Bai iduć užo na Dnieprapiatroŭščynie. Jakaja situacyja kala Kupianska, Pakroŭska i Dabrapolla
Rasijskaja armija praciahvaje svoj letni nastup va Ukrainie, pastupova zachoplivajučy nievialikija nasielenyja punkty i zvužajučy ŭkrainskim vojskam prastoru dla manieŭru. Uzbrojenym siłam Ukrainy dziakujučy pastajannamu kantrolu nad polem boju z pavietra i najaŭnaści ŭ pieradavych padraździaleńniaŭ vialikaj kolkaści ŭdarnych dronaŭ da hetaha času ŭdavałasia paśpiachova strymlivać nacisk bujnych miechanizavanych złučeńniaŭ. Adnak ukraincam dahetul nie ŭdajecca adaptavacca da rasijskaj taktyki napadaŭ małalikimi piachotnymi i raźviedvalnymi hrupami, jakija časta prasočvajucca skroź abarončyja pazicyi, piša vajskovy analityk Illa Abišaŭ na Bi-bi-si.
Na mnohich učastkach USU nie mohuć dazvolić sabie sucelnuju liniju abarony, nasyčanuju piachotaj, pakolki na adkrytaj miascovaści takija pazicyi źjaŭlajucca vielmi ŭraźlivymi. Hetym karystajucca rasijskija vojski, abychodziačy ŭkrainskija bajavyja punkty. Jany pranikajuć u tył i nazapašvajuć siły dla novaha ŭdaru.
Samaja składanaja situacyja dla USU pa-raniejšamu vakoł Pakroŭska, a taksama na Limanskim kirunku i ŭ Charkaŭskaj vobłaści ŭ rajonie Kupianska.
Ale spačatku — pra situacyju na Paŭdniovadanieckim kirunku, dzie bai ŭžo pierakinulisia na terytoryju Dnieprapiatroŭskaj vobłaści. U sieradu ŭkrainski Hienštab paćvierdziŭ, što rasijskija vojski ŭvarvalisia na terytoryju Dnieprapiatroŭščyny. Pavodle jaho infarmacyi, bai praciahvajucca ŭ rajonie viosak Zaparožskaje i Novahieorhijeŭka.
U paviedamleńni USU adznačajecca, što hetyja nasielenyja punkty jašče nie akupavanyja, a siły abarony Ukrainy spynili rasijskaje prasoŭvańnie. Na kartach Amierykanskaha instytuta vyvučeńnia vajny i ŭkrainskaha analityčnaha partała DeepState paznačany kantrol rasijskaj armii nad nievialikim učastkam poŭdnia Dnieprapiatroŭskaj vobłaści — pamiž Danieckam i Zaparožžam.
Tut dziejničaje rasijskaja hrupoŭka vojskaŭ «Uschod», zadačaj jakoj źjaŭlajecca zachop reštkaŭ terytoryi Danieckaj vobłaści na paŭdniovy zachad ad Pakroŭska i stvareńnie ŭmoŭ dla dalejšaha nastupu ŭ kirunku Zaparožža ŭ abychod ukrainskich umacavańniaŭ pa linii Stepnahorsk — Arechaŭ — Hulajpole z poŭnačy.
U apošnija tydni tempy rasijskaha prasoŭvańnia na hetym učastku frontu byli vyšejšyja, čym na ŭsich astatnich. Rasijskija vojski zrušyli viektar napadaŭ ad Novapaŭłaŭki na poŭdzień i praciahvajuć prasoŭvańnie prykładna na 30-kiłamietrovym adrezku — ad Zialonaha haju da Temiraŭki, u kirunku Novamichajłaŭki i Pakroŭska. Na asobnych učastkach u ich atrymlivałasia zachoplivać da 5-7 kvadratnych kiłamietraŭ u sutki — pa mierkach ciapierašniaj vajny heta šmat.
Vidavočna, što dla USU niebiaśpieku ŭjaŭlaje nie stolki sam fakt uvachodu rasijskich padraździaleńniaŭ u administracyjnyja miežy Dnieprapiatroŭskaj vobłaści — heta chutčej padstava dla infarmacyjnaha šumu, čym realnaja pahroza.
Kudy bolš nadzionnaj dla ŭkrainskaha kamandavańnia źjaŭlajecca patreba stabilizavać usiu liniju frontu na zachad ad Daniecka. Inakš uzrastaje nahruzka na złučeńni, jakija abaraniajucca na poŭdzień, u rajonie taho ž Hulajpola. Uzmacniajecca cisk na ich łahistyku.
Rasijskaja hrupoŭka «Uschod» atrymała surjoznyja padmacavańni i vidavočna nastrojenaja raźvivać pośpiech, dziejničajučy pavodle pryncypu «dzie tonka — tam i rviecca». Dla vajskoŭcaŭ na poli boju administracyjnaja prynaležnaść čarhovaha zaniataha imi siała abo lesapałasy nie maje nijakaha značeńnia.
Vierahodna, dadańnie reziervaŭ dazvolić USU adbić čarhovuju rasijskuju ataku — pa paviedamleńniach ź miesca padziej, na paŭdniovym vystupie Dnieprapiatroŭskaj vobłaści rasijskaje prasoŭvańnie ŭdałosia spynić. Ale raźviazańnie łakalnaj prablemy nie zdymaje inšych vyklikaŭ dla ŭkrainskaha vojska na Paŭdniovadanieckim i inšych kirunkach.
Rajon Kupianska
USU tak i nie ŭdałosia likvidavać rasijski płacdarm na zachodnim bierazie raki Askoł — jon pašyryŭsia nastolki, što rasijanie ŭžo ŭščylnuju nablizilisia da Kupianska z poŭnačy i pahražajuć pierarezać asnoŭnuju trasu zabieśpiačeńnia horada, jakaja viadzie na zachad.
