Hałoŭny apanient Orbana pryznaŭsia, što ŭlapaŭsia ŭ seks-skandał. «Kłasičny kampramat rasijskaha typu»
Pieter Madźjar zrazumieŭ pa pavodzinach byłoj dziaŭčyny, što ich seks paśla partyjnaj viečarynki byŭ zapisany na videa.
Lidar vienhierskaj apazicyi Pieter Madźjar papiaredziŭ, što staŭ achviaraj «kłasičnaha kampramatu rasijskaha typu» i nieviadomyja ludzi, źviazanyja, ź jahonych słoŭ, z kiroŭnaj partyjaj i śpiecsłužbami, rychtujucca apublikavać nibyta kampramietujučaje intymnaje videa ź jahonym udziełam. Pra heta Madźjar raspavioŭ u zvarocie, apublikavanym u jaho sacsietkach u čaćvier, piša Deutsche Welle.
Jak raspavioŭ palityk, 2 žniŭnia 2024 hoda jaho partyja «Pavaha i svaboda» (TISZA) arhanizavała viečarynu dla prychilnikaŭ, paśla jakoj jaho byłaja dziaŭčyna Evielin Fohiel zaprasiła jaho na inšuju chatniuju viečarynu, i jon pahadziŭsia.
A piataj ranicy jany pryjechali ŭ kvateru, dzie, jak raspaviadaje Madźjar, znachodzilisia nieznajomyja jamu ludzi, a na stale byŭ ałkahol i rečyvy, padobnyja na narkotyki.
«Ja nie dakranaŭsia da pradmietaŭ na stale. Narkotyki ja nie ŭžyvaŭ. Praź niekalki chvilin my z Evielin prajšli ŭ pakoj i ŭstupili ŭ dobraachvotnyja seksualnyja adnosiny», — raspavioŭ palityk.
Pavodle jaho słoŭ, paźniej pa pavodzinach Evielin i šantažu jamu stała vidavočna, što jon staŭ achviaraj «kampramietujučaj apieracyi».
Svoj zvarot Madźjar apublikavaŭ paśla taho, jak ŚMI źviarnuli ŭvahu na veb-sajt, jaki namiakaŭ na chutkaje raskryćcio infarmacyi ab niejkim incydencie. Na sajcie byli raźmieščany kadry z pakoja z dvuchspalnym łožkam i nadpis «Chutka».
Madźjar śćviardžaje, što za kampramatam stajać ludzi, źviazanyja z premjeram Viktaram Orbanam. «Ja nie dazvolu Viktaru Orbanu i jaho ludziam tydniami adciahvać uvahu ad realnaści z dapamohaj mistyfikacyi. Vam nie dapamohuć ni rasiejskija śpiecsłužby, ni płyń falšyvych videa», — zajaviŭ jon.
Kiraŭnik administracyi Orbana Hierhieli Hulaš, adkazvajučy napiaredadni na pytańnie ab veb-sajcie, skazaŭ žurnalistam: «Ja nie mahu kamientavać toje, pra što ničoha nie viedaju». Pres-sakratar urada Orbana Zołtan Kovač nie adkazaŭ na pytańni Reuters, adpraŭlenyja pa pošcie.
U Vienhryi 12 krasavika adbuducca parłamienckija vybary. Pravacentrysckaja partyja Madźjara «Pavaha i svaboda» (TISZA) apiaredžvaje kiroŭnuju partyju premjer-ministra Viktara Orbana «Fides» u bolšaści apytańniaŭ.
Ciapier čytajuć
Milicyja zatrymała taho samaha rasijskaha turysta, jaki kinuŭ niedakurak na vulicy. Zaŭtra sud28
Kamientary
Puskaj tiepieŕ Vitiek pokažiet kak i s kiem on korotaje viečara i noči!
I tut achviara) dziaŭčynu i rečavy mnie padbrosili vorahi!