Andrej Kurejčyk źniaŭ film u malaŭničaj siadzibie ŭ Kraskach, a na rolu ŭziaŭ samoha ambasadara Francyi
U Nacyjanalnym mastackim muziei skončylisia zdymki novaha prajekta režysiora i scenarysta Andreja Kurejčyka «LIBERTÉ» (u litaralnym pierakładzie «Svaboda»), pieradaje aŭtar na svajoj staroncy ŭ fejsbuku.
Fiłasofskaja drama zdymałasia na praciahu ŭsioj vosieni spačatku ŭ vioscy Kraski Vaŭkavyskaha rajona na miažy z Polščaj, a zatym i ŭ Minsku. Pry hetym padrychtoŭka da prajekta pa słovach stvaralnikaŭ išła try hady.
«Paśla pośpiechu «Dvižienija vvierch» ja vyrašyŭ, što pryjšła para zrabić niešta surjoznaje ŭ Biełarusi, — raspaviadaje pradziusar i režysior dramy «LIBERTÉ» Andrej Kurejčyk. — Razam z maim siabram i saaŭtaram jašče z časoŭ «Vyšej za nieba» Dźmitryjem Maryninym byŭ abrany siužet, jaki my prapracoŭvali niekalki hadoŭ, pakul, narešcie, mienavita hetaj vosieńniu niečakana dla nas usio nie skłałasia razam: scenar, kamanda, cudoŭnyja akciory».
Dla prajekta «LIBERTÉ» kinakampanii «BiezBusłou Arts» pryjšłosia parušyć praviła «kino pra biełarusaŭ, dla biełarusaŭ i siłami tolki biełaruskaj kamandy». Prajekt atrymaŭsia mižnarodnym: adnu z hałoŭnych rolaŭ u biełaruskaj karcinie syhrała zorka niamieckaha kino i telebačańnia niemiec Žan-Mark Bircholc.
Jašče adnu rolu niečakana prymieryŭ na siabie Nadzvyčajny i paŭnamocny pasoł Francyi ŭ Respublicy Biełaruś Dydźje Kanies. Heta pieršy vypadak, kali dziejny dypłamat takoha ranhu niepasredna biare ŭdzieł u zdymkach niezaležnaha biełaruskaha kino.
Hałoŭnuju rolu ŭ filmie syhrała viadučaja aktrysa Nacyjanalnaha teatra imia Janki Kupały Śviatłana Anikiej, jakuju kinahladač užo palubiŭ za roli ŭ filmach «Chrustal» Darji Žuk i «Voziera radaści» Alaksieja Pałujana. Akramia Śviatłany Anikiej u filmie syhrali Siarhiej Ułasaŭ, Jarasłaŭ Škurataŭ, Juryj Caroŭ i Jeva Anikiej.
Dla artystaŭ prajekt byŭ vielmi składanym nie tolki z-za tvorčych zadač i ekśpiedycyi ŭ addalenuju viosku Kraski, ale i tamu, što film zdymaŭsia adrazu na 4 movach: ruskaj, niamieckaj, francuzskaj i biełaruskaj.
U kadry kožny ź piersanažaŭ havaryŭ na svajoj rodnaj movie. Atrymałasia ŭnikalnaja multylinhvistyčnaja kinaprastora.
Premjera biełaruskaj dramy «LIBERTÉ» čakajecca ŭ 2020 hodzie. Film byŭ źniaty bieź dziaržaŭnaj padtrymki.
U Estonii aryštavany Aleh Maisiejeŭ, kažuć jaho znajomyja. Heta były kiroŭca Cichanoŭskaj, jaki z časam staŭ jaje zaciatym krytykam23
Kamientary