«Aburajucca tolki biełarusy». Bolšaja častka 100‑tysiačnaha polskaha horada ŭ marazy zastałasia biez aciapleńnia
Žychary polskaha horada Ułacłavek u Kujaŭska-Pamorskim vajavodstvie zastalisia biez aciapleńnia i haračaj vady z-za avaryi na ciepłasietcy. Pa paviedamleńniach haradskich uładaŭ, bieź ciapła akazałasia prykładna pałova nasielnictva, ci 50 tysiač čałaviek, a pa płoščy avaryja zakranuła 60% Ułacłaŭka. U škołach admianili zaniatki, dziciačyja sadki prosiać baćkoŭ nie pryvodzić dziaciej. Siamja biełarusa Siarhieja žyvie ŭ horadzie ŭžo hod. Jon raskazaŭ vydańniu Most, što adbyvajecca va Ułacłaŭku.
Pra prablemy stała viadoma ŭ paniadziełak, 16 lutaha. Meryja horada paviedamiła, što pryčynaj avaryi staŭ razryŭ truby dyjamietram 600 mm — paškodžańnie znajšli ŭ niaŭdałym miescy, prykładna za 300‑400 mietraŭ ad haradskoj ciepłastancyi. Enierhasistema pačała pracavać u avaryjnym režymie, žycharoŭ papiaredzili pra źnižeńnie tempieratury ŭ damach, paprasili biez patreby nie adčyniać vokny, zakryć ralety i žaluzi, kab źmienšyć ciepłastraty.
18 lutaha haradskija ŭłady paviedamili, što aciapleńnie viarnuli ŭ šerah rajonaŭ.
«Raparty miascovych kamunalnikaŭ byli badzioryja»
Siamja Siarhieja žyvie ŭ Polščy, apošni hod — va Ułacłaŭku. Z padobnaj avaryjaj jon sutykajecca ŭpieršyniu.
«U paniadziełak (16 lutaha. — Zaŭv. Most) u siaredzinie dnia my zaŭvažyli, što źnikła aciapleńnie. Uviečary nam napisali sa škoły, što zaniatkaŭ zaŭtra nie budzie. Sadok taksama paprasiŭ dziaciej nie pryvodzić. Aŭtorak byŭ viasiołym dniom: my pracavali razam ź dziećmi, — raskazvaje jon. —
Raparty miascovych kamunalnikaŭ byli badzioryja — što apoŭnačy jany znajšli miesca avaryi, cełuju noč niešta tam rychtavali i ź piaci hadzin ranku jany pracujuć nad likvidacyjaj nastupstvaŭ. Abiacali heta skončyć učora nadviačorkam. Ale i ŭviečary my atrymali anałahičnaje paviedamleńnie, što ŭ škole znoŭ nie budzie zaniatkaŭ i sadok prosić nie pryvodzić dziaciej. Dzieci radyja, naturalna, a baćki — nie nadta».
Siarhiej kaža, što dom, dzie jon žyvie, ciopły, tamu zaraz tempieratura ŭ kvatery składaje plus 19 hradusaŭ. Ale pastupova stanovicca mienš kamfortna.
«Žonka ŭžo nadzieła druhuju koftu, — kaža jon. — Kamunikaty badzioryja. [Maŭlaŭ], usio dobra, usio pad kantrolem. Chutka ŭsio budzie zroblena, a heta [avaryja] niby nievialičkaja prykraść».
Baćkoŭ turbuje taksama, što dzieci zastajucca doma — z małymi składana pracavać. Starejšaja dziaŭčynka — školnica, a šaścihadovy syn zvyčajna naviedvaje sadok.
«Dačka moža spakojna pasiadzieć, a syn — nie, jon ža futbalist, jamu treba varušycca».
Siarhieja ździviła, što miascovyja žychary davoli spakojna pastavilisia da situacyi.
«Aburajucca tolki biełarusy, palaki moŭčki tryvajuć. Kali z sadka pišuć, što prosiać dziaciej nie pryvodzić, ja vykazvaju abureńnie. A palaki pišuć: «Dobra, Zosia zastaniecca doma».
U Smalavičach try tydni bje haračy hiejzier
Kleck zastaŭsia biez vady. Nie vytrymali 50‑hadovyja truby
Minenierha: Ludzi pavinny z razumieńniem stavicca da źnižeńnia tempieratury ŭ kvaterach
Jašče ŭ adnym horadzie adbyłasia avaryja na ciepłatrasie, dziasiatki damoŭ zastalisia biez aciapleńnia
Z-za avaryi na ciepłatrasie ŭ Minsku zaŭvažyli marozny smoh. Ci niebiaśpiečny jon?
Ciapier čytajuć
Śpievaka z «Marafonu adzinstva» asudzili za palityku — pryhadali kamientary 2020-ha. Baranić u sud jaho chadzili siostry Hruździevy15
Kamientary