Kali dziaržava ŭmiešvajecca ŭ kamiercyjnyja adnosiny pamiž pryvatnymi kampanijami, heta časta značyć, što kahości ź ich jana padazraje ŭ uchileńni ad padatkaŭ. Tak atrymlivajecca i sa «spravaj Softkłuba», pa jakoj prachodzić patryjarch biełaruskaha IT Uładzimir Sirotka i mieniedžary niekalkich pryvatnych bankaŭ: ich padazrajuć u vykarystańni schiem dla minimizacyi padatkaŭ.
Jak stała viadoma «Našaj Nivie» ad niekalkich surazmoŭcaŭ u bankaŭskich kołach, sens pretenzij śledstva da bieniefiecyjaraŭ «Softkłuba» i mieniedžaraŭ asobnych pryvatnych bankaŭ u tym, što tyja nibyta arhanizavali pamiž saboj kambinacyju pa aščadžeńni hrošaj, jakija ŭ inšaj situacyi mielisia b być vypłačanymi ŭ biudžet.
Sens schiemy ŭ kreatyŭnym arbitražy padatkaŭ praz roznyja, vielmi adroznyja pamiž saboj miechanizmy jaho naličeńnia ŭ finansavych arhanizacyj i rezidentaŭ PVT.
Tak, dla bankaŭ padatak na prybytak składaje 25%, a dla rezidentaŭ PVT u bolšaści vypadkaŭ (i vypadak «Softkłuba» jakraz taki) — 0%.
«Śledstva miarkuje, što «Softkłub» nibyta vystaŭlaŭ bankam zavyšanyja ceny na svaje pasłuhi.
Banki ŭličvali hetyja sumy ŭ buchhałtarskaj spravazdačnaści jak svaje vydatki. Takim čynam zanižałasia padatkovaja baza — bo kali b padatak płaciŭ bank, to daviałosia b płacić 25%. A kali «Softkłub», to padatak pa fakcie naličvaŭsia nulavy.
«Što dalej z hetymi srodkami rabili zmoŭščyki — lohka dadumać», — skazaŭ «Našaj Nivie» infarmavany surazmoŭca.
Nahadajem, 23 kastryčnika 2025 hoda pačalisia zatrymańni pa spravie Softkłuba — u siłavikoŭ uźnikli pretenzii da viadučaha IT-pravajdara bankaŭskich rašeńniaŭ u Biełarusi. U hety dzień byŭ zatrymany hienieralny dyrektar i stvaralnik kampanii Uładzimir Sirotka.
Čytajcie: Sprava Softkłuba: zatrymany patryjarch biełaruskaha IT Uładzimir Sirotka i niekalki top-mieniedžaraŭ. Jany padaryli nam ARIP
Praz try dni, 26 kastryčnika, siłaviki pryjšli da staršyni praŭleńnia Ceptar Banka Alaksandra Ihnatava. Paźniej stała viadoma pra prablemy ŭ staršyni banka VTB Uładzimira Lichadzijeŭskaha, a taksama pra zatrymańni mieniedžaraŭ siaredniaj ruki ŭ Pryjorbanku.
Kiraŭnictva «Softkłuba» abvinavačvajuć, jak viadoma «Našaj Nivie», va ŭchileńni ad padatkaŭ i dačy chabaru.
Amal adnačasova z hetym Polšča ŭniesła ŭ nacyjanalny sankcyjny śpis biełaruskuju kryptabiržu Bynex, jakaja taksama, pa sutnaści, naležyć «Softkłubu», ale nie naŭprost, a mieniedžaram i supracoŭnikam «Softkłuba» jak fizičnym asobam.
Čytajcie taksama: Ułaśniku «Softkłuba» Sirotku, jaki siadzić u SIZA KDB, prylacieła i ad Polščy: na jaho kryptabiržu Bynex nakłali sankcyi
«Naša Niva» — bastyjon biełaruščyny
PADTRYMAĆPrakuratura pra śmierć Miełkaziorava: žurnalist mieŭ chraničnuju chvarobu17
Prakuratura pra śmierć Miełkaziorava: žurnalist mieŭ chraničnuju chvarobu
Fiaduta — Kaleśnikavaj: Mašańka, ci viarniciesia na Miesiac, ci nie vučycie žyć tych, chto stamiŭsia nabivać huzy ad čarhovaha nastupańnia na hrabli3535
Kamientary