Źnikły Anatol Kotaŭ byŭ partnioram samaha vysokapastaŭlenaha biełaruskaha raźviedčyka, jaki pierajechaŭ u Polšču. Tut moža być kluč da razhadki jaho źniknieńnia
Śled Anatola Kotava źnik u Turcyi 21 žniŭnia. Pa infarmacyi tureckich ŚMI, Kotaŭ prybyŭ u aeraport Stambuła z Varšavy ŭ 13:49, adrazu ž vylecieŭ u turecki prymiežny horad Trabzon i pakinuŭ krainu praz marski port u 18:35. Padmanuty? Vykradzieny? Sam vyjechaŭ? Historyja Kotava jašče bolš zabłytanaja za situacyju z Anžalikaj Mielnikavaj. Kotaŭ — były dypłamat, syn supracoŭnikaŭ KDB i brat kadebista. Jość u bijahrafii Kotava i inšy važny fakt: jon byŭ blizki z Uładzimiram Papovym, byłym kamandziram čaści №15738 HRU Minabarony Biełarusi, jaki taksama pryziamliŭsia ŭ Polščy ŭ 2022-m.
45-hadovy Anatol Kotaŭ — biełaruski čynoŭnik, jaki ŭ 2020-m adnym ź pieršych vyjechaŭ na Zachad. U emihracyi jon razharnuŭ bieskampramisnuju krytyku režymu ŭ telehram-kanale «Nik i Majk» i rvaŭsia na hałoŭnyja pazicyi u NAU Paŭła Łatuški. Ale jaho kaštoŭnych krynic u Biełarusi pierasadžali, a z Łatuškam jon chutka rassvaryŭsia. Apošnija hody Kotaŭ zasiarodziŭsia na krytycy apazicyi i staŭ svaim dla nieŭźlinaŭcaŭ. Naŭrad ci łukašenkaŭcy mahli ličyć jaho patencyjna niebiaśpiečnym lidaram. Što paviało jaho ŭ Trabzon — na kraj Turcyi? Chto pierakanaŭ tudy palacieć? Kali jaho vykrali — to čamu? Ci moh jon sam pierabiehčy nazad? Voś niekatoryja detali jaho bijahrafii i punkty emihracyjnaj trajektoryi.
Apošnija hody Anatol Kotaŭ nie byŭ zaŭvažnaj hramadskaj fihuraj. Jon pracavaŭ u ivent-ahienctvie byłoha palitviaźnia-babarykanca Vitala Kryŭko. Adnačasova adkazvaŭ za mižnarodnyja suviazi ŭ kiraŭnictvie Biełaruskaha fondu spartyŭnaj salidarnaści.
Paralelna jon razam z hrupaj adnadumcaŭ vioŭ ananimnyja telehram-kanały. Adzin ź ich, «Nik i Majk», krytykavaŭ Łukašenku — paśla heta pieradrukovała «Chartyja'97». Druhi, «Biełaruś Wired», krytykavaŭ apazicyju, i paśla heta padchoplivała łukašenkaŭskaja prapahanda. Treci, «Biełaruskaja vyviedka», raspaŭsiudžvaŭ psieŭdainsajdarskuju bielibierdu ŭ duchu «Hienierała SVR». Navat jaho adras nazyvajecca @heneral_kgb.
Narešcie, koła Anatola Kotava (ale nieviadoma, ci jon sam byŭ da hetaha datyčny) manipulavała błohieram Vitalom «Virusam» Kandracienkam.
Pamiatajecie vypadak, kali «Virus» apublikavaŭ skrynšot, zrobleny Volhaj Siamaška? Dyk voś, Siamaška, žonka čałavieka z pašpartam prykryćcia, pracavała dla Aljansa rasśledavalnikaŭ Biełarusi, zasnavanaha Kotavym.
Drabnata ciapierašnich zaniatkaŭ i spraŭ Anatola Kotava nie adpaviadała jahonym ambicyjam. Ludzi, znajomyja ź im, havorać pra jaho jak pra čałavieka z nadzvyčajna vysokaj samaacenkaj i prahaj być u centry padziej. Voś što viadoma pra jahonuju bijahrafiju.
