Miežy adkryvajucca. A što ź vizami? Voś jakija krainy ich vydajuć achvotniej
Paśla adkryćcia miažy ź Litvoj i dvuch dadatkovych punktaŭ propusku na miažy z Polščaj, vyjechać ź Biełarusi ŭ Jeŭrasajuz stała našmat praściej. Ale treba mieć dziejnuju šenhienskuju vizu. Što ciapier pa cenach i terminach?
Ci sapraŭdy trapić u Jeŭropu stanie praściej?
Mnohija ŭ apošnija hady nie rabili viz u tym liku tamu, što vyjechać ź Biełarusi było fizična składana. Bilety na aŭtobus u Vilniu darahija, a ŭjezd na aŭto praź Litvu ź biełaruskimi numarami dastupny tolki dla biełarusaŭ ź litoŭskaj vizaj, DNŽ abo hramadzian ES. Na miažy z Polščaj — vielizarnyja čerhi z aŭtobusaŭ i lehkavych mašyn.
Z adkryćciom adrazu dvuch punktaŭ propusku na miažy z Polščaj situacyja źmianiłasia, i inviestycyi ŭ vizy pačali mieć bolšy sens.
Vizavaja ekśpiertka i redaktarka visaflow.live Nastaśsia Łysakoŭskaja kaža, što pakul nie adčuła pavyšeńnia popytu na vizy.
«Miarkuju, što popyt vyraście, ale z adterminoŭkaj, chutčej za ŭsio, užo paśla Novaha hoda», — kaža Łysakoŭskaja.
Na jaje dumku, ludzi spačatku buduć pryhladacca da situacyi — ci sapraŭdy možna budzie chutka pierasiakać miažu. Pakolki za apošnija hady ŭsie ŭžo pryzvyčailisia da vielizarnych čerhaŭ.
Pry hetym vyhladaje, što pra viartańnie da situacyi, jakaja była jašče da pandemii, razmovy i blizka nie idzie.
«Atrymać vizu, i asabliva doŭhaterminovuju, ciapier vielmi składana», — kaža vizavaja ekśpiertka.
Ciapier zastajecca zusim niašmat krain, jakija achvotna dajuć vizy biełarusam.
Ispanija — najlepšy varyjant, ale ź niuansami
Praściej za ŭsio, pa słovach Łysakoŭskaj, atrymać ispanskuju vizu, ale i tam nie bieź niuansaŭ.
«Asabliva ŭ płanie samastojnaj padačy Ispanija — badaj što najlepšy varyjant, ale apošnim časam naziraju, što pavialičyłasia kolkaść admoŭ. Čaściej za ŭsio tak adbyvajecca, kali heta pieršaja viza», — tłumačyć ekśpiertka.
Zvyčajna Ispanija daje vizy terminam na 1‑3 miesiacy. Radziej, kali ŭ čałavieka raniej užo była ispanskaja viza, jamu mohuć adkryć novuju na 6‑12 miesiacaŭ.
Termin razhladu — 45 dzion. Kali čałaviek budzie rabić usio samastojna, to viza abydziecca jamu ŭ 350‑800 rubloŭ, a z pamahataram — u 900‑1600 rubloŭ.
Aproč dobraj vizavaj historyi, na pazityŭnaje rašeńnie, pa nazirańniach ekśpiertki, mohuć upłyvać dobryja finansavyja pakazčyki zajaŭnika. Kali razmova idzie pra vypisku z rachunku, to na im musić być nie mienš za 2‑3 tysiačy jeŭra.
«Ispanija krytyčna stavicca da pryviazki da radzimy i maje vysokija patrabavańni ŭ finansavych pytańniach», — tłumačyć ekśpiertka.
Samym chutkim varyjantam atrymać vizu Łysakoŭskaja nazyvaje Hrecyju. Termin razhladu — 20 dzion, ale Hrecyja vydaje vizy tolki pad adnu pajezdku.
Italija — łajalnyja, ale zapisacca składana
«Italjancy bolš łajalnyja, jany vydajuć vizy na bolš praciahły termin i razhladajuć ciaham 2‑3 tydniaŭ. Adnak zapisacca na padaču vielmi składana».
Kali rabić z dapamohaj pasiarednikaŭ, to za čałavieka moža atrymlivacca navat da 2000 dalaraŭ.
Sa słoŭ ekśpiertki, u italjanskija vizy zvyčajna inviestujuć tyja, chto moža sabie heta dazvolić finansava i choča vybudavać dobruju vizavuju historyju, kab u rešcie rešt atrymać italjanski šenhien na 2‑3 i navat na 5 hadoŭ.
Polšča — kali jość zaprašeńnie, to praściej
Što z polskimi vizami?
«Z zapisam ciapier vielmi składana, asabliva pa minskaj akruzie — dajuć vielmi mała miescaŭ. U hrodzienskaj akruzie situacyja krychu lepšaja, a ŭ bresckaj — samaja dobraja.
Viedaju ludziej u Minsku, jakija nijak nie mohuć zapisacca na padaču jašče ad pačatku leta».
Praściej tolki ludziam starejšym za 60 hadoŭ, bo jany padajucca biez zapisu. Taksama davoli prosta atrymać polskuju vizu tym, chto maje zaprašeńnie ad blizkich svajakoŭ, jakija atrymali mižnarodnuju abaronu ŭ Polščy.
«Takija ludzi mohuć zrabić nataryjalna zavieranaje zaprašeńnie, napisać na poštu konsułu, i im pryznačajuć datu padačy ŭ konsulstvie. Heta zručny varyjant, ale tolki dla abmiežavanaj katehoryi ludziej».
Viza pad tur
Siarod varyjantaŭ, jak jašče možna atrymać vizu, Łysakoŭskaja nazyvaje akredytavanyja turystyčnyja ahiencyi, jakija pradajuć tury i, adpaviedna, robiać pad ich vizy. Ale dla hetaha daviadziecca nabyć tur i źjeździć u jaho.
Atrymać šmatrazovuju doŭhaterminovuju vizu pa-raniejšamu składana. Pa nazirańniach ekśpiertki, z kožnym hodam situacyja tolki horšaje.
Ciapier čytajuć
Pamiatajecie ŭkrainku, jakuju rasijanie pryviazali da słupa? Tyja, chto jaje katavaŭ, za hady vajny amal usie zahinuli. A voś što robić ciapier jana2222
Kamientary