Byłoha načalnika ŽESa i člena vybarkama asudzili za palityku

Mikałaju Łachanskamu 38 hadoŭ. Jon rodam z Navahrudku. Na vučobu chłopiec pierajechaŭ u Minsk, dzie skončyŭ Biełaruski dziaržaŭny technałahičny ŭniviersitet u 2010‑m hodzie.

Viadoma, što Mikałaj doŭhi čas pracavaŭ u sistemie kamunalnaj haspadarki Minska. U 2014‑m jon kiravaŭ ŽEU №35 u Pieršamajskim rajonie Minska. U 2018‑m byŭ dyrektaram žyllova-ekspłuatacyjnaj kantory №2 Savieckaha rajona Minska.

Łachanski taksama traplaŭ u śpisy vybarčych kamisij. U rašeńni administracyi Pieršamajskaha rajona Minska ad 2016 hoda jon byŭ siabram kamisii na ŭčastku №630 ad rajonnaj arhanizacyi BRSM. 

Mužčyna žanaty i maje dačku. Apošnim časam žyŭ u Viazyni pad Minskam.

U damavych čatach Mikałaj tłumačyŭ susiedziam, čamu moža nie cyrkulavać haračaja vada, prapanoŭvaŭ, jak pravieryć, ci nie pierakryty sušylnik ručnikoŭ, dapamahaŭ vybrać źmiešvalnik u vannuju.​ Adno z hałoŭnych jahonych zachapleńniaŭ — futboł, najpierš anhlijskaja liha i kłub «Mančester Junajted».

Mikałaja asudzili ŭ 2026 hodzie ŭ Minskim haradskim sudzie. Jaho abvinavačvali ŭ «sadziejničańni ekstremisckaj dziejnaści». Miarkujučy z usiaho, pieraśled źviazany sa spravaj Hajuna.

Prysud nieviadomy, ale heta chatniaja chimija.

Biełaruski Hajun — manitorynhavy OSINT-prajekt, jaki byŭ stvorany ŭ 2022 hodzie, kali Rasija praź Biełaruś napała na Ukrainu. Hajun adsočvaŭ vajennuju aktyŭnaść rasijskich i biełaruskich vojskaŭ, abapirajučysia na infarmacyju ad biełarusaŭ. Kaardynavała jaho dziejnaść hrupa aktyvistaŭ na čale z Antonam Matolkam.

Sprava Hajuna pačałasia paśla taho, jak siłaviki zatrymali aktyvistku, jakaja niekalki hadoŭ žyła ŭ Biełarusi ŭ padpolli. U jaje mabilniku znajšli spasyłku na dałučeńnie ŭ bot Hajuna, jakuju joj dasyłali ŭ samym pačatku isnavańnia prajekta. Fatalnaja pamyłka była ŭ tym, što spasyłka była biesterminovaja. A tamu siłaviki zmahli padklučycca da bota i ściahnuć adtul usiu infarmacyju. Jany atrymali paviedamleńni akaŭntaŭ, jakija pisali ŭ bot, a taksama ichnija ID i imiony karystalnikaŭ.

Samu ž dziaŭčynu zatrymali praz toje, što jana była vymušanaja źviarnucca ŭ dziaržaŭnyja struktury, da miedykaŭ. U jaje chłopca, jaki chavaŭsia razam ź joj, pačalisia mocnyja prablemy sa zdaroŭjem na fonie aryštu jaho baćki.

Zasnavalnik Hajuna Anton Matolka adrazu paśla ŭzłomu patłumačyŭ, jak adbyŭsia vyciek infarmacyi i abviaściŭ pra zakryćcio prajekta. 

Ministerstva zamiežnych spraŭ Ukrainy ŭ svajoj zajavie z nahody aryštaŭ pa spravie Hajuna kanstatavała, što ŭ Biełarusi za Łukašenkam padstavaj dla represij moža stać litaralna što zaŭhodna «navat nieaściarožna vymaŭlenaje biełaruskaje słova».

«My pierakananyja, što takija advolnyja zatrymańni majuć na mecie stvareńnie «abmiennaha fondu», dziakujučy jakomu Alaksandr Łukašenka raźličvaje kuplać sabie indulhiencyi ŭ abmien na nievinavatych ludziej, jakich jon kidaje ŭ turmy», — padkreśliła ŭkrainskaje dypłamatyčnaje viedamstva.

• 0
• 0
• 0
• 0
• 0
• 0
• 0
• 0