Uładalnik «MŁ Viciebsk» pra mety kłuba: Vyjhrać čempijanat, Kubak i Supierkubak, a taksama prajści ŭ hrupavy etap adnaho ź jeŭrakubkaŭ
Uładalnik «MŁ Viciebsk» Arciom Lavonaŭ raskazaŭ pra zadačy, jakija stajać pierad kamandaj na siezon-2026, a taksama prakamientavaŭ čutki pra zarobak navička kamandy Valeryja Hramyki, piša football.by.
«Mety kamandy nastupnyja: vyjhrać čempijanat, Kubak i Supierkubak, a taksama prajści ŭ hrupavy etap adnaho ź jeŭrakubkaŭ», — skazaŭ Arciom Lavonaŭ.
Jon taksama prakamientavaŭ čutki pra zarobak najlepšaha hulca krainy minułaha hoda Valeryja Hramyki ŭ 1,5 miljona rubloŭ, što padpisaŭ kantrakt z «MŁ Viciebsk», syšoŭšy z kazachstanskaha «Kajrata».
«Vidać, jany ličać, što kali na Transfermarkt košt futbalista składaje 1,5 miljona rubloŭ [sajt, dzie aceńvajecca patencyjny košt futbalistaŭ — NN], to jon i pavinien stolki zarablać. A kali surjozna, to, viadoma, suma nie adpaviadaje rečaisnaści, bo ŭmovy ŭ Hramyki prykładna takija ž, jak i ŭ inšych našych lidaraŭ», — skazaŭ Lavonaŭ.
Raniej jon raskazvaŭ pra zarobki ŭ kłubie: «U nas kala 30% hulcoŭ atrymlivajuć zarpłatu $300—500. Na samoj spravie vysokaapłatnych ludziej nie tak šmat — heta Zachar Vołkaŭ i Alaksandar Miesaravič. Jość niekalki hulcoŭ, jakija atrymlivajuć kala $10 000. U nas takich troje». Viałosia pra Vołkava i sierba Miesaraviča, proźvišča treciaha hulca Lavonaŭ nie nazvaŭ.
«MŁ Viciebsk» (z 2021 hoda kłub nazyvaŭsia «Maksłajn», bo sponsar — bukmiekierskaja kampanija) u siezonie-2024 zaniaŭ druhoje miesca ŭ čempijanacie pieršaj lihi, vyjšaŭ u vyšejšuju i adrazu vyjhraŭ jaje i ŭletku budzie startavać u pieršym raŭndzie kvalifikacyi Lihi čempijonaŭ.
U minułym hodzie ŭ kvalifikacyi Lihi čempijonaŭ čempijon krainy minskaje «Dynama» vybyła ŭžo ŭ pieršym raŭndzie, prajhraŭšy bałharskamu «Łudahorcu», a ŭ druhim kvalifikacyjnym raŭndzie Lihi kanfierencyj biez šancaŭ prajhrała ałbanskaj «Ehnacii». Hrodzienski «Nioman» dabraŭsia da płej-of kvalifikacyi Lihi kanfierencyj, dzie prajhraŭ ispanskamu «Raja Valekana».
U siezonie 2024‑2025 minskaje «Dynama» hulała ŭ asnoŭnym raŭndzie Lihi kanfierencyj.
Pierad hetym z 2019 hoda biełaruskija kłuby nie dabiralisia da hrupavoha raŭndu jeŭrakubkaŭ.
Čempijanat Biełarusi pačniecca ŭ sakaviku, u 1/4 finału Kubku Biełarusi «MŁ Viciebsk» 8 i 15 sakavika zhulaje z bresckim «Dynama».
Kamientary