Baćki Kotava — aficery KDB
Pačać treba z taho, što Anatol Kotaŭ hadavaŭsia ŭ siamji čekistaŭ. I mama, i tata — aficery KDB. Aboje — z Branskaj vobłaści Rasii, ale słužyli ŭ Biełarusi. Baćka pamior u 2018-m, maci žyvaja.
Starejšy na 10 hadoŭ za Anatola brat Uładzimir taksama byŭ aficeram čaści vajskovaj suviazi. U pašpartnych bazach jon prachodzić pad teham «Vajskoŭcy/KDB». Viadoma, što na pačatku 2000-ch Uładzimir Kotaŭ pierajechaŭ žyć da žonki va Ukrainu.
Sam Anatol nie pajšoŭ u siłavyja struktury, ale advučyŭsia na jurysta ŭ MHIMO (1997—2002). Tam rychtujuć kadry dla rasijskaha MZS.
Kotaŭ vyvučaŭ u Maskvie dźvie zamiežnyja movy: anhlijskuju i polskuju. I pa vypusku pajšoŭ nie ŭ biznes, jaki mnohim byŭ najbolš pryvabnaj darohaj u toj čas, a viarnuŭsia ŭ Biełaruś, jaho pryniali na pracu ŭ Ministerstva zamiežnych spravaŭ, u damoŭna-pravavoje ŭpraŭleńnie MZS (2002—2006).
Nahadajem, što ŭ krainie tady ŭžo ŭmacavaŭsia aŭtarytarny režym, niadaŭna ŭžo prapali lidary apazicyi Viktar Hančar i Juryj Zacharanka.
Praca ŭ biełaruskim pasolstvie ŭ Varšavie
Juryst-mižnarodnik ź viedańniem polskaj movy nieŭzabavie apynuŭsia ŭ adnym z samych važnych biełaruskich pasolstvaŭ — u Varšavie.
Častku pieršaj svajoj kamandziroŭki (2006—2010) Kotaŭ adpracavaŭ tam pad načałam Paŭła Łatuški.
Potym Kotaŭ viarnuŭsia ŭ Biełaruś, papracavaŭ u aparacie Saŭmina, va ŭpraŭleńni zamiežnaj palityki Administracyi Łukašenki (2010—2014) pry ŭžo znajomym jamu Maksimu Ryžankovu i pamočniku Łukašenki Valancinie Rybakovu. Potym Kotava znoŭ adpravili ŭ kamandziroŭku ŭ Polšču (2014—2015).
Druhi raz Kotaŭ adpracavaŭ u Polščy tolki hod: Varšava abviaściła jaho piersonaj non-hrata ŭ adpłatu za vysyłku Minskam adnaho z polskich dypłamataŭ.
U Biełarusi Kotaŭ praciahnuŭ pracu ŭžo nie ŭ Ministerstvie zamiežnych spraŭ, a pry raniej vysłanym z Polščy Maksimu Ryžankovu. Toj byŭ vice-prezidentam Nacyjanalnaha alimpijskaha kamiteta, i Kotaŭ pajšoŭ da jaho namieśnikam — hienieralnym sakratarom.
Krynicy «Našaj Nivy» kažuć, što karjera Kotava raźvivałasia dziakujučy jaho asabistaj pracavitaści i intelektu i pry ŭsiebakovaj padtrymcy Ryžankova. Ź im u NAKu Kotaŭ prasiedzieŭ dva hady, a ŭ 2017-m, kali byŭ stvorany Fond «Dyrekcyja II Jeŭrapiejskich hulniaŭ u Minsku», zaniaŭ tam pasadu namieśnika dyrektara. Faktyčna, hałoŭnym pa arhanizacyi centralnaj spartyŭna-palityčnaj padziei 2019-ha.
Znajomstva z Papovym
U dyrekcyi Jeŭrahulniaŭ adbyłosia znajomstva, jakoje, mahčyma, maje dačynieńnie da taho, što adbyłosia z Kotavym 21 žniŭnia.
