Navukoŭcy stvaryli parašok, jaki adbielvaje zuby pad uździejańniem vibracyi zubnoj ščotki
U adroźnieńnie ad tradycyjnych hielaŭ i pałosak novy «pjezaelektryčny» zubny parašok nie tolki aśviatlaje zuby, ale i dapamahaje adnavić ich strukturu, paźbiahajučy pabočnych efiektaŭ ahresiŭnaj chimii.
Zubnaja emal moža ciamnieć z-za spadčynnych faktaraŭ albo ŭžyvańnia takich praduktaŭ i napojaŭ, jak tamaty i kava, navat pry rehularnaj čystcy. Chacia papularnyja chimičnyja srodki dapamahajuć vydalić plamy, jany časta škodziać zubam.
Naprykład, hieli i apałaskvalniki na asnovie pierakisu, jakija šyroka vykarystoŭvajucca ŭ stamatałohii, utvarajuć malekuły aktyŭnych form kisłarodu (AFK). Hetyja malekuły rasščaplajuć pihmienty, ale adnačasova niščać zubnuju emal.
Jak paviedamlaje The Independent, kitajskim navukoŭcam udałosia stvaryć parašok, jaki zdolny nie tolki aśviatlać, ale i abaraniać zuby.
Srodak atrymaŭ nazvu BSCT. Heta kieramičny parašok z tytanatu baryju, uzbahačany ijonami stroncyju i kalcyju. Pryncyp jaho dziejańnia zasnavany na pjezaelektryčnym efiekcie — zdolnaści niekatorych materyjałaŭ nazapašvać elektryčny zarad pry miechaničnaj defarmacyi. Padobnaja technałohija, naprykład, vykarystoŭvajecca ŭ kvarcavych hadzińnikach.
Rolu miechaničnaha aktyvataru tut vykonvaje elektryčnaja ščotka. Pad uździejańniem jaje vibracyi čaścicy paraška stvarajuć mikraskapičnaje elektryčnaje pole. Jano zapuskaje chimičnuju reakcyju z vypracoŭkaj aktyŭnych form kisłarodu (AFK), jakija biaśpiečna vydalajuć pihmientacyju, a kampanienty paraška adnačasova spryjajuć minieralizacyi i adnaŭleńniu tkanak zuba.
Testy na čałaviečych zubach, štučna afarbavanych harbataj i kavaj, pakazali, što sumarna čatyry hadziny čystki dajuć bačny efiekt, a 12 hadzin robiać zuby amal na 50% śviatlejšymi ŭ paraŭnańni z kantrolnaj hrupaj.
Bolš za toje, aŭtary vyjavili, što čystka z BSCT adnaviła paškodžanuju emal i dencin na niekatorych zubach, pakolki ijony kalcyju i baryju nazapašvajucca na pavierchni zuboŭ.
Taksama parašok pratestavali na pacukach, jakich trymali na dyjecie z vysokim utrymańniem cukru. Vyśvietliłasia, što štodzionnaja chvilinnaja čystka ciaham čatyroch tydniaŭ dapamahła adnavić karysnuju mikrafłoru ŭ pacukoŭ, źniščajučy bakteryi, jakija vyklikajuć paradantyt.
Choć novaja raspracoŭka pakul nie dajšła da stadyi kamiercyjnaha praduktu, stvaralniki pierakanany ŭ jaje vialikim patencyjale. Aŭtary daśledavańnia śćviardžajuć, što ich mietad narešcie dazvolić pieraadoleć niedachopy tradycyjnych technałohij. Na ich dumku, heta biaśpiečnaja chatniaja alternatyva, jakaja vyrašaje adrazu kompleks zadač: nie prosta adbielvaje zuby, ale i nasyčaje ich minierałami, praduchilaje karyjes i zabiaśpiečvaje doŭhaterminovaje zdaroŭje rotavaj połaści.
Kamientary