2 vieraśnia ŭ ZŠA va ŭzroście 92 hadoŭ pamierła Hłoryja Stajniem — žurnalistka, hramadskaja aktyvistka i adna z najbolš viadomych pradstaŭnic fieminisckaha ruchu druhoj chvali, piša Bi-bi-si.
Hłoryja Stajniem «mirna pamierła» ŭ svaim domie ŭ Ńju-Jorku ŭ atačeńni blizkich ludziej. Jana dziesiacihodździami zmahałasia za pravy žančyn, u tym liku za repraduktyŭnyja pravy, roŭnaść i mahčymaść žančyn samastojna rasparadžacca svaim ciełam.
Hłoryja Stajniem naradziłasia 25 sakavika 1934 hoda ŭ Ahajo. U 1956 hodzie jana skončyła Śmit-kaledž u Masačusietsie, paśla čaho dva hady žyła ŭ Indyi. Paźniej viarnułasia ŭ ZŠA i pačała žurnalisckuju karjeru.
U 1960‑ia hady Stajniem pisała pra kantracepcyju, žanočyja pravy i dyskryminacyju. U 1969 hodzie jaje ese pra vyzvaleńnie žančyn paśla ruchu za pravy čarnaskurych zrabiła jaje adnoj z najbolš prykmietnych fihur fieminisckaha ruchu.
Stajniem ličyła, što kantrol nad repraduktyŭnymi orhanami źjaŭlajecca adnym ź instrumientaŭ aŭtarytarnych sistem. U 2023 hodzie ŭ intervju Bi-bi-si jana adznačała, što, niahledziačy na dasiahnuty za dziesiacihodździ prahres, žančyny nibyta pa-raniejšamu nie atrymali ŭsich nieabchodnych pravoŭ. U 22 hady sama Stajniem zrabiła abort u Łondanie, kali heta było niezakonna.
U 1971 hodzie jana razam z adnadumcami zasnavała časopis Ms., jaki staŭ adnym ź pieršych vydańniaŭ, pryśviečanych prablemam pravoŭ žančyn. Na jaho staronkach pisali pra seksizm, roŭnuju apłatu pracy, chatni hvałt i prava na abort.
Stajniem taksama vystupała suprać vajny ŭ Vjetnamie, padtrymlivała baraćbu za pravy čarnaskurych amierykancaŭ i ŁHBTK+ ludziej. Jana padkreślivała ciesnuju suviaź pamiž baraćboj suprać rasavaj i hiendarnaj dyskryminacyi i razam ź inšymi aktyvistkami spryjała raźvićciu intersiekcyjanalnaha fieminizmu.
Niahledziačy na krytyčnaje staŭleńnie da tradycyjnaha instytuta šlubu, u 2000 hodzie, va ŭzroście 66 hadoŭ, Stajniem vyjšła zamuž za paŭdniovaafrykanskaha biznesmiena i abaroncu navakolnaha asiarodździa Devida Bejła. Jon pamior ad raku ŭ 2003 hodzie.
Stajniem praciahvała hramadskuju dziejnaść da 2020 hoda. Jana napisała dzieviać knih, a ŭ 2013 hodzie była ŭznaharodžanaja Prezidenckim miedalom svabody — najvyšejšaj cyvilnaj uznaharodaj ZŠA.
Ciapier čytajuć
Vital z-pad Vilejki, jaki padpaliŭ chatu z ułasnymi dziećmi, zavierbavaŭsia ŭ rasijskaje vojska. I prapaŭ na pieršym ža bajavym zadańni2
Kamientary
Kali napisać Gloria Steinem CIA u huhle, to pieršaja spasyłka paśla vikipiedyi budzie na staronku CRU z rassakrečanymi materyjałami.