U adnym kabiniecie z Kotavym siadzieŭ inšy namieśnik dyrektara — pa biaśpiecy. Jaho zvali Uładzimir Papoŭ. Pałkoŭnik Uładzimir Papoŭ. Kadravy raźviedčyk, były kamandzir sakretnaj čaści №15738 Hałoŭnaha raźviedupraŭleńnia Hienštaba Minabarony Biełarusi.
U minułym, da HRU i Hienštaba, Papoŭ nacior sabie vušy «kropielkami» — jon byŭ supracoŭnikam Słužby biaśpieki Łukašenki.
Rabota ŭ dyrekcyi Jeŭrahulniaŭ dla jaho była prosta pryjemnaj uznaharodaj za byłuju viernaść, siniekuraj adstaŭnika. Choć zasłuhi takich ludziej nie publičacca, niekatoryja detali jaho karjery my viedajem.
Z pašpartnaj bazy, zdabytaj «Kibierpartyzanami», vynikaje, što Papoŭ mieŭ pašparty prykryćcia na roznyja imiony, u ich jon atrymlivaŭ vizy i vyjazdžaŭ, u tym liku ŭ Jeŭrasajuz.
U karjery Papova byŭ i taki epizod — rola načalnika achovy biehłaha prezidenta Kyrhyzstana Kurmanbieka Bakijeva. Papoŭ zabiaśpiečvaŭ siamji Bakijevych biaśpieku ŭ Biełarusi, a jany ŭzamien uładkoŭvali dla siamji Papova žyćcio: staršy syn Papova mieŭ sumiesny biznes ź plamieńnikam Bakijeva.
Znajomstva Papova z Kotavym u dyrekcyi ŭ vyniku taksama pierarasło ŭ biznes-partniorstva. Nieŭzabavie paśla zakančeńnia Jeŭrapiejskich hulniaŭ, vosieńniu 2019-ha, jany razam zasnavali TAA «Spadčyna2019» («Naśledije2019»).
Pradpryjemstva zadekłaravała tolki adzin vid aktyŭnaści — «dziejnaść, jakaja spryjaje praviadzieńniu kulturna-vidoviščnych mierapryjemstvaŭ».
U internecie jość zhadki, jak u sakaviku 2020-ha «Spadčyna2019» sumiesna ź JUNISIEF (Dziciačym fondam AAN) arhanizavali dla studentaŭ Hrodzienskaha dziaržaŭnaha ŭniviersiteta treninh na temu «Efiektyŭnaja kamunikacyja ŭ dziełavych i asabistych adnosinach», u krasaviku 2020-ha kampanija dapamahała z arhanizacyjaj dabračynnaha kancerta dla zboru hrošaj na lekavańnie chvoraj na SMA dziaŭčynki.
Hetaja ž kampanija, jak vidna z kamiercyjnych bazaŭ, była kontrahientam inšych pačynańniaŭ Papova ŭ śfiery kamiercyi.
Praź niekalki miesiacaŭ paśla rehistracyi «Spadčyny2019» biznes-partniory ź niejkich pryčyn pierapisali svaje doli na svajakoŭ. Anatol Kotaŭ — na svaju treciuju žonku, Nastaśsiu Pilipčyk-Kotavu. Papoŭ — na małodšaha syna. Źjaviŭsia i treci akcyjanier — Nadzieja Anisaviec, byłaja načalnica ŭpraŭleńnia pa rabocie z vałanciorami dyrekcyi Jeŭrapiejskich hulniaŭ.
Sam Kotaŭ u toj čas taksama sprabavaŭ arhanizavać i inšy biznes. Ale nie pajšło. I Kotaŭ vyrašyŭ viarnucca na dziaržsłužbu.
