Масавых залётаў расійскіх беспілотнікаў у Гомельскую вобласць, як гэта раней здаралася падчас атак на тэрыторыю Украіны, пакуль не назіраецца. Аднак колькасць такіх выпадкаў павялічылася. Да такой высновы прыйшло выданне «Флагшток» пасля аналізу ўкраінскіх маніторынгавых каналаў.
З пачатку лютага зафіксавана як мінімум тры такія залёты. Апошні адбыўся раніцай 7 лютага: у 06:49 канал «Рында маніторыць» паведаміў, што адзін дрон уляцеў у Гомельскую вобласць праз Чарнобыль. А ўжо ў 07:13 з’явілася інфармацыя, што беспілотнік ляціць з Беларусі ў бок Чарнобыля. Імаверна, гаворка ішла пра той самы апарат.
Днём раней, 6 лютага, у 03:01 той жа канал паведамляў, што расійскі дрон рухаецца з тэрыторыі Беларусі ў напрамку Оўруча. Пры гэтым пра дакладнае месца і час яго залёту ў Беларусь не паведамлялася.
Яшчэ раней, 5 лютага, паводле канала «еРадар» пара беспілотнікаў уляцела ў Беларусь, пасля чаго накіравалася ўздоўж мяжы ў бок Кіеўскай або Жытомірскай абласцей. Пра іх далейшы лёс інфармацыі няма.
Такім чынам, за першы тыдзень лютага адбылося не менш за тры залёты дронаў. У студзені было зафіксавана восем такіх выпадкаў. Для параўнання: у снежні 2025 года не было ніводнага пацверджанага факта перасячэння беларускай мяжы, а ў лістападзе зафіксавалі чатыры выпадкі.
Больш актыўнае выкарыстанне тэрыторыі Беларусі расійскімі дронамі супала з заявай прэзідэнта Украіны Уладзіміра Зяленскага пра нейтралізацыю часткі антэн у памежных раёнах Беларусі, якія, паводле яго слоў, спрыялі расійскім атакам. Ён адзначыў, што Расія доўгі час стварала паветраныя калідоры для ўдараў па ўкраінскай энергетыцы, у тым ліку з дапамогай дронаў, а тэхнічная падтрымка ажыццяўлялася праз абсталяванне на антэнах у Беларусі. Па словах Зяленскага, Украіна знайшла спосаб паўплываць на частку гэтай інфраструктуры, каб зменшыць маштабы атак.
Акрамя таго, павелічэнне колькасці залётаў супала з тым, што расійскія вайскоўцы страцілі доступ да сістэмы Starlink.
Цяпер чытаюць
Айцішніка з «Варгеймінга» судзілі па расстрэльным артыкуле. Падобна, за падтрымку Украіны — праўда, зрабіць ён нічога не паспеў2
Каментары