Kachanak Anžaliki Mielnikavaj — ahient biełaruskich śpiecsłužbaŭ z pašpartam prykryćcia
Razam z 32-hadovym Alaksiejem Łabiejevym (dla Anžaliki jon byŭ Alaksiej Hardziejeŭ) jana adpačyvała na Kubie, a paśla i ŭ Šry-Łancy.
Pra heta raskazvajecca ŭ novym rasśledavańni Polityka i The Insider (dapamahali taksama Biełaruski rasśledavalnicki centr, «Bajpoł» i Kibierpartyzany).
Polskaja siabroŭka Mielnikavaj raskazała, što ŭ 2023 hodzie Anžalika pačała bolš aktyŭna sačyć za saboj, pavialičyła vusny, nabiła tatuiroŭki i pajšła ŭ zału, kab skinuć lišniuju vahu. Na adnoj z tatuirovak namalavany ronin-japonski samuraj-najmit, jaki straciŭ haspadara.
U studzieni 2024 hoda, paśla pajezdki na Šry-Łanku, jana vyhladała ščaślivaj i raspaviała siabroŭcy pra zaručyny z mužčynam, «jaki žyvie ŭ Biełarusi, jaki nie moža pryjazdžać u krainy Jeŭrasajuza, tamu jany sustrakajucca ŭ ekzatyčnych krainach».
«Jana pakazvała mnie jaho fota i zaručalny piarścionak. Kazała, što jon ź Biełarusi, što jon spartoviec i što jana ŭ jaho zakachanaja», — kaža siabroŭka Anžaliki.
Z kalehami pa apazicyi Mielnikava hetymi navinami nie dzialiłasia. Siabroŭkam jana raspaviadała, što muž zabaraniaŭ jeździć na sustrečy z žanichom razam ź dziećmi, nie chacieŭ, kab jany razmaŭlali.
U kancy 2024 hoda, kali siabroŭki pacikavilisia ŭ Mielnikavaj, jak iduć spravy ź jaje zaručynami, jana tolki machnuła rukoj. Znajomyja kažuć, što sa studzienia 2025 hoda jana była čymści vielmi zasmučanaja, u jaje zdaralisia niervovyja zryvy. Jana nabrała vahu, płakała i kazała, što ŭ jaje prablemy, ale na pracy hetaha amal nichto nie zaŭvažyŭ.
Apisvajučy prychod Mielnikavaj u apazicyju, The Insider zaŭvažaje: znajomyja z Anžalikaj apazicyjaniery raskazvajuć, što ŭ jaje nie było apazicyjnaha zapału, idejnaści, ułaścivaj im. Kali jana ŭ čymści i vykazvała svaje prahresiŭnyja pohlady, to chiba što ŭ dačynieńni da seksu: u razmovach ź siabrami jana lubiła abmiarkoŭvać svoj udzieł u zakrytych seks-viečarynkach u roznych krainach.
Tһie Insider atrymałasia vyznačyć paluboŭnika Anžaliki Mielnikavaj: heta 32-hadovy Alaksiej Vitaljevič Łabiejeŭ, supracoŭnik biełaruskich śpiecsłužbaŭ, jaki padarožničaŭ pa śviecie z pašpartam na imia Alaksieja Hardziejeva.
Jany pačali sustrakacca nie paźniej za 2023 hod — va ŭsiakim vypadku, z 26 žniŭnia pa 5 vieraśnia jany ŭžo razam lotali na Kubu.
Cikava, što Łabiejeŭ tady płanavaŭ lacieć na Kubu razam z Anžalikaj z Maskvy, ale, mabyć, jana nie ryzyknuła lacieć praz Rasiju i adpraviłasia na vostraŭ ź Jeŭropy. Miarkujučy pa pasažyrskim manifieście, Anžalika ŭ vyniku nie skarystałasia hetymi kvitkami, zatoje tymi ž rejsami z Maskvy na Kubu i nazad razam z «Hardziejevym» lotała jaje mama, Aksana Saŭčanka.
«Ci byli Łabiejeŭ i Mielnikava znajomyja raniej? Jakuju rolu adyhryvała Aksana Saŭčanka? Ci jana zvodziła dačku z ahientam, ci była kštałtu zakładnicy?» — zadajecca pytańniami «Polityka».
Miarkujučy pa bazie pierasiačeńnia miažy, z 16 pa 21 studzienia 2024 hoda Łabiejeŭ lotaŭ na Šry-Łanku, i ŭ tyja ž dni tam była i Anžalika. Mienavita tady jon i zrabiŭ joj prapanovu i padaryŭ piarścionak.
Łabiejeŭ naradziŭsia ŭ siamji biełaruskaha vajskoŭca ŭ 1993 hodzie i skončyŭ vajenny fakultet BDU. U apošnija hady Łabiejeŭ zastavaŭsia niepubličnaj piersonaj, nie vioŭ sacsietak i zaśviaciŭsia tolki adnojčy na mierapryjemstvie z udziełam biełaruskich vajskoŭcaŭ u vajskovym špitali ŭ Hrodnie ŭ 2019 hodzie. Na tym ža fota apynuŭsia tahačasny kiraŭnik Hałoŭnaha raźviedupraŭleńnia Biełarusi (HRU) Rusłan Kasyhin.
U svaim starym akaŭncie «Ukantakcie» Łabiejeŭ paznačyŭ, što skončyŭ Novasibirski dziaržaŭny techničny ŭniviersitet, ale nieviadoma, ci sapraŭdy jon tam vučyŭsia (siabroŭ z Novasibirska ŭ hetym akaŭncie ŭ jaho čamuści niama).
Jašče adzin važny dla hetaha siužetu momant: Łabiejeŭ z 2017 hoda ŭ šlubie z vypusknicaj BDU Marynaj Łabiejevaj (u dziavoctvie Michnaviec). Abodva siabry Łabiejeva na fota ź viasiella — Artur Hryharan i Anatol Žałnoŭ — vajskoŭcy z taho ž fakulteta.
Vajskovy fakultet BDU rychtuje kadry jak dla HRU, tak i dla KDB, i abodva viedamstvy mohuć vydavać dakumienty prykryćcia, tamu adnaznačna vyznačyć afilijacyju składana (jak i ŭ Rasii mahčymy i pramiežkavy varyjant — vajskovaja kontrraźviedka).
Z bolšaj stupieńniu ŭpeŭnienaści možna śćviardžać, što zaručyny Anžaliki viasiellem nie zavieršacca.
Kamientary