сутыкнуліся «адвакаты ў палітыцы». Неўзабаве Міністэрства юстыцыі пазбавіла яе ліцэнзіі нібыта праз «недастатковую кваліфікацыю». Такія атэстацыі часта выкарыстоўваліся для ціску на адвакатаў, якія абаранялі фігурантаў палітычных спраў.

• 14
• 2
• 2
• 1
• 0
• 0
• 1
• 0