Dziŭnaja niamiłaść
Ale pa viartańni Kotaŭ čamuści bolš nie mieŭ pratekcyi Ryžankova, choć toj užo byŭ na pasadzie namieśnika kiraŭnika Administracyi prezidenta. Na vysokija pasady Kotava nie ŭziali. Prapanavali tolki ścipłaje miesca namieśnika načalnika adnaho z adździełaŭ u Kiraŭnictvie spraŭ Łukašenki. Tak byvaje, kali čynoŭnika ŭ niečym padazrajuć i ci niečym niezadavolenyja im.
Dla razumieńnia. U hetaj struktury jość departamienty, hałoŭnyja ŭpraŭleńni, upraŭleńni, u ich — adździeły. I voś Kotaŭ paśla svaich vyšyń u NAK i dyrekcyi Jeŭrahulniaŭ staŭ usiaho tolki adnym z namieśnikaŭ vialikaj kolkaści načalnikaŭ adździełaŭ Kiraŭnictva spraŭ. Čamu taki niedavier?
Sam Kotaŭ, apynuŭšysia na emihracyi ŭ Polščy, kazaŭ u pryvatnych razmovach, što ŭ Biełarusi jaho ŭ tyja hady padazravali ŭ supracoŭnictvie z polskimi śpiecsłužbami, tamu jaho i pasadziŭšy na małaznačnuju pasadu. My nie možam skazać, ci to praŭda, ci jaho dadumka abo lehienda, kab nabić sabie canu ci stvaryć sabie bijahrafiju.
2020 hod
Paśla byŭ 2020 hod. I Kotaŭ staŭ adnym z tych čynoŭnikaŭ, jakija zvolnilisia ŭ znak pratestu. Demanstratyŭnyja adstaŭki tady mocna natchniali hramadstva. Ludzi bačyli ŭ tym znak, što źnienavidny režym pačaŭ rassypacca, što «mur chutka ruchnie, ruchnie, ruchnie, i pachavaje śviet stary».
«Apošniaj kroplaj stała postvybarnaja situacyja ŭ krainie, kali da hramadzian Biełarusi byŭ užyty taki hvałt, jakoha z časoŭ Vialikaj Ajčynnaj vajny nie bačyli na vulicach Minska dy inšych biełaruskich haradoŭ», — skazaŭ Kotaŭ u intervju tady.
Kali stała jasna, što pratesty ŭ Biełarusi nie pryviaduć da źmieny ŭłady, Anatol Kotaŭ vyjechaŭ ź Biełarusi — heta zdaryłasia ŭžo ŭ žniŭni ci vieraśni. Pra jahony adjezd stała viadoma ŭ kastryčniku 2020-ha. A 8 kastryčnika 2020 hoda źjaŭlajecca telehram-kanał «Nik i Majk».
U Varšavie Kotaŭ dałučajecca da novastvoranaha Nacyjanalnaha antykryzisnaha ŭpraŭleńnia Paŭła Łatuški.
U listapadzie razam z žonkaj i jašče adnym hramadzianinam Polščy jon zasnoŭvaje tavarystva z abmiežavanaj adkaznaściu PBCWP. A ŭ studzieni 2021-ha stanovicca adzinym členam Rady Bielskaha (u Biełaj Padlašskaj) fondu salidarnaści ź Biełaruśsiu.
Nastaśsia Pilipčyk-Kotava ŭ budučyni stanie taksama kaardynatarkaj Biełaruskaha fondu miedycynskaj salidarnaści i siabram praŭleńnia adnajmiennaha polskaha fondu.
Kotaŭ u 2020-m staŭ publičnaj fihuraj, palityčnym kamientataram, palitykam. U jaho byli vialikija płany. Pa słovach jaho tahačasnych kaleh, navat prezidenckija ambicyi.
Ale dvuch lidaraŭ u NAU być nie mahło. Darohi Kotava i Łatuški chutka razyšlisia, pryčym kiepska razyšlisia. Łatuška pryznavaŭsia, što sudzicca z Kotavym za hrošy.
Čytajcie: Łatuška pryznaŭsia, što ŭžo niekalki hadoŭ sudzicca sa svaim byłym paplečnikam Anatolem Kotavym
Kiepskaja kampanija
Kotaŭ zastaŭsia pracavać u Biełaruskim fondzie spartovaj salidarnaści (BFSS) — na čale jakoha stajaŭ kaleha pa dyrekcyi Jeŭrahulniaŭ, Alaksandr Apiejkin.
