Zapusk rasijskaha anałaha Starlink pieranieśli z-za pravału vytvorčaści spadarožnikaŭ
U Rasii pieranieśli zapusk pieršaj partyi nizkaarbitalnych spadarožnikaŭ šyrokapałosnaha dostupu ŭ internet (ŠPD) z 16 aparataŭ, jaki pavinien byŭ być ažyćcioŭleny ŭ kancy minułaha hoda kampanijaj «Biuro 1440», piša «Kommiersant».
U vieraśni kiraŭnik «Raskosmasu» Dźmitryj Bakanaŭ abiacaŭ, što da kanca 2025 hoda na arbicie ŭ ramkach prajekta «Rasśviet» pačniecca razhortvańnie 300 pieršych spadarožnikaŭ dla hrupoŭki, jakaja pavinna stać anałaham sistemy Starlink Iłana Maska i zabiaśpiečyć «dostup u internet u lubym hieahrafičnym punkcie».
Pavodle słoŭ dvuch surazmoŭcaŭ na kaśmičnym rynku, pieranos zapusku 16 pieršych aparataŭ na 2026 hod moža być źviazany z tym, što patrebnaja kolkaść aparataŭ da hetaha času nie sabrana. U «Biuro 1440» sa svajho boku zajavili, što kampanija pravodzić raboty «ŭ adpaviednaści z metavymi terminami», i paabiacali pradastaŭlać źviestki ab chodzie realizacyi prajekta «pa miery prachodžańnia [etapaŭ]».
«Dakładnyja daty zapuskaŭ i astatniaja adčuvalnaja infarmacyja nie padlahajuć razhałošvańniu», — havorycca ŭ paviedamleńni.
Niahledziačy na mierkavańnie krynic «Kommiersanta», u śniežni namieśnik kiraŭnika Minličby Dźmitryj Uhnivienka zajaŭlaŭ, što «Biuro 1440» u minułym hodzie vyrabiła nieabchodnyja dla zapusku 16 spadarožnikaŭ.
Na realizacyju prajekta ŭ ramkach nacprajekta «Ekanomika danych» vydzielena 102,8 młrd rasijskich rubloŭ (1,3 młrd dołaraŭ) ź fiederalnaha biudžetu. Jašče 329 młrd rub. (4,34 młrd dołaraŭ) nakiruje «Biuro 1440» z ułasnych srodkaŭ (da 2030 hoda).
U červieni 2025 hoda Bakanaŭ zajaŭlaŭ, što pa prajekcie «Rasśviet» da 2035 hoda budzie zapuščana bolš za 900 nizkaarbitalnych spadarožnikaŭ, pryznačanych dla zabieśpiačeńnia ŠPD u internet. Kamiercyjnaja ekspłuatacyja bolš za 250 ź ich, jak čakajecca, pačniecca ŭ 2027 hodzie. Taksama płanujecca razharnuć jašče bolš za 100 aparataŭ dystancyjnaha zandziravańnia ziamli.
Zhodna z apisańniem fiedprajekta «Infrastruktura dostupu ŭ internet» nacprajekta «Ekanomika danych», u 2025 hodzie na arbitu pavinna było być vyviedziena 16 pieršych aparataŭ, u 2026-m — ich lik dasiahnie 156, u 2027-m — 292, a ŭ 2028-m — 318. Dla hetaha da 2030 hoda płanujecca ažyćciavić 24 zapuski. Zaraz na arbicie razhornuty tolki šeść spadarožnikaŭ «Biuro 1440», zapuščanych u ramkach dvuch ekśpierymientalnych misij.
U sietki Starlink, raspracavanaj kampanijaj Iłana Maska SpaceX, na arbicie na vyšyni 550 km razhornuta hrupa z bolš čym 7 tys. spadarožnikaŭ.
Bialacki: Nie treba śpiašacca admianiać sankcyi. Bo heta budzie ŭspryniata režymam jak jaho pieramoha i słabaść Jeŭropy15
Kamientary