Zorny biełaruski akcior Ihar Sihoŭ pajšoŭ u kiroŭcy aŭtobusa. Kaža, što heta lepš, čym u taksi
Akcior Ihar Sihoŭ raspavioŭ, što siońnia jaho pieršy pracoŭny dzień u jakaści kiroŭcy aŭtobusa. «Asvoiŭ jašče adno chobi. Čamu b i nie. Polšča daje takija mahčymaści, znajści štości dla dušy», — kaža jon.
«Naša Niva» raspytała Sihova, čamu jon pramianiaŭ pracu ŭ taksi na aŭtobusny maršrut.
Ihar Sihoŭ — zasłužany artyst Biełarusi, akcior teatra i kino. 20 hadoŭ pracavaŭ u Respublikanskim teatry biełaruskaj dramaturhii, u tym liku dyrektaram. Praciahnuŭ karjeru ŭ Kupałaŭskim teatry, adkul syšoŭ na znak pratestu ŭ 2020 hodzie. U emihracyi dałučyŭsia da trupy «Volnyja Kupałaŭcy».
Prafiesijnyja pieramieny najpierš źviazanyja ź pierajezdam u inšy horad.
«My pierajechali z Varšavy ŭ Hrodzisk-Mazaviecki, heta 40 kiłamietraŭ ad stalicy. Tamu i pryjšłosia šukać novuju pracu. Aŭtobusy mnie cikavyja, dyj nie treba budzie płacić za arendu mašyny, za salarku, jak z taksi».
Akcior prajšoŭ trochmiesiačnyja padrychtoŭčyja kursy — teoryju na polskaj movie zdaŭ ź pieršaha razu, a voś z praktykaj spatrebiłasia čatyry zachody.
«To stresavaŭ, to niešta niedzie nie moh skazać pa-polsku adrazu. Tamu pajšoŭ zaraz jašče na moŭnyja kursy», — tłumačyć Sihoŭ.
Navučańnie kaštavała kala $2500, pałovu sumy zapłaciła samo pradpryjemstva PKS, pałovu novaśpiečany kiroŭca pavinien budzie adpracavać.
Na pieršy čas Iharu Sihovu davieryli kiravać nievialikim aŭtobusam z maršrutam №29. Hrafik — piać dzion na tydzień sa źmienami z 4:00 da poŭdnia ci z 14:00 da 23.00.
«My, akciory, kaniečnie, lubim paspać, ale budu pryzvyčajvacca da rańnich padjomaŭ. U taksi jany taksama jość, kali ty chočaš zarabić hrošy», — raskazvaje jon.
Novaha pracadaŭcu Ihar papiaredziŭ, što pa asnoŭnaj śpiecyjalizacyi jon akcior, tamu pry najaŭnaści kinošnych ci teatralnych prajektaŭ pryjdziecca adprošvacca i padmianiacca z kalehami. Papiarednie Sihoŭ, naprykład, byŭ zaćvierdžany na rolu ŭ mastackim filmie, zdymki jakoha zapłanavanyja na kaniec leta.
Akcior nie vyklučaje, što ŭ budučyni jon vyjdzie na aŭtobusnyja maršruty Varšavy.
«Jakraz nabiarusia dośviedu, napracuju staž. Chto jaho viedaje, jak pojdzie. Ale ŭvohule ja b chacieŭ sieści za styrno mižnarodnaha aŭtobusa Varšava — Minsk, kab my ŭsie pajechali na im adnojčy ŭ svabodnuju Biełaruś».
Ciapier čytajuć
Stvaralnica sietki kafe Myloverberry raspaviała, jak razam z mužam zahnała paśpiachovy biznes u daŭhi1
Kamientary
Niachaj los jamu ščaścić i spryjaje va ŭsim.