Pasolstva Biełarusi ŭ Varšavie stała prymać dakumienty tolki pa zapisie. Čakańnie — kala 10 miesiacaŭ
25 žniŭnia na dźviarach Pasolstva Biełarusi źjaviłasia novaja abjava: tut bolš nie prymajuć dakumienty pa žyvoj čarzie. Ciapier — tolki pa papiarednim zapisie, zaŭvažyła ŭ svaim kanale śpiecyjalistka pa rełakacyi Kaciaryna Čachoŭskaja, piša «Biełsat».
«Nie było prosta i bolš nie budzie. Chto paśpieŭ, toj paśpieŭ. Ciapier atrymańnie paśviedčańnia na viartańnie dla DNŽ stała jašče bolš składanym. Niama ŭ mianie słoŭ dla taho, kab apisać emocyi nakont hetaj abjavy, ale ja dumaju ŭsie ŭsio zrazumieli», — piša Kaciaryna Čachoŭskaja.
Vyklučeńnie zrabili tolki dla tych, chto straciŭ pašpart padčas karotkaj pajezdki i terminova viartajecca dadomu: jany mohuć patrapić u ambasadu pa žyvoj čarzie.
«Hramadzianie, jakija stracili pašpart padčas karotkaterminovaj pajezdki za miažu i jakija žadajuć viarnucca ŭ Biełaruś u najkarotkija terminy, mohuć źviartacca ŭ pryjomnyja hadziny biez zapisu, u paradku žyvoj čarhi. Usie astatnija katehoryi hramadzian (jakija pastajanna ci časova pražyvajuć u Polščy, majuć kartu pabytu ci dowód osobisty, a taksama baćki, jakija vyjazdžajuć ź dziciem bieź biełaruskaha pašparta, narodžanym u Polščy, prymajucca tolki pa papiarednim zapisie», — abviaščaje papiera na dźviarach ambasady.
Ludzi stali dzialicca prykładnymi terminami papiaredniaha čakańnia ŭ hetuju paŭpustuju ambasadu: ad 8 da 10 miesiacaŭ. Nahadajem, tam biełarusy nie mohuć padoŭžyć pašpart, atrymać daviedku ci zrabić niešta jašče, čym zaniatyja zvyčajnyja ambasady. Usio heta zabaranili.
«Čamu na 8 miesiacaŭ? Mnie siońnia prapanavali zapis na červień 2026-ha. 10 miesiacaŭ. Heta prosta pravał», — pišuć u kamientarach biełarusy.
Zrešty, niekamu pašancavała bolš: naprykład, na atrymańnie paśviedčańnia na viartańnie dla dziciaci zapisali praz tydzień.
«25.08 napisała na poštu [email protected] z prośbaj zapisać na atrymańnie paśviedčańnia na viartańnie dla dziciaci, učora dasłali adkaz i dali zapis na 03.09. Ale, mahčyma, hetak chutka dajuć tolki zapis na takija paśviedčańni. A datelefanavacca da ich niemahčyma», — dzielacca «ščaśliŭčyki» u kamientarach.
Niekatoryja ludzi taksama znajšli vyjście: zamiest ambasady ŭ Varšavie pajechali ŭ inšy horad, dzie patrebnuju papieru vydali dzień u dzień.
«Sutyknuŭsia z prablemaj, što pryjšłosia atrymlivać paśviedčańnie na viartańnie ŭ Biełaruś, dla dalejšaj zamieny pašparta. Pryjechaŭ u Varšavu, tam pa papiarednim zapisie, usio zładžana. Pajechaŭ u Biełuju Padlasku, tam pryniali biez zapisu. Šukajcie i znojdziecie, jak toj kazaŭ», — dzielacca łajfchakami biełarusy.
Ciapier čytajuć
«Ja byŭ suprać, kab mianie mianiali na 20 rasijskich vajskoŭcaŭ. Nie zmoh by hladzieć u vočy ludziam, syny jakich siadziać»: pieršaje intervju eks-mera Chiersona22
Kamientary