Maksim Charošyn z žonkaj adkryli bar na Madejry. Kolki heta kaštavała?
Biznesmien staŭ viadomym u 2020 hodzie paśla taho, jak u 2020 hodzie jaho mocna źbili siłaviki. Charošyn vyjechaŭ u Litvu, dzie adkryŭ kramu kvietak. Ciapier siamja pačynaje biznes na partuhalskim vostravie Madejra. Who is Betty prapanuje haściam vialikuju vinnuju kartu i stravy roznych jeŭrapiejskich krain. Raspytali biznesmiena, jak prachodziła padrychtoŭka da adkryćcia i što značyć takaja tajamničaja nazva bara.
U Minsku Maksim Charošyn byŭ adnym z ułaśnikaŭ staličnaj kvietkavaj kramy «Pieršy kvietkavy». Kvietkami jon zajmaŭsia i ŭ Litvie, kudy emihravaŭ. A ciapier Maksim pierabraŭsia na partuhalskuju Madejru.
Pracuje bar Who is Betty ŭ Funšale — stalicy Madejry. Łakacyja — samy centr horada.
«My prydumali takuju nazvu, kali pili vino ŭ Vilni. Padumali, što treba niešta śviežaje, kab jašče tak dakładna nichto nie nazvaŭ bar. My majem na ŭvazie, što Beci — heta niejkaja tajamničaja dziaŭčynka, jakuju nichto nie bačyŭ», — tłumačyć nazvu restarana Charošyn.
Usie kielichi zahadzia zrabili z łahatypam baru — vusnami. Heta, darečy, nie było prostaj zadačaj.
«Pryjšłosia abjeździć usie drukarni. Znajšli adnu vialikuju, jakoj raspaviali pra našu ideju. Jany skazali, što nie robiać takoje. Ale my da ich pryjazdžali try razy — i jany skazali: ładna, kali vy takija nastojlivyja, raskažycie pra svaju kancepcyju, čamu vy chočacie brendziravać kielichi», — raskazvaje restaratar.
U vyniku ŭ drukarni skazali, što ŭsio zrobiać. «Nie dziela hrošaj, a dziela taho, što my takija śmielčaki».
Pakul bar pracuje ŭ testavym režymie. Z 8:00 i da 15:00 tam možna zakazać śniadanak, z 17:00 — stravy ź viečarovaha mieniu.
Vybar straŭ kasmapalityčny: na śniadanak jość biełaruski, francuzski, niamiecki, anhlijski, ukrainski varyjanty.
«Ja b nazvaŭ našu kuchniu kasmapalityčna-chulihanskaj. Nielha skazać, što jana ŭ nas jeŭrapiejskaja, italjanskaja ci anhlijskaja. Heta kuchnia narodaŭ śvietu — i nam chaciełasia b, kab ludzi, jakija pryjazdžajuć siudy ci tut žyvuć, kaštavali tyja stravy, što asacyjujucca ź ich krainaj».
Mieniu stvarała dziaŭčyna z Kijeva, jakaja ciapier žyvie ŭ Barsiełonie. Admietna, što jana nie prafiesijnaja brend-šef, ale fudzi. Tak nazyvajuć čałavieka, jaki maje dobry hastranamičny hust, šmat vandruje i vyvučaje hastranomiju ŭ roznych krainach — ad Sinhapura da Brytanii.
Charošyn kaža, što dla svajho pieršaha miesca na Madejry abraŭ mienavita takuju śpiecyjalistku. U samim bary taksama buduć pracavać nie partuhalcy: try biełarusy buduć na kuchni, try ŭkraincy — u zale.
Viny restaratar padbiraŭ sam — Who is Betty budzie druhim baram na vostravie, dzie prapanujuć naturalnyja, a nie kłasičnyja hatunki.
«To-bok heta viny biez cukru, biez apracoŭki. Viny z kłasnaj etykietkaj — jany ŭsie śviežyja, naturalnyja», — kaža Charošyn.
Ździŭlać haściej Who is Betty płanuje i ŭvahaj da drobiaziaŭ: zaŭsiody na miescy buduć śviežyja kvietki, kožnamu, chto zamoviŭ vino, buduć pieradavać zapisku ad tajamničaj Beci.
«Maleńki interaktyŭ, kab haściam było pryjemna, viesieła, a nie tolki vypić bakał vina. Bo zrazumieła, što na Madejry vina vielmi šmat», — tłumačyć zasnavalnik.
Charošyn kaža, što z punktu hledžańnia biurakratyi adkryć bar na Madejry nieskładana. Treba tolki padać zajaŭku i mieć damovu arendy. Samy ciažki etap — heta budoŭla. Na jaje treba i šmat dazvołaŭ, i prafiesijny piersanał. Tym, chto zachoča adkryć restaracyju na vostravie, jon raić pryvozić rabočych z saboj.
«Tamu što tut niama kvalifikavanaj pracoŭnaj siły. Kažuć, što jany prafiesijnyja budaŭniki, ale jany nie budaŭniki. Heta jak ludzi z fotaaparatam dumajuć, što jany fatohrafy. Heta cełaja prafiesija».
Padčas ramontu jamu šmat dapamahała žonka Kaciaryna. Chacia jany aboje apošnim časam zajmalisia kvietkavym biznesam, Maksim bolš za 18 hadoŭ adpracavaŭ u restaranach Vadzima Prakopjeva (prajšoŭ šlach ad aficyjanta da kiraŭnika sietki), a Kaciaryna pa śpiecyjalnaści — architektar i dyzajnier interjeraŭ.
Who is Betty — pieršy z troch restaranaŭ na Madejry, jakija para zapłanavała adkryć. Na jaho jany dumali patracić 80 tysiač jeŭra, ale ŭ vyniku atrymałasia kala 100 tysiač. Akupić układańni (častka hrošaj — svaje, častku ŭkładaŭ partnior) Charošyny chočuć maksimum za dva hady.
Ciapier čytajuć
Pamiatajecie Asol Śliviec? Žyćcio frystajlistki źmianiłasia da niepaznavalnaści, ciapier jana Abihal3
Kamientary
I vielmi škada, što svoj patencyjał im davodzicca realizavać nie na Radzimie.