Łatuška abviarhaje abvinavačańni ŭ charasmencie ad delehatki KR Karpušonak

Delehatka Kaardynacyjnaj Rady i byłaja advakatka Volha Karpušonak abvinavaciła Paŭłu Łatušku ŭ charasmencie.

«U 2024 hodzie ja bolš nie mahła zastavacca va Ukrainie. Na žal, žyćcio sutyknuła mianie z SBU, jakaja sprabuje ŭsimi siłami, z dapamohaj lubych kantaktaŭ u biełaruskich demsiłach mieć ryčahi ŭpłyvu, manipulavać i šturchać svaje intaresy, i ja stała praktyčna cackaj u rukach hetych ludziej. Ad mianie patrabavali infarmacyju, pahražali departacyjaj, raspuskali ruki, prynižali, navat karystalisia maim asabistym aŭtamabilem, viartajučy jaho pabitym, sa štrafami i biez paliva, ź mianie prosta ździekavalisia», — napisała jana ŭ fejsbuku.

Karpušonak piša, što Łatuška asabista i praz kaleh zaprasiŭ jaje pracavać u NAU, «paabiacaŭšy pratekcyju, hrošy i spakoj». 

«Praktyčna ŭ pieršyja ž dni Pavieł zaprasiŭ mianie ŭ restaran, u samym centry Varšavy, my siadzieli na zakrytaj terasie. Jon byŭ tak hałantny, ź im było cikava, da taho ž nas absłuhoŭvali pa vyšejšym razradzie, aficyjanty viedali jaho i jaho pieravahi ŭ ježy i vinach. My tady vydatna praviali čas, a Pavieł kazaŭ pra toje, jak daŭno jon choča bačyć pobač z saboj razumnuju pryvabnuju dziaŭčynu, hodnuju ŭ budučyni stać, jak jon žartavaŭ, «pieršaj łedzi». Mnie padałosia, što ŭsio, narešcie, naładziłasia, ciapier možna žyć narmalnym žyćciom siarod biełarusaŭ, ale mnie tolki padałosia.

Łatuška paprasiŭ mianie nie raspaŭsiudžvacca ŭ ofisie ab našym spatkańni. Ja padumała, heta tamu, što nie varta hetaha rabić z etyčnych mierkavańniaŭ, my ž razam pracujem». 

Pa słovach Karpušonak, kali Łatuška zaprasiŭ jaje znoŭ u restaran, jana vykazała «ŭsio, što dumaje». «U vyniku ja sutyknułasia z seksualnymi damahańniami z boku hetaha čałavieka — kali jaho možna tak nazvać». Pa słovach Karpušonak, palityk nibyta taksama staŭ pahražać joj prablemami ŭ Polščy.

«Zarobak ja tak i nie dačakałasia, tolki niekalki razoŭ Pavieł Paŭłavič davaŭ mnie hrošy, ale prasiŭ napisać raśpisku, dzie ja pakazvała dakładnuju sumu ŭ jeŭra. Byli i hrošy, jakija jon davaŭ mnie prosta tak», — napisała Karpušonak.

Pavieł Łatuška ŭ kamientary zajaviŭ, što heta paklop.

«Ja jak publičnaja asoba vymušany budu abaraniać svaju reputacyju ŭsimi dastupnymi pravavymi sposabami. Taksama nie vyklučaju mahčymaść padačy iskavaj zajavy ŭ sud ab abaronie honaru i dziełavoj reputacyi».

Jon kaža, što niezadoŭha da hetaha ŭ kamandy NAU ŭźnikli padazreńni da samoj Karpušonak.

«U kamandy NAU paŭstali padazreńni ŭ dačynieńni da Volhi Karpušonak na pradmiet mahčymaha supracoŭnictva sa śpiecsłužbami zamiežnaj dziaržavy. Paśla hetaha joj było prapanavana prajści palihraf. Paśla hetaj prapanovy jana spyniła supracoŭnictva z kamandaj NAU ŭ jakaści vałanciora».

Palityk ličyć heta abvinavačańnie častkaj kampanii pa dyskredytacyi dziejnaści jaho i NAU.

Spatkańnia ŭ restaranie, pra jakoje kaža Karpušonak, pa słovach pradstaŭnika Łatuški, nie było.

Volha Karpušonak raniej była advakatkaj. U 2021 hodzie ŭ sacyjalnych sietkach Biełaruskaj respublikanskaj kalehii advakataŭ źjaviŭsia vialiki tekst za jaje podpisam. U im Volha pisała, što advakatam nie varta vysoŭvacca. Ale nieŭzabavie i jaje samu pazbavili licenzii. Da pierajezdu ŭ Polšču Volha žyła va Ukrainie.

• 3
• 0
• 11
• 17
• 1
• 1
• 1
• 0