Most nad Vialikim kańjonam Chuaczian nie tolki ŭstanaviŭ šerah suśvietnych rekordaŭ, ale i abiacaje stać novym turystyčnym i ekanamičnym centram adnaho z samych hornych rehijonaŭ Kitaja.
Budaŭnictva mosta praź Vialiki kańjon Chuaczian u pravincyi Hujčžoŭ (Kitaj) nad rakoj Bejpań pačałosia ŭ studzieni 2022 hoda. Jon pavinien złučyć chutkasnaj mahistrallu rajony Lučžy i Ańłun u adnym z samych hornych rehijonaŭ Kitaja.
Jak paviedamlaje sajt Highestbridges.com, vyšynia mosta ad pałuby da ŭzroŭniu vady — 625 mietraŭ. Heta bolš, čym u luboha inšaha mosta ŭ śviecie. Jaho hałoŭny pralot maje daŭžyniu 1420 mietraŭ, što robić most samym doŭhim siarod hornych mastoŭ. Ahulnaja daŭžynia zbudavańnia — amal 2890 mietraŭ.
Niahledziačy na rekordnyja pakazčyki, pavodle Knihi rekordaŭ Hiniesa, ahulny tytuł najvyšejšaj kanstrukcyi (ad samaj vierchniaj kropki da samaj nižniaj) zastajecca za francuzskim vijadukam Mijo.
Vydańnie South China Morning Post dniami raźmiaściła videa vyprabavańniaŭ mosta, jakija praciahvalisia piać dzion i zaviaršylisia 25 žniŭnia.
Inžyniery vykarystali mietad padvojnaj pravierki — statyčnyja i dynamičnyja vyprabavańni. Asnoŭnaja ŭvaha była skiravanaja na pracu kabielaŭ, hałoŭnaha pralotu, viežaŭ i ankieraŭ.
Na most, jak piša China.com, adnačasova zajechała spačatku 18, potym 48, a zatym 96 ciažkahruznych aŭtamabilaŭ ahulnaj masaj bolš za 3300 ton — bolš, čym važyć pusty samalot Airbus A380.
Padčas dynamičnych testaŭ aŭtamabili źmianiali chutkaść, vykarystoŭvali tarmaznyja sistemy, madelujučy realnyja ŭmovy ruchu. Sotni datčykaŭ adsočvali kožnaje naciažeńnie i zruch kanstrukcyi.
Vyniki pravierak paćvierdzili: most pracuje stabilna, usie sistemy dajuć rady nahruzkami Heta značyć, jon całkam hatovy da ekspłuatacyi.
Miesca dla turystaŭ
Most praź Vialiki kańjon Chuaczian — nie tolki technałahičny, ale i architekturny šedeŭr. Kanstruktary nadali jamu kłasičny vyhlad z elemientami art-deko. Viaršyni viežaŭ svajoj formaj nahadvajuć lehiendarny most Załatyja varoty ŭ San-Francyska. Sami viežy majuć roznuju vyšyniu: paŭnočnaja — 262 m, paŭdniovaja — 205 m.
Kanstrukcyja adrazu prajektavałasia nie tolki jak transpartny abjekt, ale i jak unikalny turystyčny kompleks.
Pieršaja atrakcyja — šklany lift, jaki padymie naviedvalnikaŭ da viaršyni paŭdniovaj viežy, dzie raźmieścicca «Bar i kaviarnia zornaha nieba» pamiž asnoŭnymi aporami kabielaŭ, na vyšyni kala 183 mietraŭ nad darohaj.
Druhaja — prahułka pad prajeznaj častkaj. Turysty zmohuć patrapić na 800-mietrovuju piešachodnuju halereju z prazrystaj padłohaj, jakaja stvoryć efiekt chadžeńnia pa abłokach na vyšyni ad 224 da 404 mietraŭ.
Amatary adrenalinu zmohuć skarystacca placoŭkaj dla bandž-džampinhu, jakaja raźmieścicca na vyšyni amal 616 mietraŭ.
Akramia taho, budzie pabudavany vialiki turystyčny centr, pryśviečany historyi kańjona i raźvićciu kitajskaha mostabudaŭnictva. Chto pažadaje zastacca nadaŭžej, zmohuć raźmiaścicca ŭ bunhała ź vidam na kańjon.
Sacyjalna-ekanamičnaje značeńnie
Adkryćcio mosta płanujecca ŭ kancy vieraśnia. Jano stanie pierałomnym momantam dla žycharoŭ rehijona: padarožža praz kańjon, jakoje raniej zajmała kala hadziny, ciapier zojmie ŭsiaho 90 siekund.
Dla adnoj z samych biednych pravincyj Kitaja heta nie tolki ekanomija času, ale i novyja mahčymaści raźvićcia handlu i transpartnych suviaziaŭ, rostu turystyčnaha patoku, stvareńnie novych pracoŭnych miescaŭ.
Jak adznačajuć ekśpierty, sapraŭdnyja vyniki prajekta buduć bačnyja praz hady. Usio zaležyć ad taho, jak ułady zmohuć kiravać turystyčnaj infrastrukturaj i padtrymlivać bałans pamiž ekanomikaj i zachavańniem pryrodnaha łandšaftu.
Ciapier čytajuć
«Ja byŭ suprać, kab mianie mianiali na 20 rasijskich vajskoŭcaŭ. Nie zmoh by hladzieć u vočy ludziam, syny jakich siadziać»: pieršaje intervju eks-mera Chiersona11
Kamientary