U Viciebskaj balnicy chutkaj dapamohi zaliło vadoj apieracyjny błok. Minzdaroŭja: abstalavańnie nie paciarpieła
Akramia hetaha, vadoj zaliło pryjomny pakoj i niekatoryja pałaty.
U Viciebskaj BCHMD adbyłosia nadzvyčajnaje zdareńnie — prarvała trubu, u vyniku byŭ zatopleny ŭvieś apieracyjny błok balnicy. Akramia hetaha vadoj zaliło pryjomny pakoj i niekatoryja pałaty, u jakich znachodzilisia pacyjenty, paviedamiła abjadnańnie niezaležnych miedykaŭ «Biełyja chałaty» sa spasyłkaj na svaje krynicy.
Zaznačajecca, što paśla taho jak vada pačała vylivacca, na praciahu niekalkich hadzin nie ŭdavałasia znajści miesca praryvu i praduchilić avaryju. Škodu aceńvajuć jak «vielmi vialikuju» — nie padlahaje adnaŭleńniu niekatoraje darahoje abstalavańnie, u tym liku łaparaskapičnyja stojki i ŠVŁ, renthien-abstalavańnie, a taksama častka zapasaŭ pratezaŭ.
Čakajecca, što ŭ paniadziełak na miesca pryjedzie ź inśpiekcyjaj Iryna Abielskaja.
«Biełyja chałaty» nahadvajuć, što heta nie pieršaje takoje nadzvyčajnaje zdareńnie ŭ hetaj balnicy: 21 studzienia 2021 hoda na trecim paviersie chirurhičnaha korpusa paśla praryvu truby vada liłasia sa stoli vada taksama liłasia niekalki hadzin, pakul santechnik nie likvidavaŭ prablemu.
Paźniej žurnalist vydańnia «Lusterka», atrymaŭšy hetu infarmacyju, patelefanavaŭ u pryjomnaje adździaleńnie Viciebskaj BCHMD pad vyhladam pacyjenta. Tam paćvierdzili fakt kamunalnaj avaryi.
«U nas u apieracyjnaj, tak. U supraćšokavaj», — udakładniła supracoŭnica paśla karotkaj narady z kalehami.
Taksama dziažurnaja dadała, što «ŭčora było [zalita] ŭ padvale». Pry hetym infarmacyju pra toje, što vada staić niepasredna ŭ samim pryjomnym pakoi, surazmoŭca abvierhła.
Nieŭzabavie vydała aficyjny kamientaryj pra incydent i Ministerstva achovy zdaroŭja. U im śćviardžajecca, što ŭ Viciebskaj haradskoj kliničnaj balnicy chutkaj miedycynskaj dapamohi sapraŭdy adbyłasia avaryja: z pałamanaj truby praciakła haračaja vada, jakaja zatapiła apieracyjny błok, niekalki pałat, kalidory chirurhičnaha i endaskapičnaha adździaleńniaŭ, a taksama častku kabinietaŭ pryjomnaha adździaleńnia.
Padčas incydentu nichto nie paciarpieŭ, bo ŭ hety čas apieracyi ŭ apieracyjnym błoku nie pravodzilisia. Miedycynskaja dapamoha nasielnictvu praciahvajecca ŭ poŭnym abjomie, a pacyjentaŭ z chirurhičnymi prablemami časova nakiroŭvajuć u Viciebskuju abłasnuju balnicu, dzie apieracyi robiać kruhłasutačna.
Miedycynskaje abstalavańnie, pa słovach pres-słužby Minzdaroŭja, było nadziejna abaroniena i nie paciarpieła. U toj ža čas častkova paškodžanaje padviasnoje hipsakardonnaje pakryćcio stolaŭ. Zaraz u balnicy pravodziać ramont i kładku novaha pakryćcia.
U apieracyjnym błoku elektrazabieśpiačeńnie ŭžo naładžana, a ŭ najbližejšy čas za pracu voźmucca śpiecyjalisty servisnych arhanizacyj, jakija sočać za jaho aparaturaj.
Kamientary