24-hadovy minčuk za try hady zdoleŭ sabrać 105 tysiač rubloŭ

Anton nie zaŭsiody pracavaŭ na adnoj pasadzie. Pieryjadyčna padpracoŭvaŭ, časam sumiaščaŭ dźvie poŭnyja pracy. Usio dziela taho, kab adkłaści jak maha bolš. U asabliva ŭdałyja miesiacy jamu ŭdavałasia «pakłaści pad matrac da 70% dachodu».

— Mocna siabie abmiažoŭvać nie davodzicca, pryvyk nie marnavać hrošy, ale i nie ekanomić na kožnaj kapiejcy. My ź dziaŭčynaj dazvalajem sabie vypić kavy ci schadzić u kafe 1—2 razy na tydzień.

U miesiac u nas na žyćcio, zabavy i mašynu sychodzić kala 3—4 tysiač rubloŭ z ulikam apłaty žylla. U mianie navat byli sproby vieści ŭlik vydatkaŭ, ale kožny raz niešta adciahvała. Na dadzieny momant nijakich instrumientaŭ dla ŭliku nie vykarystoŭvaju, tolki adznačaju, kolki dalaraŭ kuplaju štomiesiac.

Jak udałosia nazapasić? Ja płanavaŭ prybliznyja vydatki na miesiac napierad, časam z zapasam, i pakidaŭ hetuju sumu na karcie. A na astatnija hrošy kuplaŭ dalary ŭ dzień atrymańnia zarpłaty.

Niahledziačy na imknieńnie da nakapleńnia, Anton nie staŭ admaŭlać sabie ŭ pakupcy mašyny za $4000 i adzin raz źjeździŭ ź dziaŭčynaj u adpačynak za $3500.

— Adzieńnie kuplać nie lublu, u miesiac, moža, i kuplu 1—2 rečy ŭ miežach nieabchodnaści. Na pradukty, kafe i zabavy vydatki taksama ŭ miežach razumnaha, nie davodzicca ŭ niečym sabie admaŭlać. U čym sapraŭdy treba siabie strymlivać — dyk heta ŭ vydatkach na mašynu. Nabyŭ jaje hod tamu, joj 30 hadoŭ, i ja zharaju ad žadańnia jaje adnavić. Zdajecca, u jaje možna ŭkładać biaskonca, choć by pa niekalki tysiač dalaraŭ u miesiac. Tamu z bolem u sercy davodzicca vydzialać na zapčastki pa 200—300 — maksimum 400 rubloŭ u miesiac.

Sproby prymnožyć kapitał taksama byli, ale niaŭdałyja. Paru hadoŭ tamu Anton straciŭ 700 dalaraŭ na trejdzinhu.

— Viadoma, źbieražeńni chaciełasia prymnožyć, pryčym usio i adrazu. Mienavita tak paru hadoŭ tamu ja straciŭ $700, sprabujučy zarabić na trejdzinh, z tych časoŭ tak mocna aściarožničaŭ, što ničoha bolš i nie sprabavaŭ. A dumak kolki było pra toje, što za hod zrablu +100-200% da svaich nakapleńniaŭ i pabiahu jakuju-niebudź trajačku kuplać bližej da centra! Ciapier u mianie 5000 USDT lažyć na telehram-kašalku, kapajuć pracenty. Zusim niadaŭna ŭ heta ŭlez, tak što dachodnaść pakul nie zrazumieŭ, ale jana nievialikaja.

Ź inviestycyjami što ŭ kryptavalutu, što ŭ akcyi ja nie razabraŭsia. Nie zrazumieŭ, z čaho pačynać i kudy ruchacca, kab pavialičyć nakapleńnia i nie stracić srodki. U mianie prosta niama na heta času, bo ja ŭvieś čas biaru padpracoŭki. 

Toje ž tyčycca i bankaŭskich układaŭ. Choć u apošni hod rubiel surjozna ŭmacavaŭsia da dalara i ŭkłady apynulisia vyhadnyja, u mianie ŭsio jašče jość praduziataje staŭleńnie, što addavać hrošy ŭ bank niebiaśpiečna, i ŭ momancie, kali valuta pačnie daražeć, ja navat źniać hrošy z rachunku nie zmahu da zakančeńnia terminu depazitu.

Naohuł da inviestycyj jak da idei staŭlusia stanoŭča, kali heta niešta, što pavialičyć ličby na rachunku. Sumnievy ŭźnikajuć, kali dumaju pra niestabilnaść kursaŭ valut i mahčymyja ryzyki. Ličby mohuć pavialičycca, a pakupnickaja zdolnaść hetaj sumy ŭpaści ŭ paraŭnańni z pačatkovaj sumaj ŭmoŭna hod tamu, i ŭ čym byŭ sens inviestavać? Ja byŭ by rady, kali b chtości pryjšoŭ da mianie i skazaŭ:»voś tabie niadrennaja prybytkovaść i nul ryzyk, voś harantyi taho, što heta pracuje».

Mianie vielmi pryciahvała tema kryptavalut, ale ŭvieś čas zdavałasia, što kuplaju na samym piku, a kurs voś-voś ŭpadzie. Z trejdzinham historyja anałahičnaja. 

Choć ličba na rachunku hieroja ŭražlivaja, jon nie staŭ adčuvać siabie bolš upeŭniena.

— Ja ž za plačyma ničoha nie maju. Na takuju sumu navat kvateru nie kupiš ciapier. Pieraškadžaje finansavaj upeŭnienaści i toj fakt, što z kursami valut niezrazumieła što adbyvajecca, a inflacyja navat u dalara trochi vyrasła ŭ apošni čas. Naadvarot, tryvoha tolki ŭzmacniajecca. Ja ž tak staraŭsia, źbiraŭ, šmat pracavaŭ, a hetyja hrošy abiasceńvajucca. Dalar kuplaŭ pa 3,3 rubla, a ciapier jon 3. Kvatera kaštavała $50 tysiač, a ciapier $80 tysiač. Kolki ž jana budzie kaštavać, kali ja źbiaru? Abhaniu ci ja naohuł heta abiasceńvańnie za ŭsio?

«Ale pryhniataje toj fakt, što, majučy dobry, pa mierkach krainy, zarobak, ja za čatyry hady navat nie abahnaŭ rost cen na žyllo. Ale stanovicca spakajniej choć by ad taho, što, kali niešta zdarycca z pracaj, nie zastanusia biez hrošaj i zmahu niejki čas pratrymacca», — kaža Anton.

• 0
• 0
• 0
• 0
• 0
• 0
• 0
• 0