Praŭda, z BFSS sa skandałam parvali samyja paznavalnyja tvary niezaležnaha sportu — płyŭčycha Alaksandra Hierasimienia i baskietbalistka Alena Leŭčanka.
Kotaŭ taksama staŭ suarhanizataram Forumu demakratyčnych sił — mutnaj inicyjatyvy Valeryja Capkały, Dźmitryja Bałkunca i Volhi Karač, skiravanaj suprać Śviatłany Cichanoŭskaj i Paŭła Łatuški.
U minułym nie było ničoha, što jadnała b Kotava z Capkałam i Karač. Chutčej, jany stali situatyŭnymi vypadkovymi sajuźnikami. Ale mienavita pa adnoj spravie ź imi Kotaŭ atrymaŭ svaje pačesnyja 12 hadoŭ i 600 tysiač štrafu na zavočnym sudzie ŭ Biełarusi.
Takimi ž jaho sajuźnikami stali i palityčnyja hrupoŭki dy infarmacyjnyja resursy, jakija finansuje rasijska-izrailski miljarder Leanid Nieŭźlin.
Mutnyja epizody ŭ NAU, BFSS i Forumie demakratyčnych sił naradzili niedavier da Kotava z boku apazicyjnych aktyvistaŭ. U im stali padazravać chto niesumlennaha čałavieka, a chto — navat krata, zasłanca, jaki pracuje na raskoł. Tym bolš, što z koła Kotava nitki viali i da piersanažaŭ typu błohiera Virusa.
Cikava, što mienavita ludzi z koła «Forumu» da apošniaha adhavorvali siamju i kaleh Kotava padymać šum pra jaho prapažu. Čamu? U nas pakul niama adkazu na hetaje pytańnie.
Ale praciahniem pra Kotava i jaho atačeńnie.
Insajdy «Nika i Majka»
Z Kotavym źviazvali i insajdarski telehram-kanał «Nik i Majk». Na piku jon mieŭ bolš za 100 tysiač padpisčykaŭ (ciapier 15 400). Uzrovień źlivaŭ tudy ŭ 2021 hodzie ŭražvaŭ: hrafiki Łukašenki, abstaviny asabistaha žyćcia čynoŭnikaŭ i siłavikoŭ, dakumienty dla słužbovaha karystańnia, praŭdzivyja historyi ź minułaha pieršaha prezidenta. I ŭsio heta ŭ źjedlivym, abraźlivym dla łukašenkaŭcaŭ styli, z notkami asabistaha da niekatorych zhadanych. Naprykład, da vyšej zhadanaha Ryžankova.
U kanała byli dobryja krynicy ŭ Biełarusi. Tady jašče ŭzrovień strachu byŭ nizki.
Tak, za adpraŭku infarmacyi Kotavu na piać hadoŭ asudzili namieśnika hienieralnaha dyrektara ahienctva BiełTA Siarhieja Adziarychu.
«Padčas praviadzieńnia kompleksu apieratyŭna-vyšukovych mierapryjemstvaŭ atrymanaja infarmacyja pra toje, što supracoŭnik BiełTA Adziarycha, mahčyma, daje telehram-kanału «Nik i Majk» zakrytuju infarmacyju ab pracoŭnym hrafiku Alaksandra Łukašenki», — havaryłasia ŭ materyjałach hetaj spravy. Na toj momant na palityčnyja sudy jašče mahła traplać publika, dziakujučy čamu my viedajem materyjały pracesu ŭ detalach.
Chto vioŭ tyja «apieratyŭna-vyšukovyja mierapryjemstvy» ŭ atačeńni Kotava? Jak vyjavili Adziarychu? Ci byŭ pacuk siarod samich administrataraŭ kanała, jakich, kažuć, było ŭsiaho čatyry? Heta adkrytyja pytańni.
