Zorka «Šerłaka» źziaje ŭ čornaj kamiedyi — budzie šmat brytanskaha humaru i ramantyka naadvarot

My sustrakajem Tea i Ajvi Roŭz, kali ich šlub užo razvalvajecca. U sprobie zachavać adnosiny sužency iduć da psichołaha, dzie načysta pravalvajuć, zdajecca, prostaje zadańnie — napisać dziesiać dobrych rečaŭ adno pra adnaho. Źbiantežanaja terapieŭtka vyrašaje, što hety šlub asudžany na razryŭ, čym vyklikaje rohat u svaich klijentaŭ.

Dalej nam usio ž raskazvajuć historyju z samaha pačatku. Tea i Ajvi — brytancy, jany znajomiacca ŭ restaranie, dzie Ajvi pracuje kucharam, a Tea sustrakajecca z kalehami-architektarami. Aboje zachraśli ŭ rucinie i tamu vyrašajucca razam źjechać za akijan, kab pačać novaje žyćcio.

Praź dziesiać hadoŭ sužency Roŭz žyvuć z dvuma dziećmi ŭ Kalifornii. Źniešnie ŭsio dobra: jon, architektar, prajektuje ambicyjny budynak dla miascovaha muzieja, jana realizuje svaje kucharskija mary ŭ restarančyku, padoranym joj mužam, i na siamiejnaj kuchni. Ale toj budynak razvalvajecca na častki, kali horad nakryvaje štorm, i Ajvi biare na siabie rolu karmicielki siamji.

Toje, što zdaryłasia potym, zavodzić ich šlub u tupik.

Pavialičyć

«Sužency Roŭz» — rymiejk trahikamiedyi 1989 hoda «Vajna sužencaŭ Roŭz» z tahačasnymi zorkami Majkłam Duhłasam i Deni de Vita. Stužka, zasnavanaja na adnajmiennym ramanie Uorena Adlera, nie mieła ŭ siabie ničoha brytanskaha i raspaviadała pra amierykanskuju siamju, što prachodzić praź ciažki razvod. Sužency Roŭz vahajucca pamiž žadańniami razyścisia, pamirycca i zabić adno adnaho. Niečakana akazvajecca, što takija akaličnaści mohuć stać fonam dla cudoŭnaj čornaj kamiedyi.

U novych «Sužencach Roŭz» taksama źnialisia zorki. Havorka, pierš za ŭsio, pra Bieniedykta Kambierbetča (Tea Roŭz), jakoha vy mahli bačyć u kultavym sieryjale 2010-ch «Šerłak», a taksama ŭ sieryi prajektaŭ pra doktara Strendža. Kampaniju jamu skłała mienš viadomaja ŭ ruskamoŭnaj prastory brytanka Alivija Koŭłman (Ajvi Roŭz), uładalnica «Oskara» 2019 hoda za rolu ŭ «Favarytcy» i zorka sieryjała «Karona» pra žyćcio brytanskaj karaleŭskaj siamji.

Pavialičyć

I kali Koŭłman doŭhi čas ličyłasia mienavita kamičnaj aktrysaj, Kambierbetča chutčej viedali pa dramatyčnych rolach — zhadajcie chacia b jaho cudoŭnuju pracu ŭ stužcy 2014 hoda «Hulnia ŭ imitacyju», dzie Kambierbetč hienijalna syhraŭ matematyka Ałana Ćjurynha sa składanym losam. Ale ŭ «Sužencach Roŭz» jon nie mienš dakładny i pierakanaŭčy za svaju bolš daśviedčanuju ŭ kamiedyjach partniorku.

Heta stužka pra brytancaŭ u ZŠA, i ŭ joj nie abyšłosia biez žartaŭ pra sutyknieńnie kultur. U adnym z epizodaŭ Tea i Ajvi sustrakajucca z amierykanskimi siabrami ŭ ciry. U ZŠA dazvolena vałodać zbrojaj, i amierykanskija hieroi z uśmieškaj razmachvajuć zbrojaj, u toj čas jak brytancam strašna da jaje dakranucca. Škada, što na fonie brytancaŭ amierykanskija akciory vyhladajuć mienš pierakanaŭča.

Krytyki pastavilisia da stužki z aściarožnym aptymizmam: naprykład, na resursie IMDB «Sužency Roŭz» majuć rejtynh u 7 bałaŭ z 10. Ale šmat chto adznačaje, što praca Kambierbetča i Koŭłman užo vartaja taho, kab nie prajści mima. Dy i scenar mocny — za jaho ŭziaŭsia aŭstralijec Toni Maknamara, aŭtar scenaryja da «Niebarakaŭ» (Poor Things), filma z Emaj Stoŭn, jaki byŭ siarod asnoŭnych kandydataŭ na «Oskar» u 2024-m.

U jaho atrymałasia nie prosta čornaja kamiedyja, ale ŭ peŭnym sensie i ramantyčnaja stužka naadvarot. Kali zvyčajnyja filmy pra kachańnie raskazvajuć, jak dva čałavieki znachodziać adno adnaho, to «Sužency Roŭz» — historyja pra toje, jak niekali zakachanyja znachodziać u sabie, pa słovach Tea Roŭza, pieryjadyčnuju nianaviść adno da adnaho, a potym i vyrašajuć spravicca ź joj radykalnym čynam. 

Mahčyma, heta nie tak hlancava i aptymistyčna, jak u kłasičnych ramantyčnych kamiedyjach, ale zatoje žyćciova i daścipna. Heta razumnaje i trapnaje kino, chacia i z trochi zaciahnutaj pieršaj častkaj. U im nie budzie vialikich siurpryzaŭ i kinošnych chitrykaŭ, heta historyja siamji, dzie mnohija paznajuć samich siabie. I dobra, što i dla takich nieidealnych historyj znachodzicca miesca ŭ prakacie.

• 3
• 0
• 0
• 0
• 0
• 0
• 0
• 0