«Za pryhniot biełaruskaha naroda i za toje, što jon kradzie budučyniu ŭ biełarusaŭ». MZS Ukrainy zaklikała partnioraŭ uzmacnić cisk na Łukašenku
Ministr zamiežnych spraŭ Ukrainy Andrej Sibiha źviarnuŭsia da mižnarodnych partnioraŭ ab uzmacnieńni cisku, kab režym Alaksandra Łukašenki adčuŭ adekvatny adkaz za złačynstvy suprać ukrainskaha i biełaruskaha narodaŭ. Pra heta havorycca ŭ zajavie MZS.
Jak rastłumačyŭ Sibiha, siońniašnija sankcyi suprać Łukašenki i jaho režymu źjaŭlajucca adpaviednaj, nieabchodnaj i adekvatnaj reakcyjaj na hibrydnyja pahrozy i pahrozy biaśpiecy, jakija jon ujaŭlaje dla Ukrainy i astatniaj Jeŭropy.
Ministr nahadaŭ, što režym u Minsku źjaŭlajecca saŭdzielnikam złačynstva ahresii Rasii suprać Ukrainy, bo Łukašenka «pradastaviŭ biełaruskuju terytoryju dla napadu i praciahvaje dapamahać Maskvie ŭ jaje hienacydnaj vajnie suprać Ukrainy — resursami, kampanientami, materyjałami, abychodam sankcyj i navat sistemaj retranślacyjnych stancyj dla kiravańnia ŭdarnymi dronami».
«My zaklikajem partnioraŭ rušyć za našym prykładam i zabiaśpiečyć, kab Łukašenka adčuŭ adekvatny cisk za svaje złačynstvy razam z Pucinym, za jaho pryhniot biełaruskaha naroda i za toje, što jon kradzie mahčymaści i budučyniu ŭ pakaleńniaŭ biełarusaŭ», — padkreśliŭ Sibiha.
Pavodle słoŭ kiraŭnika MZS, va Ukrainie vierać u jeŭrapiejskuju budučyniu biełaruskaha naroda paśla taho, jak jon vyzvalicca ad pryhniotu Łukašenki.
«U budučyni my budziem hatovyja pryniać demakratyčnuju Biełaruś u farmacie Lublinskaha trochvuholnika razam z Polščaj i Litvoj. Biełaruś naležyć Jeŭropie, a nie «ruskamu śvietu»», — dadaŭ Sibiha.
18 lutaha prezident Ukrainy Uładzimir Zielenski zajaviŭ ab prymianieńni sankcyj suprać biełaruskaha Łukašenki.
Ciapier čytajuć
Na Minskim paŭmarafonie pamior 50‑hadovy biahun. Voś što viadoma pra Alaksieja Dašynieviča17
Kamientary