Čytajcie taksama: Namieśnika hiendyrektara BiełTA pa ideałohii asudzili na piać hadoŭ za źlivy telehram-kanału «Nik i Majk»
Paśla 2021-ha insajdy skončylisia. Ciapier «Nik i Majk» blizki da Chartyi'97, i ŭ im publikujecca šmat hipatetyki.
Papoŭ — pierabiežčyk ci zasłaniec?
My nie viedajem, ci byŭ siarod krynic «Nika i Majka» były susied pa kabiniecie i partnior pa biznesie Uładzimir Papoŭ.
Ale «Naša Niva» viedaje ź niekalkich krynic, jakija sutykalisia z Papovym asabista, što paśla 2021-ha jon — były načalnik 4-ha adździeła Słužby achovy prezidenta i były kamandzir čaści HRU Minabarony! — spačatku byvaŭ, a paśla navat i pracavaŭ u Polščy. Choć pry hetym z rasijskich baz danych vynikaje, što da 2022 hoda jon pracavaŭ taksama i ŭ Rasii.
U Biełarusi Uładzimir Papoŭ pakinuŭ dom pobač z učastkam tahačasnaha premjera Ramana Hałoŭčanki, siamiejnyja biznesy, kvatery — dy ŭvohule ŭsio svajo žyćcio.
55-hadovy na siońnia Papoŭ paśla pierajezdu ŭ Polšču nidzie publična nie vykazvaŭsia i nie tłumačyŭ svaich pazicyj i matyvaŭ emihracyi. Ale jon pracavaŭ niejki čas u kampanii Valera Sachaščyka i nie paźbiahaŭ kantaktaŭ z pradstaŭnikami apazicyi. Tak, jon udzielničaŭ u forumie ŭ Karpačy ŭ 2023 hodzie — choć jaho nie było ŭ aficyjnym śpisie ŭdzielnikaŭ jaje.
U tym ža 2023-m Uładzimir Papoŭ — pad ułasnym imieniem, nie na pašpart prykryćcia — na paru z małodšym synam zarehistravali ŭ Polščy tavarystva z abmiežavanaj adkaznaściu NOAB. Asnoŭny vid jaje dziejnaści byŭ zajaŭleny jak «Viadzieńnie internet-sajtaŭ, internet-chostynh, apracoŭka danych». U polskich bazach danych my znachodzim, što ŭ 2024 hodzie hetaja kantora mieła abarot 554 tysiačy złotych (heta kala 150 tysiač dalaraŭ).
Sam fakt vyjezdu takoha vysokapastaŭlenaha siłavika, jak Papoŭ, natchniaŭ tych aktyvistaŭ apazicyi, jakija pra heta viedali. Ale, apytaŭšy ludziej, jakija pra Papova viedali ci pierasiakalisia ź im u Polščy, my vymušanyja kanstatavać, što jany amal ničoha pra jaho nie viedajuć.
Nam dakładna viadoma, što Papoŭ u Varšavie byvaŭ u Kotava doma.
Ci była rola Kotava ŭ vyjeździe Papova ŭ Polšču? Ci była rola Papova ŭ vyjeździe Kotava ŭ Turcyju? Adkazy na hetyja klučavyja pytańni mahli b, mahčyma, pralić śviatło na toje, što zdaryłasia.
My pakul nie zmahli źviazacca z Uładzimiram Papovym i navat nie viedajem, u jakoj krainie jon ciapier znachodzicca.
Varta adznačyć, što ŭ kancy 2020-ha byŭ zatrymany, a ŭ pačatku 2022 hoda asudžany da drakonaŭskich 19 hadoŭ kałonii za nibyta «zdradu radzimie» padpałkoŭnik toj samy čaści HRU №15738 Dźmitryj Samsonaŭ. Heta pakazvaje, nakolki žorstka reahuje łukašenkaŭskaja sistema na lubuju niełajalnaść tych, chto byŭ dapuščany da jaje tajamnic.
Pierachod «na inšy bok» Kotava i asabliva Papova jaŭna pavinien byŭ łukašenkaŭcam smylić. Kali tolki jany pierajšli na toj bok praŭdziva, a nie pa zadańni.
