Sprava Softkłuba: zatrymany patryjarch biełaruskaha IT Uładzimir Sirotka i niekalki top-mieniedžaraŭ. Jany padaryli nam ARIP
Jak stała viadoma «Našaj Nivie», na minułym tydni «źnik» šerah top-mieniedžaraŭ bujnoj IT-kampanii SoftClub, a taksama jaje zasnavalnik Uładzimir Sirotka. Kampanija ŭ asnoŭnym śpiecyjalizujecca na prahramnym zabieśpiačeńni dla bankaŭ i finansavych servisaŭ.
Da Uładzimira Sirotki niemahčyma dazvanicca. U miesiendžarach apošni raz jon byŭ anłajn u čaćvier, 23 kastryčnika. Na pracy, jak viadoma «Našaj Nivie», jon taksama nie źjaŭlajecca, jak i šerah inšych mieniedžaraŭ. Supracoŭnikam daviali, što načalstva masava na balničnych.
Kampanija SoftClub zasnavana ŭ 1993 hodzie i źjaŭlajecca adnym ź biełaruskich IT-hihantaŭ. U TAA «Softkłub» i TAA «Softkłub centra raspracoŭki» stanam na 2025 hod sumarna pracujuć 622 čałavieki, u raniejšych intervju Sirotka kazaŭ pra 1000 supracoŭnikaŭ pa ŭsim śviecie.
Vyručka dźviuch kampanij pa vynikach 2024 hoda — 105,4 miljona rubloŭ.
U asnoŭnym kampanija akazvaje pasłuhi bankam — jak dziaržaŭnym, tak i pryvatnym, — i biznesu, kampanija maje bujnyja kantrakty ź dziaržavaj.
Samaja znakamitaja raspracoŭka — AIS «Raźlik» (ARIP), praź jakuju fizičnyja i jurydyčnyja asoby mohuć rabić apłaty i vystaŭlać rachunki.
U apošnija hody SoftClub taksama pajšoŭ u śfieru kryptavalut, zasnavaŭšy biržu Bynex.
Surazmoŭcy «Našaj Nivy» źviazvajuć sens pretenzij z padatkovymi pytańniami i ŭziatym kursam na baraćbu z vyvadam kapitału.
Viadoma, što ŭ kancy 2024 hoda źmianiłasia forma ŭłasnaści abiedźviuch kampanij: mažarytarnym akcyjanieram stała kazachskaja chołdynhavaja kampanija «Eśsihrup kz łtd», na karyść jakoj vypłačvalisia dyvidendy.
Uładzimir Sirotka naradziŭsia ŭ 1960 hodzie. Skončyŭ miechanika-matematyčny fakultet BDU. Niekalki hod adpracavaŭ u NDI «Ahat», raspracoŭvajučy prahramnaje zabieśpiačeńnie dla vajenna-pramysłovaha kompleksu. U kancy 1993 hoda staŭ dyrektaram kampanii «Softkłub».
Chobi Sirotki — mini-futboł. Jon padtrymlivaje kamandu «Stalica», jakaja hod za hodam pieramahaje ŭ čempijanacie Biełarusi i ŭdzielničaje ŭ Lizie čempijonaŭ.
Kamientary