Asnoŭny vynik samitu na Alascy palahaje ŭ tym, što prezident Rasii Uładzimir Pucin nibyta choča zamarozić vajnu va Ukrainie ŭ abmien na zdaču astatniaj častki Danieckaj vobłaści. Rasija kantraluje kala 70% hetaj vobłaści, uklučna z abłasnym centram, paśla bolš jak dziesiacihadovych bajoŭ, u jakich Danieččyna i susiedniaja Łuhanščyna byli kryvavym sercam kanfliktu. Zachop usioj Danieckaj vobłaści dazvoliŭ by Rasii zamacavacca ŭ hetym rehijonie, a taksama paźbiehnuć dalejšych značnych vajennych strat. Dla Ukrainy adychod z zachodniaj častki Danieččyny aznačaŭ by ciažkuju stratu nie tolki terytoryi, što moža vyklikać novuju chvalu biežancaŭ, ale i padzieńnie farpostu suprać mahčymaha dalejšaha nastupu Rasii. VVS piša, čamu hetaja terytoryja maje takoje vialikaje značeńnie.
Što dahetul kantraluje Ukraina
Pavodle acenki ahienctva Reuters, Ukraina dahetul utrymlivaje kala 6 600 kv. km terytoryi ŭ Danieckaj vobłaści.
Tam zastajecca prykładna čverć miljona čałaviek, paviedamili niadaŭna miascovyja čynoŭniki.
Siarod hałoŭnych haradskich centraŭ — Kramatorsk, Słaviansk, Kanstancinaŭka i Družkaŭka.
Heta terytoryja źjaŭlajecca častkaj hałoŭnaha pramysłovaha rehijona Ukrainy — Danbasa, choć jaho ekanomika razburana vajnoj.
«Realnaść u tym, što dostup da hetych resursaŭ, najchutčej, budzie niemahčymy prynamsi ciaham dziesiacihodździa z-za minnych paloŭ», — skazała ŭ kamientary Reuters doktarka Marni Haŭlet, vykładčyca kafiedry rasijskaj i ŭschodniejeŭrapiejskaj palityki ŭ Oksfardskim univiersitecie.
«Hetyja ziemli całkam razburanyja, hetyja harady całkam ściortyja z tvaru ziamli», — dadała jana.
U čym vajskovaja kaštoŭnaść terytoryi
Niadaŭni dakład amierykanskaha Instytuta vyvučeńnia vajny (ISW) apisvaje «pojas krepaściaŭ», jaki ciahniecca na 50 km praz zachodniuju častku Danieččyny.
«Ukraina ciaham apošnich 11 hadoŭ układała čas, hrošy i vysiłki va ŭmacavańnie hetaha pojasa fartyfikacyjnych zbudavańniaŭ i stvareńnie značnaj abaronnaj pramysłovaj i achoŭnaj infrastruktury», — havorycca ŭ dakładzie.
Havorka pra akopy, bunkiery, minnyja pali, supraćtankavyja zaharody i kalučy drot.
Rasijskija vojski, što nastupajuć u napramku Pakroŭska, «sprabujuć jaho zachapić, i na heta, imavierna, spatrebiacca hady», śćviardžaje ISW.
Fartyfikacyi biezumoŭna źjaŭlajucca častkaj ukrainskaj abarony, ale važnuju rolu adyhryvaje i reljef.
«Miascovaść dosyć zručnaja dla abarony, asabliva vyšynia Časavaha Jara, jakaja padmacoŭvała ŭkrainskuju liniju», — skazaŭ u kamientary BBC News Nik Rejnałds, navukovy supracoŭnik pa suchaputnaj vajnie ŭ brytanskim Karaleŭskim abjadnanym instytucie abaronnych daśledavańniaŭ (RUSI).
Adnak jon dadaje: «Kali pahladzieć na tapahrafiju Danbasa i Uschodniaj Ukrainy ŭvohule, to jana ŭ cełym nie nadta spryjalnaja dla ŭkraincaŭ».
