Łatuška pryznaŭsia, što ŭžo niekalki hadoŭ sudzicca sa svaim byłym paplečnikam Anatolem Kotavym
U 2021 hodzie ŭźnikła pytańnie ab niedastatkovaj kolkaści dakumientaŭ, jakija paćviardžajuć vydatki fonda «Biełaruś budučyni».
U intervju Jeŭraradyjo Pavieł Łatuška adznačyŭ, što vypadak z Anžalikaj Mielnikavaj — urok dla biełaruskaj apazicyi, i zhadaŭ situacyju, jakaja adbyłasia ŭ 2021 hodzie z fondam «Biełaruś budučyni», staršynioj jakoj na toj čas byŭ były supracoŭnik administracyi Łukašenki i MZS Biełarusi Anatol Kotaŭ.
U emihracyi Kotaŭ staŭ adkaznym za źniešniuju palityku i handal u Narodnym antykryzisnym upraŭleńni Paŭła Łatuški.
«Pry razhladzie partniorami spravazdač u 2021 hodzie ŭźnikła pytańnie ab niedastatkovaj kolkaści dakumientaŭ, paćviardžajučych vydatki.
Pa vynikach analizu my pryjšli da vysnovy, što tak, dakumientaŭ nie chapaje. I my prapanavali Kotavu varyjant — albo jon sychodzić sam, albo my jaho zvalniajem rašeńniem praŭleńnia. Jon syšoŭ sam sa staršyni praŭleńnia», — zhadvaje akaličnaści Łatuška i davodzić, što jany adrazu padali zajavu ŭ palicyju:
«Voś jurydyčnaja pracedura, jak dziejničać, kali nie daj Boh sustreniecca takaja padobnaja situacyja. Padali zajavu ŭ palicyju dziela taho, kab faktyčna prymusić jaho znajści hetyja dakumienty albo panieści adkaznaść».
Pa słovach staršyni Nacyjanalnaha antykryzisnaha ŭpraŭleńnia, palicyja praviała daśledčuju pravierku, ale admoviła ŭ zaviadzieńni kryminalnaj spravy.
«My abskardzili heta rašeńnie. Pajšli ŭ sud, kab prymusić jurydyčna palicyju, prakuraturu zavieści kryminalnuju spravu. I my atrymali admovu.
Pa analizie tych dakumientaŭ, jaki atrymaŭ sud, jon skazaŭ: niama padstaŭ dla zaviadzieńnia niejkaj spravy suprać staršyni praŭleńnia Kotava. U vyniku nam było rekamiendavana pajści ŭ hramadzianski sud», — dzielicca padrabiaznaściami Łatuška i adznačaje, što da hetaj pary fond znachodzicca ŭ hramadzianskim pracesie z Kotavym.
«Na nievialikuju sumu srodkaŭ, ale my idziom pravavoj darohaj»,
— davodzić Łatuška i adznačaje pravilnaść taho, što «Kibierpartyzany» padali zajavu ŭ pravaachoŭnyja orhany pa fakcie źniknieńnia hrošaj z rachunku fondu Białoruś Liberty, jakim kiravała Anžalika Mielnikava.
Ciapier čytajuć
Słova «Unavatuna» značyć «raj». Dzie na Šry-Łancy adpačyvała Mielnikava13
Kamientary