A voś i nie ŭ 20. Kali mužčyny nasamreč dasiahajuć piku seksualnaha žadańnia?

Kamanda daśledčykaŭ z Estonii i Vialikabrytanii praanalizavała danyja 67 334 darosłych z estonskaha bijabanka. Uzrost udzielnikaŭ vahaŭsia ad 20 da 84 hadoŭ, siaredni składaŭ 47 hadoŭ. Ab vynikach raskazvaje FitBook.de.

Meta daśledavańnia — zrazumieć, jak demahrafičnyja i žyćciovyja faktary źviazanyja ź indyvidualnym uzroŭniem seksualnaha žadańnia. Uličvalisia poł, uzrost, seksualnaja aryjentacyja, status u adnosinach, kolkaść dziaciej, niadaŭnija rody, adukacyja, prafiesija i zadavolenaść partniorstvam.

Jak vymiarali žadańnie

Apytańnie pravodziłasia anłajn ź listapada 2021 da krasavika 2022 hoda. Seksualnaje žadańnie aceńvali praź dźvie śćviardžalnyja frazy:

— «Ja maju mocnaje seksualnaje žadańnie»;

— «Ja nie časta dumaju pra seks».

Adkazy statystyčna apracavali i paraŭnali pamiž roznymi hrupami. Daśledčyki vykarystoŭvali jak prostyja paraŭnańni, tak i składanuju rehresiŭnuju madel, u jakoj usie faktary analizavalisia adnačasova.

U vyniku poŭnaja madel patłumačyła 28,3% adroźnieńniaŭ u ŭzroŭni seksualnaha žadańnia — dla psichałahičnych daśledavańniaŭ heta vysoki pakazčyk.

Poł i ŭzrost — hałoŭnyja faktary

Najbolš značnymi pradkazalnikami akazalisia poł i ŭzrost. Mužčyny va ŭsich uzrostavych hrupach paviedamlali pra bolš vysoki ŭzrovień žadańnia, čym žančyny. Pry hetym roźnica z hadami tolki pavialičvałasia i była najbolš vyraznaj paśla 60 hadoŭ.

U cełym z uzrostam libida źmianšajecca, ale ŭ žančyn hety spad značna macniejšy. Adnak samaje niečakanaje — uzrostavy pik.

Žančyny demanstrujuć najvyšejšy siaredni ŭzrovień žadańnia ŭ pačatku treciaha dziasiatka. Mužčyny ž dasiahajuć svajho piku prykładna ŭ 40 hadoŭ — značna paźniej, čym zvyčajna ličycca.

Daśledavańnie taksama pakazała, što mužčynskaje žadańnie adnosna stabilnaje na praciahu žyćcia. U žančyn ža jano bolš źmienlivaje i adčuvalnaje da žyćciovych etapaŭ — ciažarnaści, mienapaŭzy, a taksama da nahruzki, źviazanaj z kłopatam pra dziaciej.

Dzieci i prafiesija

Status u adnosinach upłyvaŭ niaznačna: ludzi ŭ partniorstvie mieli krychu vyšejšyja pakazčyki, čym adzinokija.

Najaŭnaść dziaciej i niadaŭnija rody pakazali słabuju, ale statystyčna značnuju suviaź. Ludzi bieź dziaciej abo tyja, u kaho dzicia źjaviłasia ciaham apošniaha hoda, mieli krychu vyšejšy ŭzrovień žadańnia.

Prafiesijnyja hrupy adroźnivalisia macniej, čym čakałasia. Vyšejšyja pakazčyki adznačalisia ŭ vajennasłužačych, apierataraŭ mašyn i kiraŭnikoŭ (mieniedžaraŭ), nižejšyja — u šarahovych ofisnych supracoŭnikaŭ i dapamožnych rabočych. Adukacyja praktyčna nie ŭpłyvała na vyniki.

Što heta aznačaje

Vyniki padkreślivajuć, što bijałahičnyja i sacyjalnyja faktary dziejničajuć razam. Harmony, takija jak testasteron, biezumoŭna važnyja, ale nie mienš istotnyja sacyjalnyja roli, čakańni i žyćciovyja abstaviny.

Toj fakt, što mužčyny dasiahajuć piku žadańnia kala 40 hadoŭ, moža być źviazany sa stabilnymi adnosinami, bolšaj emacyjnaj blizkaściu abo źmienaj pryjarytetaŭ u siarednim uzroście.

Cikavym źjaŭlajecca i ŭpłyŭ baćkoŭskaj roli: u toj čas jak mužčyny z bolšaj kolkaściu dziaciej, jak praviła, paviedamlajuć pra bolš vysokaje seksualnaje žadańnie, u žančyn jano źnižajecca. Heta dazvalaje mierkavać, što kłopat pra dziaciej i źviazanaja z hetym nahruzka pa-roznamu ŭpłyvajuć na adčuvańnie žadańnia.

Daśledčyki miarkujuć, što atrymanyja imi danyja mohuć być karysnymi dla raźvićcia seksałahičnaj i psichaterapieŭtyčnaj dapamohi — z ulikam uzrostu, siamiejnaha statusu i žyćciovaj situacyi čałavieka.

Abmiežavańni

Niahledziačy na maštab, daśledavańnie maje šerah abmiežavańniaŭ. Seksualnaje žadańnie vymiarałasia tolki dvuma ahulnymi śćviardžeńniami biez padziełu na partniorskuju i indyvidualnuju matyvacyju. Taksama nie bralisia pad uvahu psichałahičnyja aśpiekty, takija jak typ asoby, emacyjnyja patreby abo madeli pavodzin u adnosinach.

Aŭtary adznačajuć sa spasyłkaj na papiarednija daśledavańni, što hetyja faktary mahli b rastłumačyć dadatkovyja 10—15 pracentaŭ varyjatyŭnaści vynikaŭ.

Akramia taho, źviestki hruntujucca na samaacency respandentaŭ, a ŭ temach seksualnaści ludzi mohuć padśviadoma karektavać adkazy pad sacyjalnyja normy.

• 4
• 1
• 2
• 1
• 0
• 1
• 0
• 0