«Horad Danieck raźmieščany na ŭzvyššy. Dalej, kali ruchacca na zachad, usio idzie ŭniz, i heta nie nadta dobra dla ŭkraincaŭ u płanie viadzieńnia abaronnych apieracyj».
«Havorka nie tolki pra składanaść blizkaha boju ci ciažkaści pieramiaščeńnia ŭhoru — uniz. U značnaj stupieni heta taksama pytańnie ahladu, a značyć — mahčymaści kaardynavać artyleryjski ahoń i inšyja vidy ahniavoj padtrymki biez vykarystańnia dronaŭ».
«Taksama ŭčastki ŭzvyšša lepš padychodziać dla raspaŭsiudžańnia radyjochvalaŭ, dla kaardynacyi dronaŭ».
Časaŭ Jar, jaki, jak niadaŭna zajavili rasijanie, jany zachapili, «źjaŭlajecca adnoj z apošnich vyšyń, jakija kantralujuć ukraincy», adznačaje jon. Siły abarony Ukrainy kažuć, što praciahvajuć utrymlivać tam pazicyi.
Rejnałds padkreślivaje, što raźviedka z dapamohaj spadarožnikavych zdymkaŭ — ci to ad mižnarodnych partnioraŭ Ukrainy, ci kamiercyjnaja — maje vialikaje značeńnie, «ale heta nie toje samaje, što mieć mahčymaść niepasredna kaardynavać ułasnyja taktyčnyja misii».
Ci patrebnaja rasijskim vajskoŭcam usia Danieččyna
Zachodniaja častka Danieččyny — heta tolki adzin z učastkaŭ frontu praciahłaściu kala 1 100 km, ale mienavita tut hetym letam adbyvalisia adny z mocnych rasijskich atak.
Adnak navat kali b Maskva pasprabavała skiravać svaje suchaputnyja siły ŭ inšym napramku, naŭrad ci heta dało b lepšyja vyniki.
«Na poŭdni linija frontu ŭ Zaparožskaj vobłaści ciapier vielmi padobnaja na tuju, što na Danbasie, tamu tam daviałosia b hetaksama prabivacca praz hłybokija abaronnyja pazicyi», — kaža Rejnałds.
«Rasijanie sutykajucca z toj ža prablemaj, sprabujučy prabivacca i na poŭnačy, tamu heta nijak nie budzie «adkrytymi dźviaryma» dla nastupu», — dadaje jon.
Ci zmoža Ukraina adnavić svaju abaronu na zachadzie
Tearetyčna, u vypadku mirnaj damovy ŭkraincy mahli b adsunuć svaju liniju abarony dalej na zachad.
Adnak zastavałasia b prablema niespryjalnaha reljefu, a stvareńnie hłybokich umacavańniaŭ patrabavała b času, navat z udziełam hramadzianskich padradčykaŭ, jakim nie daviałosia b pracavać pad abstrełami.
Ale teoryja — heta adno, ale, jak adznačaje navukovy supracoŭnik RUSI pa pytańniach suchaputnaj vajny, jon nie bačyć, kab ukrainskija vajskoŭcy admovilisia ad zachodniaj častki Danieččyny biez boju.
«Navat kali administracyja Trampa pasprabuje vykarystać padtrymku ZŠA ci harantyi biaśpieki jak ryčah, — kaža Nik Rejnałds, — uličvajučy papiarednija pavodziny Rasii, a taksama jaŭna tranzakcyjny padychod, jakoha prytrymlivajecca administracyja ZŠA, ciažka ŭjavić, što ŭkrainski ŭrad zachoča addać hetuju terytoryju».
Prezident Uładzimir Zialenski zajaviŭ, što Ukraina adchilić lubuju rasijskuju prapanovu sastupić Danbas u abmien na spynieńnie ahniu, padkreśliŭšy, što hetuju terytoryju rasijanie mohuć vykarystać jak płacdarm dla budučych napadaŭ.
Tusk zajaviŭ pra hatoŭnaść adkryć Babroŭniki i Kuźnicu ź listapada63
Kamientary