Ci achviaravać svaimi kroŭnymi dla prajekta kulturnaha adpačynku pa-salechardsku? Pra turkompleks u Kraskach

Takim čynam, paznajomilisia my z Vadzimam Hienadzievičam u pačatku 2021 hoda, kali ja jašče tolki prystupiŭ da vykanańnia svaich słužbovych abaviazkaŭ jak dyrektar «Majontka Padarosk». Pa-susiedsku zajechaŭ da ŭłaśnika, kab pradstavicca i abmierkavać aktualnyja pytańni.

Siarod takich važna było pahavaryć pra kancepcyju restaŭracyi i rekanstrukcyi pałaca, jakuju kulturnuju misiju budzie vykonvać prajekt, jakuju ekanamičnuju madel možna realizavać na padstavie kancepcyi. Sami my byli ŭ pracesie farmavańnia takoj vizii, intelektualna šturmavali zadaču kancepcyi pa Padarosku. Dziakuj papiarednikam, było na što abapiracca i što vyvučać.

Pry tym, što ja byŭ davoli mocna pahružany ŭ temu kancepcyi i rychtavaŭsia pačuć adnu z tych, jakija ŭžo prychodzili nam na rozum, ja niedaacaniŭ Vadzima Hienadzieviča. Čałaviek jon pramy i adrazu vykłaŭ svaju viziju i zadaču maksimum.

Pakolki asiarodździe pałaca Krasak vielmi izalavanaje — z adnoha boku adrezanaje ad vioski Kraski rečyščam Zelvianki, a ź inšaha boku prykrytaje vysokaj nadpojmiennaj terasaj, z dvuch inšych bakoŭ terytoryja topkaja i nieprachodnaja, to heta idealnaje miesca, kab zaprašać na sabantui čynoŭnikaŭ i hienierałaŭ, dzie jany mohuć nie bajacca na karačkach abryhanyja poŭzać, bo nichto ich nie pabačyć. Sapraŭdy niečakanaja i ekzatyčnaja ideja kancepcyi dla prajekta, jaki ažyćciaŭlajecca na historyčna-kulturnaj kaštoŭnaści.

Bolš ničoha vartaha ŭ razmovie nie prahučała, i my rasstalisia. Ja jašče zajazdžaŭ da Vadzima Hienadzieviča ź niekatoraj rehularnaściu, kab pryhladacca da taho, jak viaducca raboty, jakija prajektnyja rašeńni prymajucca, jakija materyjały i technałohii vykarystoŭvajucca, jak prachodziacca pracedury i ŭzhadnieńni. Ale kožny raz akazvałasia, što častka hetych słoŭ dla Vadzima Hienadzieviča małazrazumiełyja i navat adkaznyja śpiecyjalisty, jakija pracavali sa svaim zakazčykam, nie zmahli jamu rastłumačyć, dla čaho isnujuć peŭnyja narmatyvy.

Nu i voś dachodzim da finalnaj častki apovieda. Bo minuły raz my bačylisia z Vadzimam Hienadzievičam Sielichavym letam 2023 hoda, kali paśla amal 6 miesiacaŭ źniavoleńnia ja vyjšaŭ z hrodzienskaha SIZA. Va Ukrainie skončylisia aźviarełyja šturmy Bachmuta, atmaśfiera była vielmi napružanaj, a ja jašče zastavaŭsia pad śledstvam, zachoŭvałasia niapeŭnaść majho statusu. Ale, niahledziačy na heta, ja vyrašyŭ zajechać, kab pabačyć jak daloka prasunulisia pracesy ŭ Kraskach.

I sapraŭdy pracesy zajšli vielmi daloka. Kali mianie ŭbačyŭ ułaśnik, to adrazu ž zajaviŭ, što jon padtrymlivaje ŭłady, Pucina, što ja «chaču kak v Ukrainie», skazaŭ, što ja «vrah» i što jon zabaraniaje mnie znachodzicca na jaho terytoryi. Usio što ja moh, heta nahadać jamu, što jon znachodzicca ŭ Biełarusi, a nie va Ukrainie, i što tut była i budzie Biełaruś. Na hetym my i raźvitalisia.

Nie viedaju, što dumajuć čynoŭniki z Nacyjanalnaha ahienctva pa turyźmie, ci hatovyja jany dałučycca da čarady pjanych i abryhanych asobaŭ, jakich kaliści sabie nakreatyviŭ uradženiec soniečnaha Salecharda, ale dumaju što luby prystojny biełaruski aficer ci dziaržaŭny słužačy nikoli nie dazvolić sabie pryniać prapanovu pa takim kulturnym adpačynku. Usio ž u nas biełarusaŭ i ŭ Biełarusi jość pavaha da čałaviečaj hodnaści i honar za toje, kim my jość.

Ciapier chacieŭ by źviarnucca da biełarusaŭ, jakija lubiać svaju ziamlu, atrymlivajuć asałodu ad sustrečy sa skarbami našaj nacyjanalnaj spadčyny. Ci achviaravać Vam svaimi kroŭnymi hrašyma dla prajekta kulturnaha adpačynku pa-salechardsku, ja nie mahu Vam ukazvać, ale ja dakładna nie zmahu i navat pry mahčymaści nie budu.

Ale pamiatajcie, što jość vielmi kłasnyja abjekty, jakija adrodžanyja i ci znachodziacca ŭ pracesie restaŭracyi i jakim vielmi treba Vašaja dapamoha i hrošy!

I ja havaru nie tolki pra raskručanyja Ružanski i Kosaŭski pałacy, heta kažu i pra muziejny kompleks Napaleona Ordy ŭ Varacevičach, i pra restaŭravany pałac Narkieviča-Jodki ŭ Nadniomnie, kudy lepš skiravać svaje stopy i nie stanavicca na sklizkija ściežki vakoł kraskaŭskaha pałaca.

• 4
• 0
• 0
• 3
• 0
• 0
• 2
• 0