Z pačatku lutaha ŭ Biełaruś zalacieli jak minimum try rasijskija drony
Masavych zalotaŭ rasijskich bieśpiłotnikaŭ u Homielskuju vobłaść, jak heta raniej zdarałasia padčas atak na terytoryju Ukrainy, pakul nie nazirajecca. Adnak kolkaść takich vypadkaŭ pavialičyłasia. Da takoj vysnovy pryjšło vydańnie «Fłahštok» paśla analizu ŭkrainskich manitorynhavych kanałaŭ.
Z pačatku lutaha zafiksavana jak minimum try takija zaloty. Apošni adbyŭsia ranicaj 7 lutaha: u 06:49 kanał «Rynda manitoryć» paviedamiŭ, što adzin dron ulacieŭ u Homielskuju vobłaść praz Čarnobyl. A ŭžo ŭ 07:13 źjaviłasia infarmacyja, što bieśpiłotnik lacić ź Biełarusi ŭ bok Čarnobyla. Imavierna, havorka išła pra toj samy aparat.
Dniom raniej, 6 lutaha, u 03:01 toj ža kanał paviedamlaŭ, što rasijski dron ruchajecca z terytoryi Biełarusi ŭ napramku Oŭruča. Pry hetym pra dakładnaje miesca i čas jaho zalotu ŭ Biełaruś nie paviedamlałasia.
Jašče raniej, 5 lutaha, pavodle kanała «jeRadar» para bieśpiłotnikaŭ ulacieła ŭ Biełaruś, paśla čaho nakiravałasia ŭzdoŭž miažy ŭ bok Kijeŭskaj abo Žytomirskaj abłaściej. Pra ich dalejšy los infarmacyi niama.
Takim čynam, za pieršy tydzień lutaha adbyłosia nie mienš za try zaloty dronaŭ. U studzieni było zafiksavana vosiem takich vypadkaŭ. Dla paraŭnańnia: u śniežni 2025 hoda nie było nivodnaha paćvierdžanaha fakta pierasiačeńnia biełaruskaj miažy, a ŭ listapadzie zafiksavali čatyry vypadki.
Bolš aktyŭnaje vykarystańnie terytoryi Biełarusi rasijskimi dronami supała z zajavaj prezidenta Ukrainy Uładzimira Zialenskaha pra niejtralizacyju častki anten u pamiežnych rajonach Biełarusi, jakija, pavodle jaho słoŭ, spryjali rasijskim atakam. Jon adznačyŭ, što Rasija doŭhi čas stvarała pavietranyja kalidory dla ŭdaraŭ pa ŭkrainskaj enierhietycy, u tym liku z dapamohaj dronaŭ, a techničnaja padtrymka ažyćciaŭlałasia praz abstalavańnie na antenach u Biełarusi. Pa słovach Zialenskaha, Ukraina znajšła sposab paŭpłyvać na častku hetaj infrastruktury, kab źmienšyć maštaby atak.
Akramia taho, pavieličeńnie kolkaści zalotaŭ supała z tym, što rasijskija vajskoŭcy stracili dostup da sistemy Starlink.
Adklučeńnie «Starlinkaŭ»: jak heta paŭpłyvała na ŭkrainskuju i rasijskuju armii
Trahiedyja ŭ Charkaŭskaj vobłaści: rasijski dron zabiŭ u domie traich małych dziaciej
U Biełarusi raspracavali novy ŭdarny bieśpiłotnik
Ukraina zajaŭlaje, što ŭdaryła «Fłaminha» pa palihonie, adkul Rasija zapuskaje «Arešnik». Jaki vynik?
Kamientary