Pavodle danych vajskovaha analityka hrupy «Infarmacyjny supraciŭ» Kanstancina Mašaŭca, pieradavyja padraździaleńni rasijskaj 6-j ahulnavajskovaj armii abychodziać Kupiansk.
«Zamacavalisia ŭ rajonie haradskich mohiłak, zapraŭki «Ukraŭtahaz» i prasunulisia dalej da Sobaleŭki. Jany blizkija da vykanańnia nastupnaj zadačy — pierarazańnie darohi na Čuhujeŭ», — paviedamiŭ Mašaviec.
Na jahonuju dumku, nieŭzabavie bai pryjdziecca vieści ŭžo niepasredna ŭ samim horadzie.
Niekatoryja rasijskija błohiery ŭžo śćviardžajuć, što bai iduć niepasredna ŭ Kupiansku. U Amierykanskim instytucie vyvučeńnia vajny (ISW) nie znajšli hetamu paćviardžeńnia; pavodle ich infarmacyi, za minułyja sutki rasijanam nie ŭdałosia prasunucca.
«27 i 28 žniŭnia rasijskija vojski atakavali ŭ rajonie samoha Kupianska; na zachad ad Kupianska — u rajonie Sabaloŭki; na poŭnač — u rajonie Hałuboŭki i ŭ kirunku Kałodzieznaha; i na paŭnočny ŭschod — u rajonie Kamienki», — piša ISW.
Surjoznaj pieraškodaj dla nastupleńnia rasijskaj armii pad Kupianskam źjaŭlajecca vodnaja pieraškoda. Jak vynikaje z paviedamleńniaŭ ź miesca padziej, praz udary USU rasijskija vojski nie mohuć pierapravić ciažkuju techniku i matacykły praz raku Askoł, i im davodzicca pierapraŭlacca ŭnačy pieššu, pa miełkavodździ, hrupami da 20 čałaviek.
Liman, Sieviersk, Časaŭ Jar
Nie słabieje i rasijskaje nastupleńnie na ŭschod i poŭnač ad Limana — važnaha apornaha punkta USU na Sievierskim kirunku. Na hieałakacyjnych kadrach, apublikavanych 28 žniŭnia, dvoje rasiejskich vajskoŭcaŭ padymajuć ściah u rajonie Novamichajłaŭki (na poŭnač ad Limana), što śviedčyć pra toje, što rasijskija vojski niadaŭna prasunulisia da paŭnočna-ŭschodniaj uskrainy nasielenaha punkta.
Pavodle źviestak ISW, 27 i 28 žniŭnia rasijskija vojski atakavali rajon Limana ź piaci kirunkaŭ: z poŭnačy, paŭnočnaha zachadu, paŭnočnaha ŭschodu, uschodu i paŭdniovaha ŭschodu — u kirunku Jampala i ŭ rajonie Sievierskaha lesu. Rasijskija vajskovyja krynicy adznačajuć, što prasoŭvańniu vojskaŭ RF u rajonie Sievierskaha lesu pieraškadžajuć vodnyja pieraškody.
Rasijskija vojski taksama nastupajuć u kirunku samoha Sievierska, sprabujučy abyści horad z fłanhaŭ, ale za apošnija niekalki sutak im nie ŭdałosia prasunucca.
Tryvožnaja situacyja składvajecca dla USU i ŭ rajonie Kanstancinaŭki — rasijskija vojski nastupajuć na horad ź niekalkich kirunkaŭ: z paŭnočnaha ŭschodu — z boku Časavaha Jara, z paŭdniovaha ŭschodu — z boku Tarecka, z poŭdnia — z boku Ščarbinaŭki, i z paŭdniovaha zachadu — z boku Jabłynieŭki i Alaksandra-Kalinavaha.
Za apošnija sutki paćvierdžanaha prasoŭvańnia rasijskich čaściej nie zafiksavana, ale ŭ cełym situacyja tam dla ŭkrainskaj armii praciahvaje paharšacca.
Rasijskaja sproba prarvacca na poŭnač ad Pakroŭska ŭ kirunku horada Dabrapolle zachłynułasia — zaraz tam praciahvajucca žorstkija sustrečnyja bai. U toj ža čas rasijskaja armija nie admaŭlajecca ad namieraŭ całkam akružyć Pakroŭsk i susiedni Mirnahrad, atakujučy z poŭnačy i paŭdniovaha zachadu ŭ kirunku hałoŭnaj trasy zabieśpiačeńnia, jakaja złučaje hetyja harady z Paŭłahradam.
Taksama paviedamlajecca, što dyviersijna-raźviedvalnyja hrupy 2-j ahulnavajskovaj armii RF zaniali pasiołak Źvierava na paŭdniovy zachad ad Pakroŭska i pačali pastupova pranikać u horad.
Ciapier pieradavym rasijskim padraździaleńniam nie ŭdajecca nazapasić dastatkova sił dla paŭnavartasnaha šturmu, pakolki jany vymušanyja vieści bai za ŭtrymańnie ŭžo zachoplenych rajonaŭ.
Zrešty, niama i prykmiet taho, što USU atrymajecca niejak pierałamać situacyju — im pastajanna davodzicca adbivać šmatlikija rasijskija ataki, pierakidajučy reziervy na samyja haračyja ŭčastki frontu.
Delehatka KR Karpušonak paśla maŭčańnia apublikavała videa31
Delehatka KR Karpušonak paśla maŭčańnia apublikavała videa
Biełaruski psichijatr: Palihraf z 100 chłusaŭ nie vyjavić dvuch. A siemiarych tych, chto kaža praŭdu, abvinavacić u chłuśni — i heta pa aptymistyčnych acenkach1616
Kamientary