«Uensdej» viarnułasia! Ci nie rasčaruje druhi siezon papularnaha sieryjała ad Netflix?
Netflix pradstaviŭ druhi siezon sieryjała «Uensdej» (Wednesday) — historyi pra zmročnuju, ale abajalnuju dziaŭčynu Uensdej i jaje siabroŭ sa škoły dla niezvyčajnych dziaciej. Pakul vyjšła pieršaja pałova siezonu, ale tam užo jość na što pahladzieć.
Kali śviet komiksaŭ — častka amierykanskaj kulturnaj spadčyny, to siamiejka Adams — adzin z hałoŭnych jaho zdabytkaŭ. Mastak Čarlz Adams prydumaŭ kancepcyju hetaj siamji jašče ŭ 1938 hodzie, uziaŭšy za asnovu vobraz tradycyjnaj zachodniaj siamji i dadaŭšy da jaho troški čornaha humaru.
Adamsy — vielmi zhurtavanaja siamja, dzie muž i žonka kachajuć adno adnaho i padtrymlivajuć dziaciej. Praŭda, jość u ich davoli nietypovyja chobi. Naprykład, baćka siamiejstva, miljarder Homies Adams, lubić razburać cacačnyja ciahniki i fiechtavać, a jaho žonka Marciša vyroščvaje atrutnyja raśliny i viedaje, jak nakładvać psutu i zahavory. Jašče jość dzieci, dziaŭčyna Uensdej i jaje brat Pakśli — achviara žartaŭ siastry. I niekalki bolš drobnych piersanažaŭ.
Historyja Adamsaŭ była zaŭždy historyjaj pra čorny humar, tym bolš ich vuścišnyja intaresy dajuć mahčymaść na hetym zhulać. Naprykład, Adamsy lubiać temy hotyki, śmierci i mohiłak, a taksama ŭ niekatorych adaptacyjach hetaj historyi vałodajuć paranarmalnymi zdolnaściami.
Taki farmat historyi, adnak, nie dazvalaŭ całkam raskryć asobnych členaŭ siamji — takich, naprykład, jak maleńkaja dačka Adamsaŭ. Z hetym daŭ rady sieryjał «Uensdej» (Wednesday), pieršy siezon jakoha vyjšaŭ na Netflix u 2022-m.
Sieryjał vyjšaŭ z-pad piara Cima Biortana, kultavaha režysiora filmaŭ z hatyčnaj stylistykaj. Biortan adźniaŭ pa čatyry sieryi ŭ pieršym i druhim siezonie, a taksama dałučyŭsia da kamandy pradziusaraŭ sieryjała.
Jaho ruku ŭ prajekcie dobra bačna — «Uensdej» nahadvaje ikaničnaha «Bitłdžusa», film Biortana, dzie toj jašče ŭ 1988-m raskazaŭ historyju dziaŭčyny-padletka ŭ čornym, chacia i ŭ inšych abstavinach. Zdajecca, u hetym sieryjale Biortan dabraŭsia da vytokaŭ taho vobrazu. Akramia jaho i ŭ cełym historyi siamiejki Adams, tut paznavalny ŭpłyŭ «Hary Potera», inšaj sahi pra staleńnie padletkaŭ z mahičnymi zdolnaściami.
Darečy, pra padletkaŭ. Dla sieryjała Uensdej trochi padraścili — u pieršym siezonie joj nie 6 hadoŭ, jak u sieryjale 60-ch pra Adamsaŭ, i nie 10-12, jak u bolš poźnich ekranizacyjach. Ciapier Uensdej — 15-hadovaja dziaŭčyna i vučanica sumnaviadomaj škoły «Neviermor», kudy traplajuć składanyja ŭ vychavańni dzieci.
Pieršy siezon sieryjała, što vyjšaŭ try hady tamu, akazaŭsia sapraŭdnaj sahaj pra staleńnie pad maskaj satyry i tradycyjnaha dla Adamsaŭ čornaha humaru. Nam pakazali Uensdej, jakaja sprabuje adaptavacca da novaj škoły i dać rady svaim ekstrasensornym zdolnaściam.
Šmat u čym heta detektyŭny sieryjał. Scenarysty raskryvajuć maleńkuju Adams — atrymlivajecca, što jana našmat bolš čym prosta zadzirlivaja siastra Pakśli. U pieršym siezonie Uensdej raźbirajecca z zabojstvami, što majuć miesca ŭ haradku navokał škoły, i maryć pra pośpiech Mery Šeli, junaj aŭtarki «Frankienštejna».
U druhim siezonie nam ź pieršych chvilin dajuć zrazumieć — novaja častka historyi budzie jašče bolš zmročnaj za minułuju. Uensdej raskazvaje pra toje, jak jana baviła čas letam. Dziaŭčynu, jakaja zaŭždy isnavała nibyta ŭ inšym śviecie, pacichu akunajuć u realnaść, i heta hleba dla niebłahich žartaŭ. Naprykład, jak Uensdej ź jaje luboŭju da zbroi prajšła b kantrol biaśpieki ŭ aeraporcie?
A prajści jaho daviałosia — Uensdej treba trapić u inšy horad, kab sustrecca ź sieryjnym zabojcam. Paśla taho randevu jana viartajecca ŭ «Neviermor», dzie jaje ŭžo dobra viedajuć praz apošnija padziei pieršaha siezonu. Tam u dziaŭčyny źjaŭlajecca pieraślednik, a navokał znoŭ pačynajuć adbyvacca strašnyja padziei, i Uensdej biarecca za rasśledavańnie.
Adnačasova z vučobaj Uensdej davodzicca vybudoŭvać adnosiny z baćkami, zavodzić siabroŭ i davać rady ŭvazie chłopcaŭ — chacia jana i niezvyčajnaja, ale ŭsio-tki padletak. U novym siezonie bolš uvahi nadadziena siamiejnaj dynamicy i tamu, jak Uensdej buduje adnosiny z rodnymi.
Jaje brat Pakśli ŭžo starejšy i taksama dałučyŭsia da składu vučniaŭ «Neviermora». Tam ža i Marciša Adams, maci Uensdej, jakuju hraje nievierahodnaja Ketryn Zieta-Džons — zdajecca, hetaja rola daŭno jaje čakała. Novy kiraŭnik «Neviermora» ŭhavaryŭ Marcišu dapamahać škole, i ciapier jana budzie žyć zusim blizka da Uensdej i Pakśli.
Druhi siezon «Uensdej» chacia i akazaŭsia bolš zmročnym, ale pry hetym zachavaŭ toj vybitny humar, jaki byŭ u pieršym siezonie. Džena Arteha, vykanaŭca roli Uensdej, znoŭ źziaje, jak i inšyja akciory.
Ale hałoŭnaje, što i ŭ 2025-m hetaje źniešnie padletkavaje kino akazvajecca našmat bolšym, čym zdajecca na pieršy pohlad. Heta dalikatna źniataja drama pra dziaŭčynku, jakaja vučycca nie bajacca svaich emocyj, pra moc siabroŭstva i siamiejnych suviaziej. A hałoŭnaje — pra toje, što navat kali ty nie taki ci nie takaja, jak usie, ty ŭsio roŭna možaš znajści svaju zhraju.
Praciah druhoha siezonu «Uensdej» vyjdzie na Netflix 3 vieraśnia.
«Naša Niva» — bastyjon biełaruščyny
PADTRYMAĆCiapier čytajuć
Jaŭhien Afnahiel raskazaŭ, što było paśla suda, dzie skandavali «Vierym, možam, pieramožam!» I nazvaŭ, chto dla jaho sapraŭdny lidar Biełarusi4
Kamientary