Zialenski paśla pierastrełki ŭ Kijevie zvolnić namieśnikaŭ kiraŭnikoŭ SBU i HUR
Prezident Ukrainy Uładzimir Zialenski paviedamiŭ, što namieśniki kiraŭnikoŭ Słužby biaśpieki Ukrainy i Hałoŭnaha ŭpraŭleńnia raźviedki Minabarony buduć zvolnienyja paśla ŭzbrojenaha kanfliktu pamiž supracoŭnikami hetych struktur u Kijevie.
Pa słovach Zialenskaha, kadravyja rašeńni ŭžo pryniatyja. Jon zajaviŭ, što adkaznaść za incydent pavinny panieści kiraŭniki, jakija adkazvali za adpaviednyja napramki pracy. Prezident nazvaŭ pierastrełku pamiž padraździaleńniami SBU i HUR «absalutna haniebnaj situacyjaj» i daručyŭ vyśvietlić usie abstaviny.
Pierastrełka adbyłasia 2 vieraśnia. Pavodle viersii SBU, jaje supracoŭniki pravodzili śledčyja dziejańni pa spravie ab padrychtoŭcy rasijskimi śpiecsłužbami zamachu na adnaho z pradstaŭnikoŭ rasijskaj apazicyi. Padčas hetaha jany sutyknulisia z supracivam vajskoŭcaŭ.
Kanflikt źviazvajuć z zatrymańniem Ściapana Kapłunova — namieśnika kamandzira pa bajavoj rabocie «Ruskaha dobraachvotnickaha korpusa», jaki ŭvachodzić u padraździaleńnie HUR «Cimur». U SBU śćviardžajuć, što jon mieŭ kantakty z FSB Rasii i atrymaŭ zadańnie arhanizavać zamach na adnaho ź lidaraŭ rasijskaj apazicyi. Kapłunoŭ hetyja abvinavačańni admaŭlaje.
3 vieraśnia hienieralny prakuror Ukrainy Rusłan Kraŭčanka paviedamiŭ, što ŭ ramkach kryminalnaj spravy ab pierastrełcy dvum asobam — supracoŭniku SBU i vajskoŭcu HUR — abviaścili padazreńnie ŭ niezakonnym prymianieńni ahniastrelnaj zbroi.
Kamientary