Što adbyłosia ŭ Trabzonie?
Ci mahli Kotava vymanić i vyvieźci z Turcyi ŭ Rasiju? Znajomyja z Kotavym charaktaryzujuć jaho jak ambitnaha čałavieka, jakomu ŭvieś čas chaciełasia być u centry padziej, u centry palityčnych i mižludskich hulniaŭ, heta jaho zachaplała. Kali jaho i mahli vyciahnuć na Čornaje mora, skažam, abiacańniem sustrečy ź niekim upłyvovym ź biełaruskaha isteblišmientu, jaki chacieŭ pieradać jamu važnuju infarmacyju, to naŭrad ci tut abyšłosia biez udziełu kahości, kamu Kotaŭ absalutna daviaraŭ.
Ci moh Kotaŭ vieści ad pačatku, z 2000-ch ci 2010-ch, ci pavieści ź niejkaha momantu ŭ 2020-ch dvajnuju hulniu? Prafiesijnaja i siamiejnaja bijahrafija Kotava to dazvalaje takoje dapuścić: čaho tolki nie byvaje ŭ śviecie śpiecsłužbaŭ i špijanažu. Ale, kab viarnucca z Turcyi ŭ Biełaruś ci Rasiju, jość bolš prostyja maršruty, čym raźmieščany ŭ dalokim kutku krainy, kala samaj miažy z Hruzijaj Trabzon. Našto taki składany šlach?
I jašče taki fakt raskazali nam kalehi Kotava pa apazicyi: usiaho niekalki miesiacaŭ nazad u Varšavu pierajechała ź Biełarusi jahonaja dačka ad pieršaha šlubu. I Kotaŭ kazaŭ kaleham, što jamu važna, kab jana vučyłasia ŭ Polščy.
Dla mejnstrymnych palitykaŭ Kotaŭ moh zdavacca ambitnym vyskačkam, dla aktyvistaŭ apazicyi — mutnaj fihuraj, ale (kali tolki jon nie vioŭ dvajnoj hulni), dla režymu jon usio adno byŭ usiaho tolki niaŭdziačny zdradnik.
Kotaŭ prybyvaje ŭ aeraport Stambuła z Varšavy ŭ 13:49 21 žniŭnia i adrazu ž vylataje ŭ turecki prymiežny horad Trabzon. Rejs sa Stambuła prybyvaje ŭ Trabzon u 18:10. I voś užo ŭ 18:35 Anatol prachodzić pamiežny kantrol u marskim porcie Trabzona. Da 22:30 jon pierapisvajecca z žonkaj — tekstava, u zvyčajnym dla siabie styli. Paśla hetaha śled Anatola Kotava prapadaje. Pavodle źviestak servisu Marine Traffic, na nastupny dzień, 22 žniŭnia, z Trabzona ŭ Sočy vyjšaŭ kruizny łajnier «Astoryja Hrande». Akramia taho, na rejdzie kala Trabzona ŭ toj viečar stajaŭ rasijski suchahruz «Vusał Macharamaŭ», jaki kursiruje miž Turcyjaj i krasnadarskim Jejskam. Heta ŭsio, što na hety momant viadoma.
* * *
Kali vy viedajecie bolš — padkazvajcie nam, na što źviarnuć uvahu, praz sakretny čat u telehramie @nn_editor abo na mejł [email protected]. Abo ŭ Sihnał ci inšym sposabam tym z redaktaraŭ i žurnalistaŭ «NN», jakich viedajecie asabista.
I — naša praca niemahčymaja biez vašaj padtrymki. Kali vy pračytali hety artykuł i vam važna toje, što my robim, padtrymajcie nas praz Patreon, praz Pejpoł, abo pieradaŭšy dapamohu Redakcyi lubym inšym zručnym dla vas sposabam, praz tych redaktaraŭ i žurnalistaŭ «Našaj Nivy», jakich vy viedajecie asabista.
«Naša Niva» — bastyjon biełaruščyny
PADTRYMAĆ
Kamientary